Beste vriende vir altyd

Ek het bietjie gaan oplees. Jy kry vier verskillende persoonlikheidstipes: Die eerste tipe is optimisties en sosiaal, dan kry jy die persoon wat kort van draad of prikkelbaar is, iemand wat analities en stil is, en laastens die ontspanne en rustige tipe. Die artikel sê wel die moontlikheid bestaan dat die persoonlikheidstipes gekombineer kan word. Wel, ek weet nie in watter kategorie jy pas nie, maar as ek so vinnig moet dink, val ek in die analities en stil-kategorie. As jy besluit het watter tipe persoonlikheid jy het, gaan kyk na jou vriende en dan sal jy agterkom jul persoonlikhede verskil soms hemelsbreed. ’n Volgende artikel gaan verder en verduidelik wat vriendskap is. Hulle sê vriendskap is iets wat gegee word sonder dat dit gemeet kan word. Ware vriendskap is om iemand anders se behoeftes bo jou eie te stel, en om uit te reik na iemand anders en om vertroue, betroubaarheid en lojaliteit te koester. Die artikel noem vriendskap is ’n keuse van onskatbare waarde waardeur jy kan ontwikkel en leiding gee aan iemand wat miskien deur ’n moeilike tyd in sy lewe gaan. Dit maak nie saak of jy elke dag of een keer ’n maand of jaar met ’n vriend praat nie. Al wat werklik noodsaaklik is, is dat jy altyd vir die persoon beskikbaar moet wees. Maak nie saak wanneer en hoe laat nie. As jou vriend jou nodig het, moet jy daar wees om raad te gee en leiding te neem. Maar dan kry jy vriende wat nie rêrig vriende is of wil wees nie. Hulle maak maar net die regte geluide om jou om die bos te lei. Jy vertrou hulle genoeg om jou geheime en hartseer verhale met hulle te deel, maar hulle vertrap daardie vertroue sonder om te blik of te bloos. Ek voel net as jy nie my sob story wil hoor nie, sê net so. Gelukkig kry jy ook opregte vriende wat rêrig vir jou omgee en na jou sob story wíl luister en raad gee. Vriende wat jou kinders sal rondry sonder om vrae te vra, jou nooi om koffie te kom drink en net lekker te gesels, jou raad van onskatbare waarde gee, of as die wêreld baie donker lyk, jou net daai magic drukkie sal gee en sê alles gaan oukei wees. Vriende is mense wat nie omgee as jou huis deurmekaar is en of jy tweeuur die middag nog in jou pajamas rondloop nie. Meeste vriendskappe is tydloos. Soos C.J. Langenhoven geskryf het: “Die ware vriendskap, nou, is nie te koop nie; want vriendskap vind nie sy lus in neem nie, maar in gee.” Vir die vriende wat deur dik en dun by my staan, wil ek net vandag dankie sê. Sonder julle sou die lewe baie moeiliker en eensamer gewees het. Geseënde Kersfees en ’n voorspoedige nuwe jaar! Hoop 2019 oortref alle verwagtinge.

Beste vriende vir altyd

Kommentaar

Republikein 2025-05-13

Meld asseblief aan om kommentaar te lewer

Beste vriende vir altyd

Kommentaar

Republikein 2025-05-13

Meld asseblief aan om kommentaar te lewer

MELD AAN

Advertensie