Bejaardes besoek Suid-Afrika

Maria Eiseb - Sowat 65 bejaardes uit verskillende streke het onlangs 'n week lank in Suid-Afrika getoer. Dit danksy 'n liefdadigheidsprojek vir bejaardes op Usakos. Volgens een van die toerorganiseerders, die gemeenskapsaktivis mnr. Sikiza ||Geiseb, is daar twee jaar lank aan dié toer beplan. Volgens ||Geiseb is die bejaardes in 2014 vir 'n uitstappie na die Etosha Nasionale Park geneem. Met hul terugkeer het hulle gesê hulle wil ook Robbeneiland in Suid-Afrika besoek. ||Geiseb het belowe om hul droom 'n werklikheid te maak. “Dit het ons twee jaar gevat om die toer te reël. Ons het nie baie skenkings hiervoor gekry nie,” het ||Geiseb gesê.Volgens hom word van die bejaardes nie deur hul kinders ondersteun nie en wou die gemeenskap 'n organisasie stig om senior burgers te laat voel hulle is iets werd in hul onderskeie gemeenskappe. Die groepie bejaardes het in Drakenstein in die Wes-Kaap gebly - 'n voormalige tronk wat in 'n selfversorgingsoord omskep is. Hulle was glo so opgewonde oor die toer dat hulle soms “selfs vergeet het om te eet”. Me. Katrina Oosthuizen (69) van Usakos het die bejaardes se tyd in die Kaap as baie aangenaam beskryf en gesê dit was die eerste keer dat sy op 'n boot was. “Ons het per boot na Robbeneiland gereis en dit was vir my baie besonders.”Sy spog met 'n nuwe handsak wat sy by 'n vlooimark gekoop het en sê dit sal haar altyd aan hul toer herinner. Vir me. Magreth Boois (63) van Khorixas was die bootrit ook besonders. Sy het ook die groep se besoek aan Andimba Toivo ya Toivo en die voormalige Suid-Afrikaanse staatspresident, Nelson Mandela, se selle uitgesonder.“Die komberse en goed wat die manne destyds in die tronk gebruik het, is steeds daar. Die plekke wat ons besoek het, was besonders. Veral toe ons met die kabelkar tot bo-op Tafelberg gereis het. Ek kon nie glo ons was 1 072 m hoog in die lug nie!” Volgens ||Geiseb het die bejaardes tydens hul toer die adjunkminister van finansies, mnr. Natangue Ithete, in die Paarl raakgeloop. “Toe hy die bus met die Namibiese nommerplaat sien, het hy teruggedraai om te kyk wie in die bus was. Hy het met die passasiers gaan gesels. Die minister was beïndruk met wat ons doen en dat bejaardes betrek word. Hy het ook vir ons iets gegee om die bejaardes mee te bederf.”Die organiseerders het hul dank aan hul borge uitgespreek. Dit sluit in Omaruru Fishing, mnre. Hermanus Kasper, Nakathingo Shivute, Andrew Ndeyanayi, Gotfried Rheiss, mnr. Saul Habeb van Uibasen-dienste, mnr. Jacob Naoxab en me. Emma ‡Naoxas, eienaar van die Big Bother-gastehuis op Usakos, mnr. Dido !Gonteb, mnr. Charles |Urib en me. Shirley |Uris, Karibib OK, mee. Justine Hambili, Riana Van der Bun |Uises, Adele Hawaes en mnr. Davie ‡Nuseb. Vir die bejaardes se volgende toer word 'n besoek aan die Victoria-valle of aan Botswana beplan.

Bejaardes besoek Suid-Afrika

Kommentaar

Republikein 2026-01-12

Meld asseblief aan om kommentaar te lewer

Bejaardes besoek Suid-Afrika

Kommentaar

Republikein 2026-01-12

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.