Bende dreig kinders met wapens

Des Erasmus - Twee minderjarige meisies het in die koue lope van die vuurwapens van ses mans in klapmusse vasgekyk toe Maandag in die vroeë oggendure op ‘n huis naby die sentrale sakegebied van Karibib toegeslaan is. Ná die rooftog is die kinders en ‘n huishulp aan hul hande gebind en in ‘n motorhuis toegesluit om daar te lê terwyl die rowers in ‘n wit motor met hul buit gevlug het. Die huis word bewoon deur ''n egpaar wat by die Navachab-goudmyn werksaam is. Die kinders was in die sorg van ‘n huishulp toe die drama hom afgespeel het. Beeldmateriaal oor die aanval is beskikbaar danksy kameras teen die mure van ‘n aangrensende huis wat deur Chinese bewoon word. Volgens die beskikbare materiaal lyk dit of die georganiseerde bende in ‘n Ford Fiesta-motor hul aanval presies beplan het en ook geweet het wat waar is. Die voorval is deur die polisie in ‘n misdaadverslag vir die Erongostreek bevestig. In die verslag word ook na ses mans met klapmusse oor hul koppe verwys. Daarvolgens is die huishulp voor die lope van gewere afgedreig en was geld die eis van die aanvallers. Deel van die aanvallers se toerusting was meganiese snytoerusting in ‘n rooi sakkie. Daarmee is twee groot kluise oopgesny en is die buit vergaar. Die diewe het met 200 euro, 200 Britse pond, N$9 000, drie Canon-kameras, drie duur horlosies, die huishulp se selfoon en ‘n pistool weggekom. Baie van die vrou se juwele is ook weg. Die gesamentlike waarde van die buit word deur die polisie op sowat N$120 000 gestel, maar dit kan aansienlik meer wees namate ‘n opname gemaak word van alles wat weg is. Volgens die polisie was die aanval tussen 08:00 en 10:00 Maandag uitgevoer. Tot gistermiddag was geen inhegtenisneming nog uitgevoer nie. Bure het gister hul weergawe gegee van presies wat gebeur het. Dit is duidelik dat die bende die kom- en gaantye van die egpaar geken het. Daar was gewag totdat hulle vroeg die oggend myn toe is en die huishulp klaar hul sorg oorgeneem het. Volgens beskikbare beeldmateriaal het hulle ‘n afstandbeheerde hek met hul eie duplikaatstelsel ontsluit en toegang tot die huis gekry. Die huishulp en die kinders is voor die vuurwapens aangehou terwyl bendelede die kluis leeggemaak het. Daarna is die huishulp en die kinders vasgebind en in die motorhuis toegesluit. Een van die klein kinders het haar hande losgewoel gekry en toe ook die huishulp losgemaak waarop hulp ontbied is. Die egpaar is laat weet en was kort daarna op die toneel. Volgens die beeldmateriaal was al ses mans netjies aangetrek met handskoene en die klapmusse om hul identiteit te bewaar.

Bende dreig kinders met wapens

Kommentaar

Republikein 2025-12-17

Meld asseblief aan om kommentaar te lewer

Bende dreig kinders met wapens

Kommentaar

Republikein 2025-12-17

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.