Bergpasse deur Alpe hou Adrian op dreef
Die Namibiese kampioen en Olimpiër sit nie stil in Switserland nie.
Andrew Poolman
Vera Adrian (Looser), Namibië se voorste padfietsryer, was die afgelope tyd bedrywig met kompetisies in haar nuwe tuiste Switserland waar sy en haar man Konny Looser kamp opgeslaan het.
Net in die afgelope twee weke het sy eers aan 'n meerdaagse bergfietstoer deelgeneem en daarna twee strawwe padfietsresiese aangepak.
Die eerste was die gedugte Swiss Epic bergfietstoer oor vyf dae. Haar spanmaat was Zina Barhoumi, 'n cyclocross-ryer van Switserland.
Vir beide van hulle was dit hul debuutdeelname aan die epiese bergfietstoer oor 'n totaal van 320 kilometer, met opdraandes van altesame 12 250 meter hoog en afdraandes van 11 850 meter.
“Ons het die Alpe saam oorwin! Dit het ons 'net' 22 ure geneem, maar dit was 'n genotvolle week op en van die fiets. Al is my bene moeg, voel ek geestelik herlaai om die laaste derde van hierdie spesiale jaar aan te pak,” het Adrian agterna op sosiale media aangekondig.
Die twee het in die agtste posisie van die vroueresies klaargemaak, en 53ste algeheel.
Die 26-jarige Adrian het aan die koerant gesê sy was fisiek sterker as Barhoumi en hoewel hul finale uitslag dus heelwat swakker was as wanneer sy saam met 'n meer behendig ryer kon saamwerk, was die deelname sonder twyfel die moeite werd.
“Op die oomblik is daar nie 'n oorvloed resiese wat plaasvind nie, omdat gevalle van Covid-19 ook hier in Switserland weer aan die styg is. Ek voel dat die resies my beslis goed gedoen het.
“Die ganse byeenkoms van begin tot einde is uitstekend georganiseer. Wie weet, dalk sal ons twee nuwelinge terugkeer vir volgende jaar se Swiss Epic,” het sy bygevoeg.
Die formidabele stamboek van die mans- en vrouekampioene getuig op sigself hoe hoog die Swiss Epic aangeskryf word. Die elite mansresies is deur Nino Schurter en Lars Forster, beide van Switserland, in 15 ure 13 minute gewen, voor die Italiaanse paar Fabian Rabensteiner en Samuele Porro, met sowat tien minute verskil.
Die vrouekampioenspan was Annika Langvad (Noorweë) en Haley Batten (Brittanje) in 19 ure 08 minute.
PADFIETS
Op die padfiets is Adrian die heersende Namibiese nasionale kampioen, wat met haar posisie by die 2019 Afrika-kampioenskap ook verseker het dat sy vir die volgende Olimpiese Spele in Tokio in 2021 gekwalifiseer het.
Dié skouspel sal haar tweede Olimpiese verskyning wees, ná haar debuut in Rio de Janeiro 2016 as 22-jarige.
Die afgelope Saterdag in Switserland het sy aan nog 'n internasionale resies deelgeneem. Die Zürich-na-Zermatt word as die strafste eendaagse resies in dié land se fietsry beskou.
Die uitdaging van 280 kilometer deur verskeie bergpasse en valleie, met meer as 6 000 meter van klimdele, sit gewis nie in elkeen se broek nie. Omtrent in die middeldeel wag byvoorbeeld die Grimsel-pas wat 'n aaneenlopende steil klimskof van 2 164 vertikale meters is.
'n Totaal van 438 solo- en spanryers het in gunstige weer by die beginstreep aangetree, met net die laaste paar voltooiers wat 'n bietjie reën teëgekom het.
Ryers van die gasheerland het die uitslae oorheers, met Adrian se man Konny Looser wat derde in die solo-resies vir mans was.
Adrian sê: “Vanweë die lang afstand (280 km) is die wegspringtyd twee-uur die oggend. Ek was in die spankompetisie ingeskryf saam met een van my borge, wat ook groter as ek gebou is. Die spanlede kan mekaar afwissel soos jy wil, voordat die twee maats weer die laaste agt kilometer saam moet ry.
“Weer eens was ons dus nie een van die vinniger spanne nie, maar ons het só opgedeel dat ek die meeste van die klimwerk gedoen het. Ek het die resies baie geniet en ek glo dit was baie goeie oefening.”
• Laas Sondag het sy in die Rund Um Uzwil-resies vierde van die vroue oor die eindstreep gejaag.
Vera sê sy het nog 'n paar deelnames in die komende weke in die oog. “Oor twee naweke wag nog 'n padfietsbyeenkoms en ek beoog ook om vir die oefening aan die cyclocross-seisoen deel te neem wat binnekort begin. Ek hoop dat die stygende gevalle van die coronavirus nie 'n stokkie sal voor steek nie.”- [email protected]
Vera Adrian (Looser), Namibië se voorste padfietsryer, was die afgelope tyd bedrywig met kompetisies in haar nuwe tuiste Switserland waar sy en haar man Konny Looser kamp opgeslaan het.
