Benoude Warriors oes drie punte

Tielman van Lill - Die Tafel Lager Brave Warriors en hul tussentydse afrigter, Bobby Samaria, kan hulle ná Woensdagaand se onoortuigende vertoning teen Tsjad vet smeer vir ’n veel moeiliker taak.Namibië het wel in die Sam Nujoma-stadion in Katutura sy eerste groep A-uitdunwedstryd in die wedloop na die 2021 Afcon-kampioenskap met 2-1 gewen. Dié telling poets egter die Warriors se beeld nadat hulle rustyd op 0-0 moes gaan planne beraam om Les Sao te stuit.Tsjad word as die swakste span in die ganse kompetisie beskou en is maar die 176ste beste sokkerland op Fifa se ranglys. Soos die besoekers egter Woensdagaand verdedig het en binne ’n minuut met die grootste gemak teruggeslaan het om die Warriors se doelnet te tref (1-1), sal die Warriors komende Sondag in hul wegwedstryd teen Guinee (78ste op Fifa-ranglys) in die hoofstad Conakry hul storie moet ken.Die Warriors, met kaptein Petrus Shitembi aan die voorpunt, het goed op die aanval in die middelveld vertoon. Maar hul besluitneming en opsies voor die doelkas was soos in die verlede swak met sinnelose skoppe wat wyd verby die doelkas geseil het. Die Warriors se eerste doel in die 64ste minuut was ’n eie doel wat vanaf Eli Mathieu Adoassou, Tsjad se doelwagter, ingespat het. Die bal is wel deur Peter Shalulile getref wat ’n hoë bal uitstekend beheer het om met sy skop los te trek. Die bal het vanaf Adoassou die linkerpaal getref, na hom gebons en die puntesone binne geval.Net ’n minuut later slaan die besoekers egter hard terug. Ezechiel Ndouasel, kaptein van Tsjad, tref Namibië se doelnet met ’n goeie kopstoot nadat hy die vlug van die bal perfek vanaf ’n hoekskop gelees het.Die Warriors se wendoel vir ’n broodnodige oorwinning kom in die 74ste minuut van die verdediger Chris Katjiukua se stewel. Sy beheer oor die aangee was meesterlik uitgeoefen.Die verdedigers asook Tsjad se laaste vesting het tussen hom en die besoekers se doelkas gewag. Maar hy op ’n tiekie omgedraai, die bal laag en sekuur teen die net laat klap om die kleinerige getal toeskouers opnuut uitbundig te laat dans.“Dis nooit maklik nie. Ons het in die eerste helfte min goeie doelkanse geskep, maar het ons taktiek gewysig en het daarna skerper begin lyk. Ten minste het ons nou drie punte en as ons komende naweek weer met die wenpunte kan wegkom, is die helfte van ons taak reeds afgehandel,” het Samaria agterna gesê.Guinee sou gisteraand sy eerste uitdunwedstryd vir die 2021 Afrika-Nasiesbeker teen Mali speel, voordat hulle Sondag teen die Brave Warriors vir beide spanne se tweede kragmeting in groep A op die veld. Die Namibiërs het reeds gister uit Windhoek na Wes-Afrika vertrek.Die Warriors se beginspan was Loyd Kazapua (doelwagter); Riaan Hanamub, Ryan Nyambe, Chris Katjiukua, Larry Horaeb (verdedigers); Deon Hotto, Denzil Haoseb, Dynamo Fredericks, Absalom Iimbondi (middelveldspelers); kaptein Petrus Shitembi, Peter Shalulile (aanvallers).Afcon-uitslae van eergisteraand: Nigerië 2-1 Benin, Kameroen 0-0 Kaap Verde, Guinee-Bissau 3-0 eSwatini, Burkina Faso 0-0 Uganda, Soedan 4-0 Sao Tomé, Angola 1-3 Gambië, Senegal 2-0 Kongo, Malawi 1-0 Suid-Soedan, Sentraal-Afrikaanse Republiek 2-0 Burundi, Sierra Leone 1-1 Lesotho, Namibië 2-1 Tsjad. - tielman@republikein.com.na

Benoude Warriors oes drie punte

Kommentaar

Republikein 2025-07-22

Meld asseblief aan om kommentaar te lewer

Benoude Warriors oes drie punte

Kommentaar

Republikein 2025-07-22

Meld asseblief aan om kommentaar te lewer

MELD AAN

Advertensie