Bankamptenaar erken reusebedrog
'n Voormalige bankwerknemer het gister in die hoërhof in Windhoek skuld op 288 klagte van bedrog erken.
Jacqueline Louw - Mark Wayne van Wyk (29) se liefde vir partytjies en onthaal is deur gesteelde geld gefinansier, het hy gister voor regter Naomi Shivute in die hoërhof in Windhoek erken.
In 'n skulderkenning wat deur Van Wyk se regsverteenwoordiger, mnr. Jan Wessels, aan die hof voorgelees is, sê hy dat hy tussen 19 Januarie 2013 tot aan die einde van Augustus 2015, toe hy in diens van Standard Bank Namibia se Gobabis-tak was, bedrog gepleeg het.
Volgens die klagstaat het Van Wyk geld na bankrekeninge in sy eie naam, asook dié van familie, vriende en kennisse oorgeplaas. Dít het hom 288 klagte van bedrog, alternatiewelik diefstal, op die hals gehaal.
Van Wyk, wat as rekeningondersteuningskonsultant en batebewaarder by die bank in diens was, het gister aan die hof gesê hy het sy eie wagwoord, sowel as sy kollegas s'n gebruik om toegang tot die bank se rekenaarstelsel te verkry om dié oorplasings te maak.
In sy skulderkenning sê Van Wyk verder hy was 'n spanleier wat onder meer verantwoordelik vir toesig oor ander rekeningondersteuningskonsultante en batebewaarders was.
Van Wyk het 'n mandaat gehad om toesig oor transaksies op die bank se interne inkomste-renterekening te hou en ook om die balansering van die tesourie ten opsigte van dié rekening te behartig.
BANKSTELSEL GEMANIPULEER
“Ek het die bankstelsel op bedrieglike wyse gemanipuleer om betalings vanuit die bank se interne inkomste-renterekening in my persoonlike rekeninge en die rekeninge van my vriende, familielede en kennisse oor te dra,” het hy in die skulderkenning gesê.
Hy sê verder hy het die mense na wie se rekeninge hy die geld oorgedra het, aangesê om die geld te onttrek en dit te oorhandig aan hom of aan iemand wat deur hom genomineer is.
“By ander geleenthede het ek die mense versoek om hul debietkaarte aan my te gee waarop ek geld by verskeie kitsbanke getrek het of die kaarte gebruik het om aankope te doen.”
As gevolg hiervan het Standard Bank Namibia 'n verlies van N$1 604 217,60 gely.
Tydens sy getuienis gister in die hof het Van Wyk gesê hy het bedrog begin pleeg omdat sy salaris nie voldoende was nie.
Afgesien van lenings wat hy moes terugbetaal, moes hy ook vir sy ouers en grootouers sorg. Hy het egter erken 'n deel van die geld is op drank, partytjies en onthale spandeer.
Op 'n vraag deur staatsadvokaat Salomon Kanyemba oor geld wat hy op dobbel verkwis het, het hy geantwoord: “Ek het probeer om uit die gemors te kom waarin ek myself laat beland het. Ek wou die indruk skep dat ek baie geld gehad het.”
Van Wyk het ook vertel die bank se renterekeninge is nie “dopgehou” nie en dit het hom in die versoeking gelei.
Hy het voorts gesê hy het skuldig gepleit omdat hy wil boet vir wat hy gedoen het. Weens sy afdanking en skulderkenning het hy reeds sy pensioenvoordele verbeur.
Ná gister se hofverrigtinge het die regter beveel dat Van Wyk onmiddellik in hegtenis geneem word.
Betoë vir vonnisoplegging word vandag gelewer.
In 'n skulderkenning wat deur Van Wyk se regsverteenwoordiger, mnr. Jan Wessels, aan die hof voorgelees is, sê hy dat hy tussen 19 Januarie 2013 tot aan die einde van Augustus 2015, toe hy in diens van Standard Bank Namibia se Gobabis-tak was, bedrog gepleeg het.
Volgens die klagstaat het Van Wyk geld na bankrekeninge in sy eie naam, asook dié van familie, vriende en kennisse oorgeplaas. Dít het hom 288 klagte van bedrog, alternatiewelik diefstal, op die hals gehaal.
Van Wyk, wat as rekeningondersteuningskonsultant en batebewaarder by die bank in diens was, het gister aan die hof gesê hy het sy eie wagwoord, sowel as sy kollegas s'n gebruik om toegang tot die bank se rekenaarstelsel te verkry om dié oorplasings te maak.
In sy skulderkenning sê Van Wyk verder hy was 'n spanleier wat onder meer verantwoordelik vir toesig oor ander rekeningondersteuningskonsultante en batebewaarders was.
Van Wyk het 'n mandaat gehad om toesig oor transaksies op die bank se interne inkomste-renterekening te hou en ook om die balansering van die tesourie ten opsigte van dié rekening te behartig.
BANKSTELSEL GEMANIPULEER
“Ek het die bankstelsel op bedrieglike wyse gemanipuleer om betalings vanuit die bank se interne inkomste-renterekening in my persoonlike rekeninge en die rekeninge van my vriende, familielede en kennisse oor te dra,” het hy in die skulderkenning gesê.
Hy sê verder hy het die mense na wie se rekeninge hy die geld oorgedra het, aangesê om die geld te onttrek en dit te oorhandig aan hom of aan iemand wat deur hom genomineer is.
“By ander geleenthede het ek die mense versoek om hul debietkaarte aan my te gee waarop ek geld by verskeie kitsbanke getrek het of die kaarte gebruik het om aankope te doen.”
As gevolg hiervan het Standard Bank Namibia 'n verlies van N$1 604 217,60 gely.
Tydens sy getuienis gister in die hof het Van Wyk gesê hy het bedrog begin pleeg omdat sy salaris nie voldoende was nie.
Afgesien van lenings wat hy moes terugbetaal, moes hy ook vir sy ouers en grootouers sorg. Hy het egter erken 'n deel van die geld is op drank, partytjies en onthale spandeer.
Op 'n vraag deur staatsadvokaat Salomon Kanyemba oor geld wat hy op dobbel verkwis het, het hy geantwoord: “Ek het probeer om uit die gemors te kom waarin ek myself laat beland het. Ek wou die indruk skep dat ek baie geld gehad het.”
Van Wyk het ook vertel die bank se renterekeninge is nie “dopgehou” nie en dit het hom in die versoeking gelei.
Hy het voorts gesê hy het skuldig gepleit omdat hy wil boet vir wat hy gedoen het. Weens sy afdanking en skulderkenning het hy reeds sy pensioenvoordele verbeur.
Ná gister se hofverrigtinge het die regter beveel dat Van Wyk onmiddellik in hegtenis geneem word.
Betoë vir vonnisoplegging word vandag gelewer.
Kommentaar
Republikein
Geen kommentaar is op hierdie artikel gelaat nie