Bean was daar en het dit gedoen

Tielman van Lill – Christiaan Bean, spanlid van die fietsryspan Kia Elite, het Saterdag in sy huis op Okahandja die ikoniese Alpe d'Huez bergpas van die Tour de France met sy ikoniese 21 haarnaalddraaie virtueel getem.Die aanlyn Zwift-platform met sy Alpe du Zwift, die virtuele weergawe van die uitmergelende Alpe d'Huez in die suide van Frankryk, bied aan brawe fietsryers die ideale uitdaging terwyl sportbyeenkomste tans weens Covid-19 taboe is.Sy vrou Silke Bean (34) het haar slag gewys en die helfte van dié uitdaging saam met hom voltooi. Drie spanlede van Team Kia – Courtney Liebenberg, Sandra Lippert en Cobus Smit – het Saterdagoggend vanaf Windhoek per fiets na Okahandja en terug gery om Bean vir 'n tydjie te ondersteun.Chris, soos sy spanmaats hom noem, het geklim en geklim totdat hy die toppunt van 8 889 meter ná 11 ure 35 minute 54 sekondes (totale tyd) en 'n afstand van 109 kilometer bereik het.Vanaf Bourg d'Oisans as beginpunt moes Bean die 12.22 km lange pas en vertikale klim van meer as een kilometer hoog, agt-en-'n-half keer takel om sy doel te bereik.Die gemiddelde klimgradiënt van die pas is 8.1 persent, maar kan gou selfs na 13% verander wat die ryer se uithouvermoë en bene nog meer toets. Tydens die Tour de France jaag die ryers dié berugte pas net een maal uit. Bean het gemiddeld 217 watt met sy bene gegenereer en hy het gemiddeld 1 uur 05 minute geneem om die pas uit te ry, wat op 9:20 vir die 109 km uitwerk sonder om afdraandes te tel.Bean sê: “Ek en my vrou het in 2014 begin bergfiets ry om fiks te word en bietjie gewig te verloor. Soos vele Namibiërs voor ons was die Desert Dash ons uiteindelike mikpunt.“In Desember 2014 het ek en sy die Dash suksesvol as 'n gemengde tweemanspan voltooi. Die uiteinde was dat beide van ons op fietsry versot geraak het.“Ek het eers verlede jaar na die padfiets oorgeskakel en vanjaar is my eerste seisoen by Team Kia Elite waar ons aan die Nedbank Windhoek Pedal Power-reeks deelneem. “In die begin was fietsry 'n sosiale tydverdryf, maar in die laaste drie jaar het ek dit al meer ernstig begin opneem en meer kompeterend geraak.“Ek het gou besef hoe uitdagend dit is om 'n gesonde balans tussen oefen, die bestuur van my eie besigheid en gesinstyd te vind. Dit is nooit maklik nie, maar tog baie lonend terwyl ek fiks vir die alledaagse lewe bly. Fikser is eenvoudig beter.“Ek en Silke neem meestal saam aan renne deel. Ons het al 'n paar multidaagse renne saam voltooi en was in die Dash al twee keer op die podium in ons kategorie. Dus was dit vanselfsprekend dat sy my met die Alpe d'Huez-uitdaging sou ondersteun.“Sy het Saterdag vir meer as tien ure saam met my gery. Sy wou eers 'n platterige roete kies om 300 km af te lê, maar toe ons sien daar is 'n Basecamp-uitdaging waar die ryer net die helfte van die pas hoef te ry. Sy het dit onmiddellik gekies, want Silke staan nie vir 'n uitdaging terug nie.“Silke, wat vanjaar vir Mannie's Bike Mecca ry, het 4 700 m geklim en 200 km gery terwyl ek op my taak gefokus het.“Dit was lekker om my Kia-spanmaats Courtney Liebenberg, Sandra Lippert en Cobus Smit (spankaptein) vir 'n ruk by my te hê terwyl hulle my aanmoedig. Dit is geweldig motiverend om vir 'n ruk jou aandag van die taak op hande te kry en dit blaas sommer nuwe lewe in jou bene.“Met die onseker toekoms wat voorlê, wil ek medefietsryers aanmoedig om binnenshuis te oefen en uitdagings aan te pak. Met hierdie uitdaging wou ek aan ander entoesiaste wys dit is opwindend om binnenshuis pret op die fiets te hê.“Binnenshuise virtuele renne is reeds in aanvraag in Namibië. Ons is 'n paar ouens wat die inisiatief geneem het om die Namibian Racing League op Zwift tot stand te bring.“Maak nie saak wat elkeen se fiksheidvlak is nie, renne vind elke week plaas en is beskikbaar vir ieder en elk by http://zwiftnam.com,” het Bean opgewonde vertel. Sover bekend het drie Namibiërs naamlik Drikus Coetzee (21 April), Jean-Paul Burger (Vrydag 8 Mei) en Bean reeds die Alpe d'Huez-pas op Zwift kafgedraf.– tielman@republikein.com.na

Bean was daar en het dit gedoen

Kommentaar

Republikein 2025-08-28

Meld asseblief aan om kommentaar te lewer

Bean was daar en het dit gedoen

Kommentaar

Republikein 2025-08-28

Meld asseblief aan om kommentaar te lewer

MELD AAN

Advertensie