Beatrice blink in Gauteng

Beatrice Masilingi, 17-jarige blits van Grootfontein Agri Kollege, het Woensdag by die Tuks-stadion in Pretoria haar persoonlike beste tye in die 200 én 400 meter naellope verbeter. Indien haar 22.94 sekondes (200) en 50.44 (400) by die Gauteng Noord-ligabyeenkoms deur Atletiek Namibië be­vestig word, sal beide senior Namibiese vrouerekords wees. Die bestaande 200-rekord word deur Globine Mayova gehou (23.34, Pretoria 2013) en in die 400 word twee vertonings volgende hoogte bo seespieël onderskei. Tjipe Herunga het in 2012 in Pretoria 'n 51.24 opgestel, waarop Masilingi in Oktober vanjaar in Nairobi verbeter het (50.99). Woensdag het nog vier Namibiërs goue medaljes ingeryg, naamlik Christine Mboma (400 en 800 vir o.18's); Karlien Botha (goud in diskusgooi en brons in gewigstoot, seniors); Ivan Danny Geldenhuys (goud in 200 en 400) en Ludwig Huber (goud in diskusgooi, silwer in spiesgooi, o.20). Foto Facebook (Athletics Namibia)