Bedreigde groenseeskilpaaie broei dalk by Skedelkus

Elvira Hattingh – ’n Eerste rekord van ’n bedreigde groenseeskilpad (Chelonia mydas) wat langs die Namibiese kus nesmaak, word as van groot wetenskaplike waarde beskou, selfs hoewel die eiers eindelik nié uitgebroei het nie.‘n Navorsingsartikel hieroor is vroeër vandeesmaand deur die navorsers Peter Cunningham en Johan van Rooyen in die Namibian Journal of Environment publiseer.Op 4 Februarie vanjaar is geskiedenis gemaak toe ’n groenseeskilpadwyfie omstreeks 17:00 langs die Skedelkus deur Van Rooyen gekiek is, waar sy besig was om haar nes toe te maak. Sy was sowat 1 meter lank en was ‘n halfuur lank besig, voordat sy terug see toe beweeg het. Die navorsers sê klein skilpadjies broei gewoonlik 54 tot 74 dae later uit. “Op 3 Mei 2020 – 89 dae nadat die eiers gelê is – is die nes gedeeltelik oopgemaak en eiers is daarbinne aangetref. Dit was dus vyf maande later en ongelukkig het die eiers nie uitgebroei nie.”Die navorsers sê groenseeskilpaaie is daarvoor bekend dat hulle onder soortgelyke koue toestande in Chili broei. Die koue temperatuur langs die Namibiese kus en die feit dat die nes af en toe tydens hoogwater oorspoel het en nat gelaat is, het waarskynlik die ontwikkeling van die eiers belemmer, meen die navorsers. “Daar was voorheen baie bespiegeling of hulle werklik langs die Namibiese kus broei. Die meeste navorsers dui aan dat groenseeskilpaaie nie daarvoor bekend is dat hulle langs die Skedelkus broei nie, maar wel soms hul verskyning op dié strand maak om in die son te kom bak,” verduidelik die navorsers in hul artikel.Daar is relatief min broeiplekke vir groenseeskilpad langs die oostelike Atlantiese kus, met die mees prominente broeiplekke in Guinee-Bissau in Wes-Afrika, terwyl ‘n kleiner aantal groenseeskilpaaie ook op die Bioko-eiland, Gaboen en in die provinsies Cabinda en Namibe in Angola broei – net noord van die Kunenerivier.Groenseeskilpaaie is ’n beskermde spesie in Namibië en word deur die Internasionale Unie vir Natuurbewaring (IUCN) as bedreig geklassifiseer, omdat hul bevolking voortdurend krimp en hul broeiplekke oraloor versteur word.

Bedreigde groenseeskilpaaie broei dalk by Skedelkus

Kommentaar

Republikein 2025-09-17

Meld asseblief aan om kommentaar te lewer

Bedreigde groenseeskilpaaie broei dalk by Skedelkus

Kommentaar

Republikein 2025-09-17

Meld asseblief aan om kommentaar te lewer

MELD AAN

Advertensie