Bek-en-klouseer tref Kavango-Oosstreek

Elvira Hattingh - Die ministerie van landbou, water en bosbou het die uitbreking van bek-en-klouseer in die Kavango-Oosstreek bevestig. Dit het in die Hoha-nedersetting in die Ndiyona-kiesafdeling uitgebreek.

Volgens ‘n verklaring wat gister deur die ministerie uitgereik is, het die Sentrale Veterinêre Laboratorium (CVL) op 28 September dié diagnose bevestig.

Amptenare het bevestig dat 13 uit sowat 657 vee in ‘n drukgang by die nedersetting het positief vir bek-en-klouseer getoets. Die vee het uit agt van altesaam 23 krale in die nedersetting gekom.

Dit volg nadat boere in die bek-en-klouseer beskermde sone onlangs siek diere by die direktoraat van veeartsenydienste (DVS) aangemeld het, wat kliniese tekens van die siekte getoon het. Dit sluit in dat hulle kreupel geloop en gekwyl het.

Volgens die ministerie het die DVS toe onmiddelik ‘n ondersoek van stapel gestuur en monsters is vir toetsing versamel.

Van die beheermaatreels wat onmiddelik in werking gestel is, is ‘n verbod op die verslagting asook beweging van lewende vee met gesplete hoewe – tot en met verdere kennisgewing.

Dié vee mag nie binne of uit die bek-en-klouseer beskermde sone, oftewel na gebiede noord van die veterinêre kordonheining, beweeg nie. Die verbod geld vir beeste, skape, varke asook wilde diere.

Dit sluit egter die Zambezistreek asook die Mukwe-kiesafdeling in die Kavango-Oosstreek uit.

Terselfdertyd is geleenthede waartydens vee bymekaar gebring word, soos veilings, permitdae of skoue, gekanselleer. Die versameling van vee om teen die siekte ingeënt te word, word egter nog toegelaat.

Items wat die siekte kan versprei, soos velle, trofeë, gras en ander plantmateriaal mag ook nie uit die bek-en-klouseer beskermde sone beweeg nie.

Terselfdertyd verbied die regering die beweging van vee oor die Namibië-Angola-grens en sal padblokkades op strategiese punte aangebring word.