Beatrice op peil vir toekoms
Atletiek
Tielman van Lill – Die 17-jarige naelloper Beatrice Masilingi van Grootfontein sou vanaf 7 tot 12 Julie by die IAAF o.20-wêreldkampioenskap in Nairobi, Kenia, in die 200 en 400 meter aangetree het.
Skaars drie weke nadat die embleem vir die kompetisie op 5 Maart in Kenia bekendgestel is, moes die organiseerders die belangrike byeenkoms soos alle ander internasionale sportgeleenthede vanweë die coronaviruspandemie tot 'n onbepaalde datum uitstel.
Wêreldatletiek (tevore die IAAF) het op 24 Maart op sy webblad gesê hy werk nou saam met alle betrokke partye om 'n alternatiewe datum te vind wat die Keniaanse regering en elite atlete sal pas.
Die 2020 Statebondjeugspele is in dieselfde bootjie. Datums so ver as Julie 2023 word vir dié spele oorweeg.
Masilingi is tans 'n leerder by Grootfontein Agri-kollege en word deur mnr. Henk Botha op dié noordedorp afgerig. Sy sou nie vanjaar aan die jeugspele deelgeneem het nie. Haar visier was op die o.20 wêreldkampioenskap ingestel.
Botha was tot onlangs vol vertroue dat Masilingi binnekort die magiese grense sou oorsteek om vir die 2021 Olimpiese Spele in Tokio te kwalifiseer. Met beide elite byeenkomste egter van die baan, is dié beplanning heeltemal omver gewerp.
Botha sê: “Ons mikpunt bly die Olimpiese Spele wat tot volgende jaar Julie en Augustus uitgestel is. Indien kompetisies in 2020 plaasgevind het soos dit moes, glo ek steeds dat sy vir Tokio sou kwalifiseer.
“Al haar prestasies en aanduiders sover lyk belowend. Beatrice was en is steeds uitstekend op dreef. Sy is 'n ongelooflike gedissiplineerde en harde werker. Ewe belangrik is dat sy in haarself en vermoëns glo.
“Sy is 'n beskeie en intelligente meisie, maar sy het die wil om te wen en te presteer. Onder omstandighede is sy steeds gefokus en doen die oefeninge, al is dit hoe hard en moeilik om vol te hou.
“Op die oomblik kan sy nie in 'n gimnasium oefen nie en daar is ook nie 'n atletiekbaan beskikbaar nie. Dus hardloop sy tuis op 'n gelyk stuk grond wat tot tyd en wyl as plaasvervanger moet dien. Gimnasiums bly nog gesluit, dus gebruik ons maar tuis krag- en tegniekoefening en ander maniere om haar sterk te hou.
“Ek vertrou daar sal voor die 2021 Spele in Tokio kompetisies wees waar sy in die 200 en 400 kan kwalifiseer.
“Ons onmiddellike mikpunt was natuurlik Nairobi, maar tot nou het ons nog niks hieroor van Wêreldatletiek gehoor nie. Beatrice kan nie ophou oefen nie. Dit neem jare om 'n 400-atleet behoorlik te kweek.
“Ons het hard gewerk om Beatrice die nommer een 200- en 400-atleet in Namibië te maak. Onder omstandighede bly sy positief; haar peil is tans uitstekend en dit maak my geweldig trots op haar.
“Beatrice sou vanjaar bloot aan die Olimpiese Spele deelgeneem het om ondervinding op te doen. Al die grootste name moes eers leer kruip alvorens hulle die wêreld op die atletiekbaan kon oorrompel.
“Die 2022 senior Statebondspele in Birmingham, Engeland, is ons volgende mikpunt. Die idee is dat sy daar as 19-jarige ernstig aanspraak op 'n plek in die finale maak. 'n Mens hoop natuurlik op 'n medalje, maar dit is nie die einde indien dit nie gebeur nie.
“Indien sy in Birmingham wel die podium haal, sal die wêreld beslis van haar begin kennis neem. Sy moet natuurlik eers haar skoolloopbaan suksesvol voltooi voordat sy oorsee kan gaan. Daar is internasionale afrigters wat glad nie mensgeoriënteerd is nie en maklik 'n jong atleet se lewe binne 'n paar maande kan verwoes.
“Sy het beslis 'n blink toekoms, maar haar loopbaan sal fyn bestuur moet word om te sorg dat sy in die regte hande beland. Ek is regtig bevoorreg om met haar te kan werk. As Beatrice vandag vir die 400 in 'n kompetisie moet aantree, glo ek sy sal gemaklik onder 52 sekondes draai.
“Hoekom sê ek sy het 'n blink loopbaan voor haar? By die senior Afrika-spele verlede jaar het sy as 16-jarige die 400-finaal gehaal en algeheel sewende geëindig. Daar is wel uitdagers soos Oifili Chukwuka (17) van Kenia en Moroko Galefele (Botswana) wat goeie kompetisie vir haar is,” verduidelik Botha.
