Begunstigdes seëvier in Rössing-pensioensaak

Jacqueline Louw - ’n Geskatte 10 000 mense word geraak deur die oorwinning wat aansoekers gister teen ’n besluit oor die herverdeling van ’n surplus van sowat N$450 miljoen aan lede van die Rössing-pensioenfonds behaal het.Die aansoek is deur 75 voormalige lede ingedien.Regter Shafimana Ueitele het bevind dat die verandering wat aan die pensioenfonds se reëls aangebring is om die bykomende geld te herverdeel, onregmatig gedoen is.Beide die fonds en Rössing het reeds verlede jaar en in Februarie vanjaar tydens die verhoor erken dat die besluit oor die toekenning en verspreiding van die surplusgeld dié van Rössing was, maar het ontken dat sodanige besluit ’n oortreding van die pensioenfonds se reëls was.Dit is tydens die verhoor gestel dat dit ’n aanvaarde beginsel van die openbare reg is dat ’n diskresionêre mag van een instansie nie deur ’n ander oorgeneem mag word nie, selfs al oefen die instansie met sodanige mag beklee nie sy regte uit nie. ’n Besluit namens ’n instansie wat deur ’n ander entiteit geneem is, is dus onregmatig en ongeldig.Die formule vir die verspreiding van die geld wat aanvanklik deur die trustees goedgekeur was, bepaal dat een derde onderskeidelik aan elk van die huidige lede, voormalige lede en aan Rössing betaal moes word. Rössing, wat as werkgewer ’n besluit oor die aanbeveling moes maak, het egter die deel van huidige lede tot 52 persent verhoog en voormalige lede se toegif na 15 persent verminder.Senior advokaat Norman Arendse, wat namens die aansoekers opgetree het, het tydens die verhoor aangevoer die proses waarvolgens die verdeling bepaal is, was onwettig omdat die deurslaggewende besluit deur Rössing geneem is en nie deur die trustees van die fonds nie.Die regter het bevind die trustees het nie hulle eie diskresie uitgeoefen nie en het bloot as ’n “rubberstempel” vir Rössing opgetree. Volgens Ueitele het Rössing die besluit voorgeskryf.Die herverdelingsbesluit is hierom nietig verklaar. Die verweerders was die Rössing Pensioenfonds, Rössing, die registrateur van pensioenfondse en die minister van finansies. Indien nie een van hulle teen die uitspraak appelleer nie, sal die trustees ’n nuwe formule vir die verspreiding van oorskotgeld moet bepaal.Advokaat Werner Boesak het vir Arendse bygestaan. Senior advokaat Andrew Corbett het die pensioenfonds verteenwoordig en mnr. At Slabber het vir Rössing verskyn.

Begunstigdes seëvier in Rössing-pensioensaak

Kommentaar

Republikein 2026-08-04

Meld asseblief aan om kommentaar te lewer

Begunstigdes seëvier in Rössing-pensioensaak

Kommentaar

Republikein 2026-08-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.