Net in die afgelope twee weke het sy eers aan 'n meerdaagse bergfietstoer deelgeneem en daarna twee strawwe padfietsresiese aangepak.
Die eerste was die gedugte Swiss Epic bergfietstoer oor vyf dae. Haar spanmaat was Zina Barhoumi, 'n cyclocross-ryer van Switserland.
Vir beide van hulle was dit hul debuutdeelname aan die epiese bergfietstoer oor 'n totaal van 320 kilometer, met opdraandes van altesame 12 250 meter hoog en afdraandes van 11 850 meter.
“Ons het die Alpe saam oorwin! Dit het ons 'net' 22 ure geneem, maar dit was 'n genotvolle week op en van die fiets. Al is my bene moeg, voel ek geestelik herlaai om die laaste derde van hierdie spesiale jaar aan te pak,” het Adrian agterna op sosiale media aangekondig.
Die twee het in die agtste posisie van die vroueresies klaargemaak, en 53ste algeheel.
Die 26-jarige Adrian het aan die koerant gesê sy was fisiek sterker as Barhoumi en hoewel hul finale uitslag dus heelwat swakker was as wanneer sy saam met 'n meer behendig ryer kon saamwerk, was die deelname sonder twyfel die moeite werd.
“Op die oomblik is daar nie 'n oorvloed resiese wat plaasvind nie, omdat gevalle van Covid-19 ook hier in Switserland weer aan die styg is. Ek voel dat die resies my beslis goed gedoen het.
“Die ganse byeenkoms van begin tot einde is uitstekend georganiseer. Wie weet, dalk sal ons twee nuwelinge terugkeer vir volgende jaar se Swiss Epic,” het sy bygevoeg.
Die formidabele stamboek van die mans- en vrouekampioene getuig op sigself hoe hoog die Swiss Epic aangeskryf word. Die elite mansresies is deur Nino Schurter en Lars Forster, beide van Switserland, in 15 ure 13 minute gewen, voor die Italiaanse paar Fabian Rabensteiner en Samuele Porro, met sowat tien minute verskil.
Die vrouekampioenspan was Annika Langvad (Noorweë) en Haley Batten (Brittanje) in 19 ure 08 minute.
PADFIETS
Op die padfiets is Adrian die heersende Namibiese nasionale kampioen, wat met haar posisie by die 2019 Afrika-kampioenskap ook verseker het dat sy vir die volgende Olimpiese Spele in Tokio in 2021 gekwalifiseer het.
Dié skouspel sal haar tweede Olimpiese verskyning wees, ná haar debuut in Rio de Janeiro 2016 as 22-jarige.
Die afgelope Saterdag in Switserland het sy aan nog 'n internasionale resies deelgeneem. Die Zürich-na-Zermatt word as die strafste eendaagse resies in dié land se fietsry beskou.
Die uitdaging van 280 kilometer deur verskeie bergpasse en valleie, met meer as 6 000 meter van klimdele, sit gewis nie in elkeen se broek nie. Omtrent in die middeldeel wag byvoorbeeld die Grimsel-pas wat 'n aaneenlopende steil klimskof van 2 164 vertikale meters is.
'n Totaal van 438 solo- en spanryers het in gunstige weer by die beginstreep aangetree, met net die laaste paar voltooiers wat 'n bietjie reën teëgekom het.
Ryers van die gasheerland het die uitslae oorheers, met Adrian se man Konny Looser wat derde in die solo-resies vir mans was.
Adrian sê: “Vanweë die lang afstand (280 km) is die wegspringtyd twee-uur die oggend. Ek was in die spankompetisie ingeskryf saam met een van my borge, wat ook groter as ek gebou is. Die spanlede kan mekaar afwissel soos jy wil, voordat die twee maats weer die laaste agt kilometer saam moet ry.
“Weer eens was ons dus nie een van die vinniger spanne nie, maar ons het só opgedeel dat ek die meeste van die klimwerk gedoen het. Ek het die resies baie geniet en ek glo dit was baie goeie oefening.”
• Laas Sondag het sy in die Rund Um Uzwil-resies vierde van die vroue oor die eindstreep gejaag.
Vera sê sy het nog 'n paar deelnames in die komende weke in die oog. “Oor twee naweke wag nog 'n padfietsbyeenkoms en ek beoog ook om vir die oefening aan die cyclocross-seisoen deel te neem wat binnekort begin. Ek hoop dat die stygende gevalle van die coronavirus nie 'n stokkie sal voor steek nie.”- [email protected]
Kommentaar
Republikein
Geen kommentaar is op hierdie artikel gelaat nie