Beatrice en Ivan op pad na Oos-Afrika se hoogland

Tielman van Lill – Beatrice Masilingi en Ivan Danny Geldenhuys het uitnodigings van Wêreldatletiek aanvaar om komende naweek aan sy internasionale senior Goue Kontinentale Reeks-byeenkoms in Nairobi, hoofstad van Kenia, deel te neem.Beide Masilingi, van Grootfontein Agri-kollege, en Geldenhuys (oudleerder van WHS en Windhoek Gim wat tans in Suid-Afrika studeer en oefen), sal beide aan die 400 meter deelneem.Die 17-jarige Masilingi het in Julie verlede jaar by die senior Suidelike Afrika-kampioenskap in Mauritius aan haar eerste senior internasionale kampioenskap deelgeneem. Sy het goud in beide die 200 (23.85 sekondes, persoonlike beste) en 400 m (53.73) behaal om vir die senior Afrika-spele in Rabat, Marokko, te kwalifiseer. In Rabat knyp sy ’n allemintige 1.17 sekondes in die 400 af om algeheel sewende in 52.56 te eindig. Haar beste tyd in die 400 het Masilingi in Maart vanjaar in Swakopmund behaal toe sy die stophorlosie op 52.19 laat stilstaan het. Dié blitstyd het haar as die wêreld se vinnigste o.18- én o.20-atleet sover vanjaar in die 400 gevestig, terwyl sy onder die senior vroue sesde geplaas was. Teen gister was sy steeds nommer een op die o.18-wêreldlys, hoewel twee o.20’s intussen haar merk oortref het.Masilingi, wat onder die beskermende vlerk van mnr. Henk Botha in Grootfontein oefen, sê sy was stomgeslaan toe Botha haar met die goeie nuus verras het.“Dit is ’n groot eer om na so ’n groot byeenkoms genooi te word. Ek het nie gedink ek sal vanjaar ooit buite Namibië kan deelneem nie en was stomgeslaan toe my held (Botha) my laasweek met die fantastiese nuus verras het!“Ek is gereed en super-opgewonde om weer ’n slag teen die bestes in Afrika te kan hardloop. Ek het my persoonlike beste tyd in die visier; ek het vanjaar bitter hard gewerk en sal my beste lewer om daai 52.19 te oortref.”Masilingi sê jong mense moet aanhou droom en hoop.“Daar is nie perke op ons drome nie. As jy oefen, moet jy elke keer alles gee. Oefen soos ’n besetene en moenie dat mense vir jou vertel wat jy kan bereik of nie. Leer ken jouself en jou sterkpunte en dan sal jy sien waartoe jy in staat is. Baie dankie aan almal vir jul ondersteuning en geloof in my.“Ek wil my held en afrigter bedank vir alles wat hy vir my doen. Hy is my superman en die beste afrigter wat ’n mens kan kry!” het Masilingi uitbundig aan Republikein gesê.Vandat die Europese atletiekseisoen onlangs hervat het, het Barbora Malikova van Tjeggië laasmaand op die o.20-wêreldranglys die topposisie met 51.65 oorgeneem, terwyl Alina Luchsava van Belo-Rusland met 51.84 tweede geplaas is. Beide is twee jaar ouer as die Namibiër.Saterdag in Nairobi wil Masilingi egter opnuut versnel om Namibië op die wêreldverhoog in die kollig te plaas. GELDENHUYS IS TERUGDie 19-jarige Geldenhuys het hom in Maart vanjaar in die rekordboeke in gehardloop met ’n nuwe nasionale o.19-rekord (46.29 s). In die Tuks-stadion in Pretoria het hy Gerhard Barnard se rekord wat vir 35 jaar sedert 1985 gestaan het, met 0.63 sekondes oortref.Geldenhuys se blitstyd het hom ook boaan Wêreldatletiek se ranglys vir o.20-spoedvrate van 2020 geplaas. Hoewel hy intussen na die vierde posisie teruggesak het, sal hy Saterdag opnuut die baan aan die brand wil hardloop en wys hy was nie verniet die 13de vinnigste senior man ter wêreld in 2020 nie.Op Afrika o.20-vlak is net Kennedy Luchembe van Zambië se 45.88 op 6 September in Madrid ’n vinniger tyd hierdie seisoen as die Namibiër se persoonlike beste tyd wat hy in Pretoria behaal het.Verreweg die oudste inskrywing in die Namibiese nasionale rekordboek (Daniel Haitembu in die mans 400, met 46.14 op 26 April 1980 in Bloemfontein) is ook in sy visier.Geldenhuys behoort goeie herinneringe aan Nairobi te hê. In Julie 2017 het hy daar as 15-jarige aan die o.18-Wêreldkampioenskap gaan meeding. In sy uitdun, semifinaal en eindwedloop het hy elke keer sy persoonlike beste tye verbeter op pad na ’n uiteindelike sewende posisie (47.17).Die Kip Keino Classic-byeenkoms vind Saterdag by die Nyayo Nasionale Stadion in Nairobi plaas en is Afrika se eerste topkompetisie vandat Covid-19 sport op die kontinent lamgelê het. Atletiek Kenia sou in Julie die o.20-wêreldkampioenskap aangebied het, maar dié byeenkoms moes weens die gewraakte pandemie gekanselleer word. Die nuwe byeenkomsdatum vir die o.20-kampioenskap is vir 17 tot 22 August 2021 deur Wêreldatletiek vasgestel.Jackson Tuwei, president van Atletiek Kenia, sê die byeenkoms is ’n belangrike pronkstuk vir Afrika.“Dit is ’n spesiale dag vir Afrika om atletiek aan die gang te kry. Ons wil die kompetisie ’n sukses maak en wys hoe goed Afrika ’n byeenkoms kan aanbied, om te verseker meer internasionale kompetisies word in Afrika gehou. “Ons moet ’n reeks op die kontinent kan aanbied waar ons atlete hulself kan opbou en atletiek kan laat groei. Ons het besluit om die byeenkoms ter ere van die legendariese Olimpiese middelafstandkampioen Kipchoge Keino te vernoem,” het Tuwei gesê.Die Goue Kontinentale Reeks fokus op vyf kernitems, naamlik die 200-naelloop, 3 000 hindernis, driesprong, skyfwerp en hamergooi vir mans en vroue. In Nairobi sal atlete ook in spiesgooi, 400, 800, 1 500 en 5 000 meter kans kry om hul talente ten toon te stel. Ongeveer 250 atlete word in die stadion met sy 30 000 sitplekke verwag en ’n maksimum van 15 000 toeskouers word toegelaat.– tielman@republikein.com.na

Beatrice en Ivan op pad na Oos-Afrika se hoogland

Kommentaar

Republikein 2025-12-17

Meld asseblief aan om kommentaar te lewer

Beatrice en Ivan op pad na Oos-Afrika se hoogland

Kommentaar

Republikein 2025-12-17

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.