Bergkoninkryk kry oorhand

Die Namibiese nasionale o.20-span, die Young Warriors, het Sondag met 2-1 in sy Groep C-wedstryd teen Lesotho by die 2017 o.20 Cosafa-kampioenskap in Zambië verloor.Ná Namibië die knie in die Nkana-stadion in Kitwe teen die jeug van die Bergkoninkryk moes buig, sal hulle vandag teen Zimbabwe moet wen om hul drome lewendig te hou. Namibië het dié botsing teen Lesotho op ‘n positiewe noot benader nadat hulle Angola Vrydag met 2-1 geklop het om as voorlopers in Groep C die botoon te voer.Dit was ‘n gulde geleentheid vir hoofafrigter Gerald Gunther en sy span om ‘n treetjie nader aan die semifinaal te kom, of vir Lesotho om ná sy vorige glips terug in die prentjie te kom. Lesotho het met die afskop met mening aangeval en die Namibiese verdediging behoorlik getoets wat karakter gewys het om die telling op nul teen hulle te hou.Lesotho se R. Mobane is met rustyd vir ‘n gevaarlike loopslag op Rivaldo Festus van die veld gestuur. In die tweede helfte moes Lesotho met slegs tien spelers klaarkom, maar dit het nie die manne van die Bergkoninkryk se moed gebreek nie.In die tweede helfte het Gunther vir Romario Hawiseb opgestuur om die sukkelende Enzo Mungendje te vervang. Mungendje het wel teen Angola ‘n doel aangeteken, maar teen Lesotho gesukkel om sy gewone peil te herwin. Hawiseb het vinnig sy merk gemaak toe hy in die 64ste minuut vir Namibië sy eerste en laaste doel aanteken.Die vreugdevure was egter vinnig geblus toe Lesotho se Koloti Roboama in die 70ste minuut die gelykmaker behaal en ses minute later die jong Namibiërs se harte breek met nog ‘n doel vir sy span se broodnodige oorwinning.Gunther sê Namibië was Sondag nie op peil nie en Lesotho het verdien om te wen.“Ons seuns het van die afskop af nie ordentlike sokker gespeel en mededingend gewees nie. Lesotho speel al sedert 1980 en is ‘n fisieke span wat nie ‘n tree terugstaan nie. Ons spelers kon dit nie hanteer nie. Nadat ons die eerste doel aangeteken het, het die spelers laks geword en hulle (Lesotho) die kans gegee om weer terug in die wedstryd te kom. Ons sleutelspelers het nie hulle kant gebring nie en Lesotho het hard gewerk om die oorwinning te behaal,” het Gunther verduidelik.Lesotho is met vier punte tans die voorloper in Groep C met Namibië tweede met drie punte, terwyl Zimbabwe en Angola nog moet speel. Namibië sal Zimbabwe vandag om 15:00 behoorlik moet klop, want slegs die voorlopers in elke groep en een naaswenner wat die beste gevaar het, sal verder na die halfeinstryde vorder.“Ons sal van die wedstryd teen Lesotho moet vergeet om Zimbabwe te kan klop. Alles is nog nie verlore vir Namibië nie; ons veg vir ons eer en die van ons land,” het Gunther hoopvol gesê.

Bergkoninkryk kry oorhand

Kommentaar

Republikein 2026-03-20

Meld asseblief aan om kommentaar te lewer

Bergkoninkryk kry oorhand

Kommentaar

Republikein 2026-03-20

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.