Bejaarde op Henties dood ná aanranding

Henriette Lamprecht – ’n Bejaarde inwoner van Hentiesbaai, die 83-jarige Carel Johannes Thomas, is na bewering Sondag wreed met ’n hark en moersleutel oor sy kop en liggaam aangerand. Hy het later in die Cottage-hospitaal op Swakopmund aan sy beserings beswyk. Volgens die woordvoerder van die Namibiese polisie in die Erongostreek, adj.komm. Erastus Iikuyu, het die voorval tussen 20:00 Sondag en Maandag omstreeks 15:40 in sy huis in Oranjestraat gebeur.Volgens Iikuyu is Thomas Maandagbewusteloos in sy sitkamer gekry. ’n Vriend kon hom nie op sy selfoon bereik nie en het iemand gestuur om ondersoek te gaan instel. Na bewering het die boewe terwyl Thomas nie tuis was nie, die meeste van sy huis se vensters en ’n deur gebreek, maar kon weens diefwering nie toegang tot die huis kry nie. Iikuyu sê met Thomas se aankoms by die huis, vermoedelik Sondagaand, is hy aangeval en die boosdoeners het toegang tot die huis verkry. ’n Pistool, ’n geweer en ’n televisie is onder meer gebuit. Thomas is in ’n kritieke toestand na die Cottage-hospitaal vervoer, waar hy aan sy beserings beswyk het. Niemand is nog in hegtenis geneem nie. Enige persoon met inligting oor die voorval kan vir Iikuyu by 081 246 4757, adj.insp. Daniel Gurirab by 081 233 3745 of speuradj. Sacky Shikalepo by 081 273 5662 skakel.– henriette@republikein.com.na

Bejaarde op Henties dood ná aanranding

Kommentaar

Republikein 2025-09-10

Meld asseblief aan om kommentaar te lewer

Bejaarde op Henties dood ná aanranding

Kommentaar

Republikein 2025-09-10

Meld asseblief aan om kommentaar te lewer

MELD AAN

Advertensie