Bekamping van bek-en-klou noodsaaklik

Elvira Hattingh“As ons nie die uitbreking van bek-en-klouseer in bedwang kan bring nie, sal Covid-19 se impak op die ekonomie in vergelyking met so ’n ramp soos ’n miniatuur Mickey Muis impak lyk.”Dit was die woorde van mnr. Piet Gouws, president van die Namibië Landbou-unie (NLU). Hy was een van die rolspelers wat Vrydag teenwoordig was toe toerusting vir die bestryding van bek-en-klouseer aan die direktoraat van veeartsenydienste (DVS) oorhandig is. Dr. Albertina Shilongo, hoofveeartsenybeampte van die direktoraat van veeartsenydienste (DVS), het gesê sedert die laaste geval van bek-en-klouseer op 30 Oktober in die Kavango-Wesstreek gediagnoseer is, het sowat ’n week verloop sonder dat enige verdere gevalle voorgekom het.“Die veeartsenybeamptes op die grond is tevrede met die situasie en voel die siekte is tans onder beheer,” het sy gesê en haar dank uitgespreek teenoor die rolspelers wat bydraes gemaak het. Feedmaster, Meatco, die Vleisraad en landbou-unies tel onder dié wat bydraes gelewer het.Sy het gesê intussen is 28 veeartsenybeamptes asook tydelike werkers in die Kavango-Oos- en -Wesstreek uitgestuur om vee in te ent, die beweging van vee en diereprodukte te bekamp en ook padblokkades op te stel. “Dit is om seker te maak die siekte versprei nie verder as die drie nedersettings in die Kavango-Oosstreek en die ander drie nedersettings in die Kavango-Wesstreek nie,” het sy gesê. Gouws het gesê landbouprodusente het opnuut, soos in 2015, aangedui dat hulle met die herstel van die veterinêre kordonheining sal help. “In 2015 is die hele heining herstel, in samewerking met die DVS asook verskeie rolspelers. Hierdie gaan alles oor ons uitvoerproduk – ons vleis,” het hy gesê.Mnr. Paul Strydom, hoofbestuurder van die Vleisraad van Namibië, het verduidelik talle rolspelers het bygedra tot die bekamping van die bek-en-klouseeruitbreking, wat insluit rantsoene vir personeel, sanitasiemiddels en -toerusting, toerusting vir padblokkades, die diens van talle voertuie, hulp met die herstel van grensdrade. Dit volg nadat Shilongo op 2 November tydens ’n noodvergadering met belangegroepe in die lewendehawe- en vleisbedryf gesê het hul steun hierin is “broodnodig”. Belangegroepe het toe aangedui hulle sal steun verleen in die vorm van rantsoene aan 200 personeellede, die verkryging van entstowwe, toerusting vir monitering en padblokkades, die herstel, monitor en onderhoudswerk van die veterinêre kordonheining, hulp met die diens van voertuie asook met vervoer van goedere tussen Windhoek en Rundu. Shilongo het verlede week aan Republikein gesê hulle vermoed die bron van die nuutste uitbreking is Angola, “want hul veeartsenyowerhede het aan ons bevestig bek-en-klouseer is ook gediagnoseer onder vee aan die oorkant van die rivier, waar die Namibiese beeste daagliks gaan wei,” het sy gesê. – elvira@republikein.com.na

Bekamping van bek-en-klou noodsaaklik

Kommentaar

Republikein 2025-06-18

Meld asseblief aan om kommentaar te lewer

Bekamping van bek-en-klou noodsaaklik

Kommentaar

Republikein 2025-06-18

Meld asseblief aan om kommentaar te lewer

MELD AAN

Advertensie