Beloning vir inligting oor verlore beeste

‘n Boer in die Rehoboth-distrik is bereid om ‘n beloning uit te reik aan enigiemand met inligting wat kan help om sy verlore beeste op te spoor.

Mnr. Zimmy Schmidt van die plaas Plaas Y-worry, 60 km suidwes van Rehoboth, sê meer as 72 van sy beeste is oor ‘n tydperk van ‘n jaar en half gesteel.

“Ek sien net die gebreekte drade en ek kry nie die beeste op die plaas nie. Ek het in dié tydperk beeste ter waarde van N$700 000 verloor en hulle is net weg,” het Schmidt gesê.

Hy sê klagte is al verskeie kere by die polisie aanhangig gemaak, “maar hulle kry niks uitgerig nie”.

Die plaas is 4 300 hektaar groot en Schmidt sê dit is moeilik om spore in dié klipperige gebied te kry.

Hy sê van sy beeste het al teruggekeer met vreemde brandmerke wat bo-oor sy brandmerk gebrand is. Sy brandmerk is ‘n “M” wat op die sy lê met die bene na die linkerkant, ‘n “W” langsaan en onderaan ‘n “1”.



“Dit is nie net beeste wat verdwyn nie, maar ook skape en bokke. Oor ‘n tydperk van vyf jaar is daar niks meer van die 1 000 kleinvee oor nie,” het Schmidt gesê.

“Op een slag het groot troppe van onderskeidelik 94 en 25 kleinvee net weggeraak. Die veewagters is ook onbetroubaar.”

Schmidt sê sy buurplase, Tsarabes en Mudet, loop ook deur met ‘n buurman wat ook oor die tydperk van 'n jaar en ‘n half 82 beeste verloor het.

Schmidt versoek die publiek of boere in die omgewing wat sy beeste se brandmerk sien, om hom by 081 733 6262 te kontak, of sy broer Eagon by 085 522 0565.