Galefele (22) het verlede jaar as senior 51.30 sekondes in die 400 aangeteken, terwyl Chukwuka 51.86 behaal het. Beatrice se 52.19 wat sy in Maart as 16-jarige op seevlak in Swakopmund behaal het, is tans die vinnigste o.20-tyd in die wêreld.
Sy word gevolg deur Ellie Beer (52.70 in Februarie) van Australië en Oneika McAnnuff (52.78, Februarie) van Jamaika. Hierdie topposisie as nommer een in die wêreld, maak Beatrice 'n gesogte bemarkingsatleet wat vir die regte borg wag.
REKORDTEIKENS
Masilingi sê: “My droom is om een van die beste vroue-atlete in die geskiedenis ter wêreld te word. Ek wil my pragtige Namibië op die hoogste moontlike vlakke verteenwoordig, wat die Olimpiese Spele en wêreldkampioenskap is.
“Ek en my afrigter se plan was om vanjaar ondervinding by die Olimpiese Spele op te doen en blootstelling te kry. Die spele se uitstel tot volgende jaar werk beslis in my guns. Ek het 12 maande verniet bygekry om my vir die groot dag in Japan voor te berei.
“My afrigter en ek werk tans baie hard en onverpoos vir internasionale byeenkomste wat intussen nog moet plaasvind. Maak nie saak of die junior wêreldkampioenskap vanjaar of volgende jaar aan die beurt kom nie, ek is geestelik en fisiek reg daarvoor.”
Daar is geen rede hoekom Masilingi nie die nasionale rekords in haar visier sal hê nie. Die Namibiese rekordhouers is Globine Mayova (11.38 en 23.34) in die 100 en 200, asook Tjipekapora Herunga (51.24) in die 400.
'n Uitdagende 2.87 sekondes staan tussen Masilingi en die o.20-wêreldrekord (49.42) van Grit Breuer (Duitsland) wat sy op 27 Augustus 1991 in Tokio se Olimpiese Stadion opgestel het. Die senior 400-wêreldrekord (47.60) staan al dekades agter die naam van Marita Koch van die destydse Oos-Duitsland, wat sy op 6 Oktober 1985 in Canberra, Australië, aangeteken het.
Botha reken Masilingi kan mettertyd as 200-spesialis meeding, maar ook die 400 hardloop. Behalwe vir dié afstande het sy ook in die 100 m gekwalifiseer om by die o.20 wêreldkampioenskap aan te tree.
– [email protected]
Skaars drie weke nadat die embleem vir die kompetisie op 5 Maart in Kenia bekendgestel is, moes die organiseerders die belangrike byeenkoms soos alle ander internasionale sportgeleenthede vanweë die coronaviruspandemie tot 'n onbepaalde datum uitstel.
Wêreldatletiek (tevore die IAAF) het op 24 Maart op sy webblad gesê hy werk nou saam met alle betrokke partye om 'n alternatiewe datum te vind wat die Keniaanse regering en elite atlete sal pas.
Die 2020 Statebondjeugspele is in dieselfde bootjie. Datums so ver as Julie 2023 word vir dié spele oorweeg.
Masilingi is tans 'n leerder by Grootfontein Agri-kollege en word deur mnr. Henk Botha op dié noordedorp afgerig. Sy sou nie vanjaar aan die jeugspele deelgeneem het nie. Haar visier was op die o.20 wêreldkampioenskap ingestel.
Botha was tot onlangs vol vertroue dat Masilingi binnekort die magiese grense sou oorsteek om vir die 2021 Olimpiese Spele in Tokio te kwalifiseer. Met beide elite byeenkomste egter van die baan, is dié beplanning heeltemal omver gewerp.
Botha sê: “Ons mikpunt bly die Olimpiese Spele wat tot volgende jaar Julie en Augustus uitgestel is. Indien kompetisies in 2020 plaasgevind het soos dit moes, glo ek steeds dat sy vir Tokio sou kwalifiseer.
“Al haar prestasies en aanduiders sover lyk belowend. Beatrice was en is steeds uitstekend op dreef. Sy is 'n ongelooflike gedissiplineerde en harde werker. Ewe belangrik is dat sy in haarself en vermoëns glo.
“Sy is 'n beskeie en intelligente meisie, maar sy het die wil om te wen en te presteer. Onder omstandighede is sy steeds gefokus en doen die oefeninge, al is dit hoe hard en moeilik om vol te hou.
“Op die oomblik kan sy nie in 'n gimnasium oefen nie en daar is ook nie 'n atletiekbaan beskikbaar nie. Dus hardloop sy tuis op 'n gelyk stuk grond wat tot tyd en wyl as plaasvervanger moet dien. Gimnasiums bly nog gesluit, dus gebruik ons maar tuis krag- en tegniekoefening en ander maniere om haar sterk te hou.
