Beskerm jou kind teen siektes

Henriette Lamprecht - Immunisering is een van die mees kostedoeltreffende, openbare gesondheidsingrypings en voorkom jaarliks ‘n beraamde twee tot drie miljoen sterftes.As ‘n direkte gevolg is die wêreld volgens die Verenigde Nasies (UN) se Kinderfonds (Unicef) nader as ooit daaraan om polio finaal uit te wis. Sterftes weens masels het tussen 2000 en 2017 wêreldwyd met 80% afgeneem en ‘n beraamde 21,1 miljoen sterftes is voorkom. “Ons immuniseer om siektes so ver moontlik te bekamp en sterftes te voorkom,” benadruk sr. Annemie Higgs.Die program vir kinders skop reeds met geboorte af wanneer kleinboet of kleinsus hul eerste immunisering vir tuberkulose en hepatitis B, asook poliodruppels ontvang. “Dit is superbelangrik dat baba die immunisering teen tuberkulose ontvang, omdat dit die enigste keer is wat ons hulle teen neonatale tuberkulose kan beskerm. Ons land se TB-syfers is baie hoog en ‘n baba se weerstand laag,” sê Annemie. Met die poliodruppels word nie net die baba beskerm nie, maar ook die res van die gesin. “Ons praat van ‘herd immunity’”, verduidelik sy. Hoe vinniger die baba beskerming teen hepatitis B ontvang, hoe beter. “Onthou, die baba is in ‘n hospitaalomgewing vir die eerste paar dae. Hepatitis B word deur bloedprodukte oorgedra.”Op ses tot agt weke skop die immuniseringsprogram af. Baba word met een inspuiting teen hepatitis B, polio, Hib-influenza, difterie (witseerkeel), pertussis (kinkhoes) en tetanus (klem-in-die-kaak) ingeënt. Volgens Annemie het die jongste samestelling ook minder newe-effekte. Ook aan die beurt is die Pneumococcus strain 13-entstof wat die baba beskerm teen onder meer breinvliesontsteking, chroniese middeloorontsteking, longontsteking en bloedsepsis veroorsaak deur die pneumococcus-bakterieë. Die baba word ook teen die rotavirus ingeënt, ‘n virale infeksie wat braking en diarree veroorsaak en tot dehidrasie kan lei. “Die entstof (stroop) is baie doeltreffend. Hoewel jou kleinding dalk nog die infeksie mag optel, sal dit in ‘n mindere mate ervaar word.”Op 10 tot 12 weke word die twee spuite herhaal omdat die baba se geheueselle nog onderontwikkel is, verduidelik Annemie.“Ons wil graag hê daar moet langtermynvoordeel vir beskerming wees.”Op 14 tot 16 weke is die laaste herhaling wat dan vir baba genoegsame beskerming tot in kleinsus of kleinboet se tweede lewensjaar bied. Die rotavirus-stropie wat net tot voor ses maande toegedien kan word, word ook weer herhaal. Dit is bewys babas reageer die beste op die entstof teen masels op die ouderdom van nege maande, sê Annemie.“Afhangende van hoeveel beskerming hulle ontvang het teen hepatitis B, mag hulle dalk ‘n ‘booster’-spuit nodig hê.”Dit is ook opsioneel vir ma’s om hul babas teen breinvliesontsteking in te ent wat deur die meningococcus-bakterieë veroorsaak word. “Ons vorm nie deel van die ‘gordel’ waar hierdie tipe breinvliesontsteking gereeld voorkom nie, maar die enstof beskerm jou teen die moontlikheid van blootstelling.”Vier maar eers vrolik baba se eerste verjaarsdag voordat jy aanklop vir die volgende spuit op 13 maande, sê Annemie. Peuters word dan beskerm teen die pneumococcus-bakterieë (hulle het reeds drie dosisse as baba ontvang, maar die vierde dosis in die tweede lewensjaar bied dan lewenslange dekking) en hepatitis A. “Kinders is gewoonlik die draers van hepatitis A en dit word vinnig in kleuterskole versprei. Soos met alle kindersiektes is dit baie gevaarlik vir volwassenes om die infeksie op te tel.”Opsioneel is om kinders ook teen waterpokkies te beskerm en die entstof kan van die ouderdom van ‘n jaar toegedien word. Annemie verduidelik op 15 maande word begin om die versterkingsdossise te gee wat kinders reeds as babas ontvang het om so te verseker hulle word langer beskerm. Dit sluit in hepatitis B, polio, Hib Influenza, difterie, kinkhoes, klem-in-die-kaak, asook masels, Duitse masels en pampoentjies (drie-in-een). Op 18 maande word die laaste versterkingsdosis teen hepatitis A gegee wat hulle op 13 maande ontvang het.Indien die baba nie op nege maande teen die meningococcus-bakterieë ingeënt is nie, kan dit nou op 24 maande as enkeldosis toegedien word. Volgens Annemie word die geheueselle op 5 to 6 jaar weer versterk met ‘n alles-in-een-spuit teen difterie, klem-in-die-kaak en polio, asook die spuit teen masels, Duitse masels en pampoentjies. “Hiermee verseker ons dat hulle genoeg beskerming het as volwassenes.”Annemie maan ouers om nie ‘n koors- of pynstropie voor die immunisering aan babas en kinders te gee nie, omdat dit wel die doeltreffendheid van die entstof beïnvloed. “Daar is alternatiewe medikasie wat na die tyd gegee kan word vir pyn of koors.”Dit is ook 100% normaal vir ‘n reaksie of gevoeligheid op die plek waar die inspuiting toegedien is, terwyl baie van die entstowwe ook koors kan veroorsaak. “Onthou ons is besig om die immuniteit te prikkel vir die geheueselle om die inligting te stoor.”Sy maan ouers om ingelig oor immuniserings te wees en nie ‘n besluit oor entstowwe te neem op grond van wat op sosiale media gelees of gehoor is nie.“Maak ‘n studie van die verskillende aansteeklike siektes en hul gevolge, en weet waarteen jy jou baba beskerm.” Indien baba of kleuter op datum met sy of haar immuniserings is, is dit volgens haar nie nodig om aan al die bykomende immuniseringsveldtogte deel te neem nie. “Dit is wel belangrik vir die beskerming van die hele land dat almal geïimmuniseer word en in die verband verwys ek weer na ‘herd immunity’.” Volgens Annemie “sien ons minder siektes” omdat meer mense geïmmuniseer word. “Andersins sien ons weer die uitbreking van siektes soos die onlangse uitbreking van masels in Brittanje. Ongelukkig is die uiteinde hiervan sterftes onder kinders.”Ons bly in ‘n wêreld wat nie perfek is nie, met siektes, gebrek en seer, sê sy.“Ek is van mening dat God die Skepper van alles is en dit sluit medisyne in. Natuurlik kan ‘n mens enigiets misbruik waarvan die aanvanklike doel goed was, en dit ‘n negatiewe uitwerking gee. Entstowwe, soos baie ander medikasie, is ontwerp om ons teen siektes en sterftes te beskerm.” *Higgs73@gmail.com, Facebook: Sr. Annemie Higgs Health Services

Beskerm jou kind teen siektes

Kommentaar

Republikein 2025-06-18

Meld asseblief aan om kommentaar te lewer

Beskerm jou kind teen siektes

Kommentaar

Republikein 2025-06-18

Meld asseblief aan om kommentaar te lewer

MELD AAN

Advertensie