Bek-en-klouseer breek in SA se Limpopo-provinsie uit

Die Rooivleisprodusente-organisasie (RPO) in Suid-Afrika sê bevestiging deur die departement van landbou, bosbou en visserye dat ’n geval van bek-en-klouseer in die Molemole-distrik van Limpopo geïdentifiseer is, wek groot kommer.
"Dit het nie net ‘n negatiewe uitwerking op die rooivleisbedryf nie, maar ook op die landbousektor as ‘n geheel," sê die RPO in 'n verklaring wat pas uitgereik is.

"Ná die uitbreking in Januarie 2019 is daar hard gewerk om Suid-Afrika se status bek-en-klouseer vrye sone te herstel. Dié jongste verwikkeling is ‘n ernstige terugslag. Dit is noodsaaklik dat die omvang van die probleem dringend bepaal word."

Die RPO sê dié uitbreking onderstreep weer eens die noodsaaklikheid van ‘n naspeurbaarheidstelsel in die lewendehawebedryf in die buurland.

Hoewel die direktoraat veeartsenydienste in Namibië nog nie 'n verklaring uitgereik het oor stappe wat gedoen gaan word om die plaaslike bedryf te beskerm nie, is dit standaard praktyk om die grens vir sekere invoere te sluit.

Een van die produkte wat geraak kan word, is gebaalde ruvoer vir vee.

Foto ter illustrasie