Begraafplaas uit sy nate

Tanja Bause – By die Gammams begraafplaas in Pionierspark word Covid-19-grafte nou gegrawe in die paadjie wat tussen die grafte en die grensdraad loop. Ook die blombedding in die middel van die begraafplaas word nou gebruik om mense wat in die coronaviruspandemie dood is, ter ruste te lê. Intussen het mnr. Harold Akwenye, 'n woordvoerder vir die munisipaliteit, bevestig die krematorium is opnuut buite werking. “'n Waaier het op 4 Julie by die krematorium gebreek en dit is dus buite werking. Tegnikusse is tans druk besig om die probleem so vinnig as moontlik te probeer op te los,” het hy gesê. Volgens die woordvoerder van die munisipaliteit, me. Lydia Amutenya, is daar vir nou nog genoeg plek by die verskillende begraafplase.Die munisipaliteit is in Windhoek vir die begraafplase van Katutura, Oponganda, Khomasdal, Gammams en Ou Lokasie verantwoordelik. Volgens 'n kontrakteur wat vir die uitgrawing van grafte deur die munisipaliteit van Windhoek aangestel is, het sy werkers in Junie 118 grafte by die Gammams begraafplaas gegrawe. “Dié getal sluit nie mense in wat bo-op hul geliefdes begrawe word nie. As ons die opgestapelde grafte bytel, sal ons op tussen 125 en 130 grafte kom. Vir die twee weke sover in Julie het ons reeds oor die 100 gegrawe,” het hy gesê. Saam met die grafte wat sy werkers by die Khomasdal begraafplaas gegrawe het, is dit 182 vir die twee begraafplase en 70 wat by die Katutura en Opanganda begraafplaas gegrawe is. “Hier is gemiddeld sowat 15 begrafnisse per dag. Dit is nie meer net oor naweke wat geliefdes begrawe word nie. “Die munisipaliteit het nou 'n ooreenkoms met die begrafnisondernemers aangegaan dat hulle probeer om nie op 'n Maandag of Dinsdag begrafnisse te reël nie. Dit gee ons kans om die grafte te grawe. Dit het begin 'n probleem raak met al die begrafnisse en familielede terwyl ons met vier graafmasjiene hier werk. Dit is ook vir ons nie aangenaam om te werk terwyl daar 'n begrafnis gehou word nie, maar ons móét werk, anders raak ons agter. “So, ek vra maar die families om verskoning en ons probeer om dan eers op 'n ander plek te werk as ons voel ons is te indringerig naby aan die mense wat afskeid neem.“Dit is skokkend hoe die sterftes toeneem. Dit werk op 'n mens, emosioneel en psigologies,” het hy gesê. Volgens hom het hulle in vorige maande gemiddeld 30 grafte gegrawe. Volgens mnr. Richard Benade het hy weens die agterstand Vrydag begin help met die uitgrawing van grafte.“Ons grawe die gat en daar word byna onmiddellik iemand daar begrawe. Ons het sedert Vrydag reeds 45 gegrawe. Ons grawe ook op Saterdae en Sondae. Ons moet nou 132 hier teen die grensdraad teenaan die hoofpad grawe – alles net vir Covid-19-sterftes. Mense moet begin voorsorg tref en hulleself oppas.”KREMATORIUM Volgens 'n WhatsApp en 'n e-pos wat lesers aan die koerant gestuur het, is die stad se krematorium opnuut buite werking. “My skoonseun is op 21 Junie weens Covid-19 oorlede en nie sy weduwee óf sy kinders weet wanneer die verassing kan plaasvind nie, omdat die krematorium weer stukkend is,” lui die e-pos. Die WhatsApp-skrywer sê: “My man lê nou al vir meer as twee maande en wag om veras te word.”Die kontrakteur het gesê gedurende Junie is elke dag (insluitend oor naweke) vier tot vyf mense veras. “Ek sê nie dis almal Covid-19-sterftes nie, maar as net twee per dag Covid-sterftes was, het ons in Junie 60 mense weens Covid veras,” het hy gesê. – tanja@republikein.com.naFOTO’sMense word nou in die hoof blombedding by die Gammams begraafplaas in Pionierspark begrawe. Foto Tanja BauseGrafte word gegrawe in die paadjie wat tussen die laaste grafte en die grensdraad geloop het. Foto Tanja Bause

Begraafplaas uit sy nate

Kommentaar

Republikein 2026-02-05

Meld asseblief aan om kommentaar te lewer

Begraafplaas uit sy nate

Kommentaar

Republikein 2026-02-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.