“Ek vertrou daar sal voor die 2021 Spele in Tokio kompetisies wees waar sy in die 200 en 400 kan kwalifiseer.
“Ons onmiddellike mikpunt was natuurlik Nairobi, maar tot nou het ons nog niks hieroor van Wêreldatletiek gehoor nie. Beatrice kan nie ophou oefen nie. Dit neem jare om 'n 400-atleet behoorlik te kweek.
“Ons het hard gewerk om Beatrice die nommer een 200- en 400-atleet in Namibië te maak. Onder omstandighede bly sy positief; haar peil is tans uitstekend en dit maak my geweldig trots op haar.
“Beatrice sou vanjaar bloot aan die Olimpiese Spele deelgeneem het om ondervinding op te doen. Al die grootste name moes eers leer kruip alvorens hulle die wêreld op die atletiekbaan kon oorrompel.
“Die 2022 senior Statebondspele in Birmingham, Engeland, is ons volgende mikpunt. Die idee is dat sy daar as 19-jarige ernstig aanspraak op 'n plek in die finale maak. 'n Mens hoop natuurlik op 'n medalje, maar dit is nie die einde indien dit nie gebeur nie.
“Indien sy in Birmingham wel die podium haal, sal die wêreld beslis van haar begin kennis neem. Sy moet natuurlik eers haar skoolloopbaan suksesvol voltooi voordat sy oorsee kan gaan. Daar is internasionale afrigters wat glad nie mensgeoriënteerd is nie en maklik 'n jong atleet se lewe binne 'n paar maande kan verwoes.
“Sy het beslis 'n blink toekoms, maar haar loopbaan sal fyn bestuur moet word om te sorg dat sy in die regte hande beland. Ek is regtig bevoorreg om met haar te kan werk. As Beatrice vandag vir die 400 in 'n kompetisie moet aantree, glo ek sy sal gemaklik onder 52 sekondes draai.
“Hoekom sê ek sy het 'n blink loopbaan voor haar? By die senior Afrika-spele verlede jaar het sy as 16-jarige die 400-finaal gehaal en algeheel sewende geëindig. Daar is wel uitdagers soos Oifili Chukwuka (17) van Kenia en Moroko Galefele (Botswana) wat goeie kompetisie vir haar is,” verduidelik Botha.
Galefele (22) het verlede jaar as senior 51.30 sekondes in die 400 aangeteken, terwyl Chukwuka 51.86 behaal het. Beatrice se 52.19 wat sy in Maart as 16-jarige op seevlak in Swakopmund behaal het, is tans die vinnigste o.20-tyd in die wêreld.
Sy word gevolg deur Ellie Beer (52.70 in Februarie) van Australië en Oneika McAnnuff (52.78, Februarie) van Jamaika. Hierdie topposisie as nommer een in die wêreld, maak Beatrice 'n gesogte bemarkingsatleet wat vir die regte borg wag.
REKORDTEIKENS
Masilingi sê: “My droom is om een van die beste vroue-atlete in die geskiedenis ter wêreld te word. Ek wil my pragtige Namibië op die hoogste moontlike vlakke verteenwoordig, wat die Olimpiese Spele en wêreldkampioenskap is.
“Ek en my afrigter se plan was om vanjaar ondervinding by die Olimpiese Spele op te doen en blootstelling te kry. Die spele se uitstel tot volgende jaar werk beslis in my guns. Ek het 12 maande verniet bygekry om my vir die groot dag in Japan voor te berei.
“My afrigter en ek werk tans baie hard en onverpoos vir internasionale byeenkomste wat intussen nog moet plaasvind. Maak nie saak of die junior wêreldkampioenskap vanjaar of volgende jaar aan die beurt kom nie, ek is geestelik en fisiek reg daarvoor.”
Daar is geen rede hoekom Masilingi nie die nasionale rekords in haar visier sal hê nie. Die Namibiese rekordhouers is Globine Mayova (11.38 en 23.34) in die 100 en 200, asook Tjipekapora Herunga (51.24) in die 400.
'n Uitdagende 2.87 sekondes staan tussen Masilingi en die o.20-wêreldrekord (49.42) van Grit Breuer (Duitsland) wat sy op 27 Augustus 1991 in Tokio se Olimpiese Stadion opgestel het. Die senior 400-wêreldrekord (47.60) staan al dekades agter die naam van Marita Koch van die destydse Oos-Duitsland, wat sy op 6 Oktober 1985 in Canberra, Australië, aangeteken het.
Botha reken Masilingi kan mettertyd as 200-spesialis meeding, maar ook die 400 hardloop. Behalwe vir dié afstande het sy ook in die 100 m gekwalifiseer om by die o.20 wêreldkampioenskap aan te tree.
– [email protected]
Kommentaar
Republikein
Geen kommentaar is op hierdie artikel gelaat nie