Belowende stut ontwikkel in Engeland

Andrew Poolman – Die Namibiese stut Patrick Schickerling is deur sy Engelse premierligaklub Exeter Chiefs uitgeleen om saam met nog vier van sy jong spanmaats meer wedstrydgeleentheid te kry.Die 22-jarige gebore Walvisbaaier en sy maats sal sowat 138 kilometer na die weste van Exeter vir Cornish Pirates beskikbaar wees, sodra die Engelse Kampioenskap (die tweede vlak van die professionele spel in die land) se nuwe seisoen in Maart afskop.Cornish Pirates, 'n klub vir wie die voormalige Namibiese Wêreldbekerslot Heino Senekal ook uitgedraf het, sal op die openingsnaweek in 'n tuiswedstryd teen die gedugte Saracens opgeweeg word.Schickerling het sedert sy aansluiting by Exeter Chiefs in een Engelse premierligawedstryd uitgedraf, toe hy in Februarie verlede jaar teen Harlequins opgestuur is.Schickerling het as leerder van Walvisbaai Privaat Hoërskool die o.18 Cravenweekspan van 2016 gehaal. Dit was 'n kombinasie waaruit spanmaats soos André Rademeyer (stut), Prince !Gaoseb (flank), Oderich Mouton (agtsteman, later vleuel) en Chad Plato (vleuel) sedertdien uitgestyg het om toets- en selfs Wêreldbekerrugby te speel.In die volgende twee jare was Schickerling beide kere lid van Namibië se span wat aan die Wêreldrugby Onder 20 Trofee-toernooie (Montevideo 2017 en Boekarest 2018) gaan meeding en beide kere vierde klaargemaak het. Dié posisie kom daarop neer dat Namibië 16de op die wêreldranglys was, met die toptwaalf van die o.20 Wêreldkampioenskap bygereken. GLOEIENDE GETUIGSKRIFNa afloop van die o.20-toernooi in Roemenië in 2018 het die rugbywebblad Rugbypass vir Schickerling begin uitsonder as een van die spelers wat die sterkste na vore getree en belofte vir die toekoms getoon het.“Die Namibiese vaskopstut is 'n groot stuk vleis van 130 kilogram. Hy was aan die spits van die Namibiese skrum wat by hierdie toernooi gedomineer het – 'n feit wat nog meer indrukwekkend is wanneer 'n mens onthou dat hy twaalf maande gelede aan die loskopkant gesak het,” het Rugbypass oor hom geskryf.“Afgesien dat hy die draaipunt van sy span se skrum is, lewer Schickerling ook indrukwekkende algemene spel. Hy is 'n kragtige figuur as baldraer en het dikwels soos 'n spykerbal (pinball) sy pad deur voornemende verdedigers gevind het.“Die skrum mag dalk 'n minder invloedryke faktor in die spel word, maar vaskoppe met die natuurlike grootte van Schickerling sal steeds hul waarde op die veld uitoefen – asook in kontrakonderhandelinge. Spanne in beide die Noordelike en Suidelike Halfrond behoort in hierdie stut belang te stel.”Later, op die tweede Januarie 2020 voordat die coronavirus wêreldsport tot stilstand gedwing het, is die Namibiër opnuut uitgesonder toe Rugbypass 'n spesiale voorskou op die nuwe dekade gedoen het.Die webblad hetsy “wêreldvyftiental” gekies van spelers wat nog nie op toetsvlak deurgebreek het nie, maar wat volgens hul voorspelling die meeste potensiaal het om oor die volgende tien jaar diep spore te trap soos wat rugbyreuse soos Kieran Read, Duane Vermeulen, Dan Carter, Jonny Sexton, Sergio Parisse, Alun Wyn Jones en Ma'a Nonu gedurende die 2010's gedoen het.Rugbypass het sy aanwysing van Schickerling as vaskopstut só gemotiveer: “Hy is nog rou, maar hy het baie potensiaal om mee te werk. Dit mag gebeur dat hy by Exeter nie tot sy reg kom nie, omdat dié klub 'n diep lys goeie vaskopstutte het, maar iewers in die komende jare behoort hy hierdie talent gestand te doen.” WÊRELDBEKER-SIKLUSGedurende die vorige Wêreldbeker-siklus en opbou na Japan 2019 was Schickerling inderdaad op die radar van die Namibiese afrigter, Phil Davies, hoewel die jong stut nog nie op internasionale vlak deurgebreek het nie.Schickerling, wat in 2018 by die Pumas gekontrakteer was, is sonder twyfel strate beter as sommige van die stutte in die voorlopige groep van 50 spelers in die opbou na twee jaar gelede se Wêreldbeker oorweeg was.Republikein het hom in Junie 2019 gekontak om te verneem of Davies destyds na hom uitgereik het. Sy antwoord was soos volg:“Ja, ek was benader oor die Uruguay-toer wat onlangs plaasgevind het, en moontlik die groter oefengroep wat Wêreldbeker toe gaan as ek my kant as speler bring. “Ek sal altyd dankbaar wees vir die geleentheid wat ek gegee is, maar dit sou bots met Exeter se voorseisoen en as 'n ontwikkelende jong speler het ek die besluit geneem om vir nou eers my voete te vind in die klub deur deel van die voorseisoenkamp te wees. “Tans ervaar ek dit as 'n ongelooflike eer om by Exeter te speel en ek leer baie van die internasionale spelers by die klub. Ek het reeds baie in my spel gegroei en ek geniet die geleentheid wat ek kry om elke dag te doen waarvoor ek lief is. Dis 'n voorreg om my familie, Namibië en sy mense elke dag by Exeter te verteenwoordig.”Exeter is die heersende kampioenklub van beide Engeland en die Europese Kampioenebeker. SPENS VAN STUTTEDie Covid-19 era het Namibiese rugby met mening getref, wat sedert die 2019 Wêreldbeker nog geen behoorlike klub- óf internasionale wedstryde kon speel nie.Boonop moet die Rugby-unie sy proses van voor af begin om 'n volwaardige plaasvervanger vir Johan Diergaardt te vind, wat gedurende Desember as nasionale hoofafrigter bedank het.Wie ook al by hom oorneem, behoort sekerlik vir Aranos Coetzee van die Cheetahs as sy eerste keuse vaskop te hê. Op 32-jarige leeftyd is daar geen opsigtelike rede hoekom dié deurwinterde veteraan van die vorige twee Wêreldbekers nie ook by die veldtog om kwalifisering vir Frankryk 2023 betrokke sal wees nie.Nelius Theron (nou 24 jaar oud, Pukke en Luiperds), André Rademeyer (22, WP Akademie en Welwitschias), Desiderius Sethie (28, Universiteit van Namibië en Welwitschias) en AJ de Klerk (29, Wanderers en Welwitschias) was die ander vier stutte wat Davies se toergroep na Japan gehaal het en wat almal teoreties nog jonk genoeg is om weer deel van die Namibiese aanslag te wees.– andrew@republikein.com.naFOTOPatrick Schickerling teister Kenia op ’n stormloop in Maart 2018 se o.20-wedstryd in Windhoek. Foto Andrew Poolman

Belowende stut ontwikkel in Engeland

Kommentaar

Republikein 2025-12-22

Meld asseblief aan om kommentaar te lewer

Belowende stut ontwikkel in Engeland

Kommentaar

Republikein 2025-12-22

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.