Bedryf besorg oor afknouery van toeriste
Die toerismebedryf is bekommerd die bedreigings teen burgerlikes – hetsy Namibiese burgers of internasionale gaste – kan Namibië se beeld as ’n veilige en vreedsame reisbestemming ernstige skade berokken.
Ellanie Smit – Terwyl die regering landsburgers vra om kalm te bly na aanleiding van ’n reeks voorvalle waar Namibiërs glo deur die Botswana-weermag (BDF) geteiken is, vrees toeroperateurs die situasie kan ’n verwoestende impak op die reeds kwesbare toerismebedryf hê.
In die mees onlangse voorval twee naweke gelede is ’n groep van 17 toeriste deur BDF-soldate op die Choberivier in die Zambezistreek aangesê om te “f***off” terwyl die soldate gelaaide militêre vuurwapens op hulle en hul twee skippers gerig het.
Tydens die voorval op 8 Mei het twee bote van die Chobe Camp River Lodge toeriste op ’n bootvaart geneem om wild te besigtig. Sewe Suid-Afrikaanse toeriste en tien Namibiërs, saam met die twee skippers, was aan boord.
Die uitvoerende hoof van die Gasvryheidsvereniging van Namibië (HAN), me. Gitta Paetzold, het verlede week aan Republikein se susterkoerant Namibian Sun gesê die situasie in die Zambezi is “uiters kommerwekkend”.
“Enige vorm van bedreigings van geweld of wapens teen burgerlikes – hetsy Namibiese burgers of internasionale gaste – doen ernstige skade aan Namibië se beeld as ’n veilige en vreedsame reisbestemming.”
Sy het gesê wetstoepassers, hetsy die polisie of weermag, moet ideaal beskou word as vriende en helpers wat veiligheid en sekuriteit bied – nie as ’n bedreiging vir mense om vrylik te beweeg nie.
Paetzold het gesê sedert die BDF-skietvoorval verlede jaar waarin vier Namibiërs hul lewens verloor het, is daar rede tot kommer oor die veilige gebruik van die waterweë, veral die Choberivier wat Namibië en Botswana skei en aan weerskante ’n aantal gewilde lodges en toeriste-aantreklikhede huisves.
GEDRAGSKODE
“Die twee lande bespreek nou al jare lank ’n gedragskode vir die gebruik van die Choberivier vir alle kommersiële en sosiale doeleindes, insluitend toerisme.
Dit is van uiterste belang dat hierdie proses voortgesit en voltooi word, ook met die oog op die Kavango-Zambezi-oorgrensbewaringsgebied (Kaza TFCA) as ’n toerisme-inisiatief wat beloof om een van die wêreld se grootste multinasionale toeriste-aanloklikhede te wees.”
Vir dié inisiatief om te slaag, is ’n vreedsame, multinasionale verbintenis tot en samewerking oor veilige en gerieflike rivierkruisings en die gebruik van die waterweë van kardinale belang, het Paetzold gesê.
“Operateurs van alle lande in die gebied werk nou saam om ’n gerieflike en unieke toerisme-ervaring vir gaste in dié pragtige deel van Afrika te bewerkstellig. Ons kan net hoop die onderskeie regerings en leiers sien die behoefte raak vir ’n gemeenskaplike en vreedsame benadering tot die administrasie van die gedeelde bates, soos riviere en waterweë.”
MINISTERIE DOODSTIL
Intussen het die ministerie van die omgewing, bosbou en toerisme nog nie ’n woord gerep oor die onlangse konfrontasie tussen Namibiese toeriste en BDF-soldate nie.
Die minister, mnr. Pohamba Shifeta, het verlede week gesê hy sal nie kommentaar lewer oor die voorval totdat ’n volledige verslag oor die gebeure van dié dag beskikbaar is nie.
Die woordvoerder van die ministerie, mnr. Romeo Muyunda, het dié stelling beaam.
Shifeta het gesê die ministerie wag op amptelike verslae voordat hulle ’n verklaring uitreik. – [email protected]
In die mees onlangse voorval twee naweke gelede is ’n groep van 17 toeriste deur BDF-soldate op die Choberivier in die Zambezistreek aangesê om te “f***off” terwyl die soldate gelaaide militêre vuurwapens op hulle en hul twee skippers gerig het.
Tydens die voorval op 8 Mei het twee bote van die Chobe Camp River Lodge toeriste op ’n bootvaart geneem om wild te besigtig. Sewe Suid-Afrikaanse toeriste en tien Namibiërs, saam met die twee skippers, was aan boord.
Die uitvoerende hoof van die Gasvryheidsvereniging van Namibië (HAN), me. Gitta Paetzold, het verlede week aan Republikein se susterkoerant Namibian Sun gesê die situasie in die Zambezi is “uiters kommerwekkend”.
“Enige vorm van bedreigings van geweld of wapens teen burgerlikes – hetsy Namibiese burgers of internasionale gaste – doen ernstige skade aan Namibië se beeld as ’n veilige en vreedsame reisbestemming.”
Sy het gesê wetstoepassers, hetsy die polisie of weermag, moet ideaal beskou word as vriende en helpers wat veiligheid en sekuriteit bied – nie as ’n bedreiging vir mense om vrylik te beweeg nie.
Paetzold het gesê sedert die BDF-skietvoorval verlede jaar waarin vier Namibiërs hul lewens verloor het, is daar rede tot kommer oor die veilige gebruik van die waterweë, veral die Choberivier wat Namibië en Botswana skei en aan weerskante ’n aantal gewilde lodges en toeriste-aantreklikhede huisves.
GEDRAGSKODE
“Die twee lande bespreek nou al jare lank ’n gedragskode vir die gebruik van die Choberivier vir alle kommersiële en sosiale doeleindes, insluitend toerisme.
Dit is van uiterste belang dat hierdie proses voortgesit en voltooi word, ook met die oog op die Kavango-Zambezi-oorgrensbewaringsgebied (Kaza TFCA) as ’n toerisme-inisiatief wat beloof om een van die wêreld se grootste multinasionale toeriste-aanloklikhede te wees.”
Vir dié inisiatief om te slaag, is ’n vreedsame, multinasionale verbintenis tot en samewerking oor veilige en gerieflike rivierkruisings en die gebruik van die waterweë van kardinale belang, het Paetzold gesê.
“Operateurs van alle lande in die gebied werk nou saam om ’n gerieflike en unieke toerisme-ervaring vir gaste in dié pragtige deel van Afrika te bewerkstellig. Ons kan net hoop die onderskeie regerings en leiers sien die behoefte raak vir ’n gemeenskaplike en vreedsame benadering tot die administrasie van die gedeelde bates, soos riviere en waterweë.”
MINISTERIE DOODSTIL
Intussen het die ministerie van die omgewing, bosbou en toerisme nog nie ’n woord gerep oor die onlangse konfrontasie tussen Namibiese toeriste en BDF-soldate nie.
Die minister, mnr. Pohamba Shifeta, het verlede week gesê hy sal nie kommentaar lewer oor die voorval totdat ’n volledige verslag oor die gebeure van dié dag beskikbaar is nie.
Die woordvoerder van die ministerie, mnr. Romeo Muyunda, het dié stelling beaam.
Shifeta het gesê die ministerie wag op amptelike verslae voordat hulle ’n verklaring uitreik. – [email protected]
Kommentaar
Republikein
Geen kommentaar is op hierdie artikel gelaat nie