Besighede wag steeds op Covid-19-geld
Die Maatskaplike Voorsorgkommissie probeer nog die proses vir uitbetaling regkry.
Augetto Graig
Nog geen geld is deur die Maatskaplike Voorsorgkommissie (SSC) uitbetaal aan maatskappye wat deur die Covid-19-nasionale inperking platgeslaan is nie.
Volgens SSC se woordvoerder, me. Unomengi Kauapirura, worstel die kommissie steeds met die proses om die hulpfondse beskikbaar te stel.
Die vereiste handtekeninge is verkry en daar is vordering gemaak, sê sy.
Sy sê die eerste maatskappye behoort teen Vrydag 24 Julie geld te ontvang. Vanaf Maandag 20 Julie sal die SSC lyste van begunstigde maatskappye na betrokke banke stuur, sê sy.
Volgens Kauapirura het sowat 2 200 werkgewers voor einde Junie aansoek gedoen en is die kommissie besig om die goedgekeurde aansoeke te bekragtig.
Maatskappye in die toerismebedryf, gasvryheid, lugvaart, konstruksie, boerdery, nie-finansiële dienste, kleinhandelaars (nie kosverwant), huishoudelike werkers en tuinmaakdienste, asook in die vermaakbedryf is aangemoedig om aansoek te doen.
Vir goedkeuring moet hulle reeds meer as ses maande by die SSC geregistreer wees en kon bewys hul inkomste is deur die inperking geraak.
Finansiële ondersteuning vir die plaaslike ekonomie is in April deur die minister van finansies, mnr. Iipumbu Shiimi, aangekondig en behels 'n stimulus- en verligtingspakket ter waarde van N$8,1 miljard.
Dié bedrag bestaan uit N$5,9 miljard in direkte steun aan ondernemings, huishoudings en kontantvloei-versnellings van uitbetalings vir dienste gelewer aan die regering.
Terwyl N$2,3 miljard beskikbaar sou wees in buitebegrotingsteun, gewaarborg deur die regering, om die aansoek van lenings op voorkeurvoorwaardes deur ondernemings en individue te ondersteun.
Die ministerie se woordvoerder, mnr. Tonateni Shidhudhu, het verlede week gesê hulle kan voorlopig net inligting in verband met die noodinkomstetoelae, die nasionale skema vir die beskerming van werk en salaris, en terugbetalings van BTW en inkomstebelasting vrystel.
Die noodinkomstetoelae, wat 'n eenmalige betaling van N$750 per begunstigde behels, is toe reeds aan 747 281 Namibiërs uitbetaal, ter waarde van sowat N$562 miljoen.
Na verwagting sal nog 120 000 Namibiërs ná verifikasie hieruit baat.
Tot op 30 Junie was net N$22 miljoen uitbetaal in terme van die nasionale skema vir die beskerming van werk en salaris.
Hiervoor het die regering N$400 miljoen beskikbaar gestel, terwyl die SSC N$245 miljoen moet bydra en die uitbetalings behartig.
Sowat 5 483 werknemers (uit meer as 16 000 aansoekers) is toe al gehelp. Kauapirura sê die aantal werknemers wat die SSC finansieel deur die gevolge van die Covid-19-inperking sal steun, behoort teen môre tot 12 500 te styg.
Ongeveer 4 000 aansoekers is gediskwalifiseer omdat hulle meer as N$50 000 per jaar verdien, geen salarisinkrimping gehad het nie, of nie ten minste vir ses maande by die SSC geregistreer is nie.
Die finansministerie het ook tussen 1 April en 26 Junie BTW-terugbetalings ter waarde van meer as N$2,4 miljard gemaak, en meer as N$102 miljoen in terugbetalings van inkomstebelasting.
Die ministerie kon uitstaande fakture ter waarde van N$1,2 miljard op 31 Maart ook volledig afbetaal, volgens Shidhudhu.
– [email protected]
Nog geen geld is deur die Maatskaplike Voorsorgkommissie (SSC) uitbetaal aan maatskappye wat deur die Covid-19-nasionale inperking platgeslaan is nie.
Volgens SSC se woordvoerder, me. Unomengi Kauapirura, worstel die kommissie steeds met die proses om die hulpfondse beskikbaar te stel.
Die vereiste handtekeninge is verkry en daar is vordering gemaak, sê sy.
Sy sê die eerste maatskappye behoort teen Vrydag 24 Julie geld te ontvang. Vanaf Maandag 20 Julie sal die SSC lyste van begunstigde maatskappye na betrokke banke stuur, sê sy.
Volgens Kauapirura het sowat 2 200 werkgewers voor einde Junie aansoek gedoen en is die kommissie besig om die goedgekeurde aansoeke te bekragtig.
Maatskappye in die toerismebedryf, gasvryheid, lugvaart, konstruksie, boerdery, nie-finansiële dienste, kleinhandelaars (nie kosverwant), huishoudelike werkers en tuinmaakdienste, asook in die vermaakbedryf is aangemoedig om aansoek te doen.
Vir goedkeuring moet hulle reeds meer as ses maande by die SSC geregistreer wees en kon bewys hul inkomste is deur die inperking geraak.
Finansiële ondersteuning vir die plaaslike ekonomie is in April deur die minister van finansies, mnr. Iipumbu Shiimi, aangekondig en behels 'n stimulus- en verligtingspakket ter waarde van N$8,1 miljard.
Dié bedrag bestaan uit N$5,9 miljard in direkte steun aan ondernemings, huishoudings en kontantvloei-versnellings van uitbetalings vir dienste gelewer aan die regering.
Terwyl N$2,3 miljard beskikbaar sou wees in buitebegrotingsteun, gewaarborg deur die regering, om die aansoek van lenings op voorkeurvoorwaardes deur ondernemings en individue te ondersteun.
Die ministerie se woordvoerder, mnr. Tonateni Shidhudhu, het verlede week gesê hulle kan voorlopig net inligting in verband met die noodinkomstetoelae, die nasionale skema vir die beskerming van werk en salaris, en terugbetalings van BTW en inkomstebelasting vrystel.
Die noodinkomstetoelae, wat 'n eenmalige betaling van N$750 per begunstigde behels, is toe reeds aan 747 281 Namibiërs uitbetaal, ter waarde van sowat N$562 miljoen.
Na verwagting sal nog 120 000 Namibiërs ná verifikasie hieruit baat.
Tot op 30 Junie was net N$22 miljoen uitbetaal in terme van die nasionale skema vir die beskerming van werk en salaris.
Hiervoor het die regering N$400 miljoen beskikbaar gestel, terwyl die SSC N$245 miljoen moet bydra en die uitbetalings behartig.
Sowat 5 483 werknemers (uit meer as 16 000 aansoekers) is toe al gehelp. Kauapirura sê die aantal werknemers wat die SSC finansieel deur die gevolge van die Covid-19-inperking sal steun, behoort teen môre tot 12 500 te styg.
Ongeveer 4 000 aansoekers is gediskwalifiseer omdat hulle meer as N$50 000 per jaar verdien, geen salarisinkrimping gehad het nie, of nie ten minste vir ses maande by die SSC geregistreer is nie.
Die finansministerie het ook tussen 1 April en 26 Junie BTW-terugbetalings ter waarde van meer as N$2,4 miljard gemaak, en meer as N$102 miljoen in terugbetalings van inkomstebelasting.
Die ministerie kon uitstaande fakture ter waarde van N$1,2 miljard op 31 Maart ook volledig afbetaal, volgens Shidhudhu.
– [email protected]
Kommentaar
Republikein
Geen kommentaar is op hierdie artikel gelaat nie