Beheerraad skop vas oor twee geskorste oudlede
'n Regstreekse opdrag van die minister is klaarblyklik verontagsaam.
Andrew Poolman - Die Namibiese Professionele Boks- en Stoeibeheerraad (NPBWCB) is nie gereed om sommerso twee geskorste raadslede weer aan te stel of te betaal nie, ondanks oproepe deur politici en selfs 'n regstreekse opdrag van die minister van sport, mnr. Erasmus Utoni.
Vuil wasgoed het gister na vore gekom toe die Beheerraad op 'n nuuskonferensie aan die media onthul het dat mnre. Eckard Modise en Joe Kaperu in die afgelope maande vanweë geldverwante misdrywe geskors is.
Die nuuskonferensie was in regstreekse reaksie op aantygings en openbare eise wat die Swapo-politikus en voormalige NPBWCB-raadslid Ambrosius Kandjiii tydens 'n sessie van die Nasionale Raad hieroor gemaak het.
Kandjii het glo onder meer gesê Kaperu en Modise se dienste is beëindig sonder dat hulle verhoor is, asook dat etniese verskille die ware oorsaak was. Hy het ook 'n beroep op minister Utoni gedoen om die Beheerraad se sake ernstig te laat ondersoek, nadat die Beheerraad nie gehoor gegee het aan die opdrag dat die twee administrateurs in hul poste herstel moet word nie.
Namens die Beheerraad het sy woordvoerder, mnr. Ronald Kurtz, gister gesê Kaperu was van bedrog aangekla en geskors, waarna 'n verhoor plaasgevind het.
“Kaperu is skuldig bevind en op aanbeveling van 'n onafhanklike dissiplinêre paneel is sy dienste beëindig (Julie 2017). Kaperu het appèl aangeteken (November 2017), maar die appèl is verwerp (in Desember).”
Kurtz het gesê Modise is ook van oneerlikheid en die verduistering van geld beskuldig. Ná 'n verhoor en skuldigbevinding in Februarie vanjaar is hy ook afgedank.
“Die Beheerraad het inderdaad 'n kriminele klag teen hom ingedien en die saak is nog hangend. Mnr. Modise het nie appèl aangeteken, óf by die Arbeidshof 'n saak ingedien dat hy onregmatig afgedank is nie.”
Kurtz en sy mederaadslid mnr. Ellison Hijarunguru het gesê die Beheerraad se siening is dat Kandjii die parlementêre vryheid van spraak misbruik het om dié sake op 'n nasionale platform na vore te bring.
“Kandjii se aantygings is onwaar en is dalk doelbewus daarop gemik om die wetmakers en die publiek te mislei.
“Net Kandjii weet wat sy spesifieke belang in die twee manne se saak is. Ons wil ook uitwys dat Kandjii 'n lid van die vorige Beheerraad was, wie se aktiwiteite tans die onderwerp van 'n ondersoek deur die Teenkorrupsiekommissie (ACC) is.”
LANG AANLOOP
Die omstredenheid oor Kaperu dateer reeds uit verlede jaar toe mnr. Jerry Ekandjo nog die sportminister was.
Sy opvolger, mnr. Erastus Utoni, het op 20 Maart vanjaar 'n brief aan die Boksbeheerraad gestuur waarin hy Modise se dissiplinêre verhoor ongeldig verklaar. Utoni het opdrag gegee dat Modise ten volle vergoed moet word vanaf die datum van sy skorsing totdat die ondersoek afgehandel is.
Utoni het ook aangedring dat stappe vir 'n “regverdige verhoor” vir Modise moet begin.
Gister het Kurtz gesê die Beheerraad het met die minister in verbinding getree om uitklaring te kry oor hoekom die regsproses wat hulle gevolg het, as nietig beskou word.
“Ons wag nog op terugvoering van die minister,” het hy gesê.
Vuil wasgoed het gister na vore gekom toe die Beheerraad op 'n nuuskonferensie aan die media onthul het dat mnre. Eckard Modise en Joe Kaperu in die afgelope maande vanweë geldverwante misdrywe geskors is.
Die nuuskonferensie was in regstreekse reaksie op aantygings en openbare eise wat die Swapo-politikus en voormalige NPBWCB-raadslid Ambrosius Kandjiii tydens 'n sessie van die Nasionale Raad hieroor gemaak het.
Kandjii het glo onder meer gesê Kaperu en Modise se dienste is beëindig sonder dat hulle verhoor is, asook dat etniese verskille die ware oorsaak was. Hy het ook 'n beroep op minister Utoni gedoen om die Beheerraad se sake ernstig te laat ondersoek, nadat die Beheerraad nie gehoor gegee het aan die opdrag dat die twee administrateurs in hul poste herstel moet word nie.
Namens die Beheerraad het sy woordvoerder, mnr. Ronald Kurtz, gister gesê Kaperu was van bedrog aangekla en geskors, waarna 'n verhoor plaasgevind het.
“Kaperu is skuldig bevind en op aanbeveling van 'n onafhanklike dissiplinêre paneel is sy dienste beëindig (Julie 2017). Kaperu het appèl aangeteken (November 2017), maar die appèl is verwerp (in Desember).”
Kurtz het gesê Modise is ook van oneerlikheid en die verduistering van geld beskuldig. Ná 'n verhoor en skuldigbevinding in Februarie vanjaar is hy ook afgedank.
“Die Beheerraad het inderdaad 'n kriminele klag teen hom ingedien en die saak is nog hangend. Mnr. Modise het nie appèl aangeteken, óf by die Arbeidshof 'n saak ingedien dat hy onregmatig afgedank is nie.”
Kurtz en sy mederaadslid mnr. Ellison Hijarunguru het gesê die Beheerraad se siening is dat Kandjii die parlementêre vryheid van spraak misbruik het om dié sake op 'n nasionale platform na vore te bring.
“Kandjii se aantygings is onwaar en is dalk doelbewus daarop gemik om die wetmakers en die publiek te mislei.
“Net Kandjii weet wat sy spesifieke belang in die twee manne se saak is. Ons wil ook uitwys dat Kandjii 'n lid van die vorige Beheerraad was, wie se aktiwiteite tans die onderwerp van 'n ondersoek deur die Teenkorrupsiekommissie (ACC) is.”
LANG AANLOOP
Die omstredenheid oor Kaperu dateer reeds uit verlede jaar toe mnr. Jerry Ekandjo nog die sportminister was.
Sy opvolger, mnr. Erastus Utoni, het op 20 Maart vanjaar 'n brief aan die Boksbeheerraad gestuur waarin hy Modise se dissiplinêre verhoor ongeldig verklaar. Utoni het opdrag gegee dat Modise ten volle vergoed moet word vanaf die datum van sy skorsing totdat die ondersoek afgehandel is.
Utoni het ook aangedring dat stappe vir 'n “regverdige verhoor” vir Modise moet begin.
Gister het Kurtz gesê die Beheerraad het met die minister in verbinding getree om uitklaring te kry oor hoekom die regsproses wat hulle gevolg het, as nietig beskou word.
“Ons wag nog op terugvoering van die minister,” het hy gesê.
Kommentaar
Republikein
Geen kommentaar is op hierdie artikel gelaat nie