Bank van Japan se bates nou meer as die BBP

William Horne en Bloomberg – Die Bank van Japan se bates is nou meer werd as die land se ekonomie.Luidens die sentrale bank se jongste balansstaat hou hy nou bates ter waarde van $4 900 miljard of ¥553 600 miljard.In Junie vanjaar was die nominale bruto binnelandse produk (BBP) van die land op ¥552 800 miljard. Die jongste data, wat Woensdag uitgereik word, sal na verwagting dui op ’n inkrimping van die Japanse ekonomie, wat die gaping nog groter sal maak.Die Bank van Japan se ongekende stimulus-strategie stut die land se ekonomie nou al jare lank, ondanks treurige groei en verskeie rondes deflasie.Maar die jongste mylpaal is kommerwekkend. ’n Sentrale bank wat sit met bates van meer as 100% van die land se ekonomie, is in onbekende terrein.Die VSA se Federale Reserweraad (Fed) hou bates ter waarde van sowat 20% van Amerika se BBP, die Europese Sentrale Bank het bates gelykstaande aan 40% van die euro-sone se ekonomie, en die Suid-Afrikaanse Reserwebank hou bates ter waarde van 27% van die BBP.Die meeste van die Bank van Japan se bates is Japanse staatseffekte wat hy aankoop om rentekoerse laag te hou en inflasie by 2% te kry.Die waarde van die staatseffekte is tans $4 100 miljard, wat 83% van alle bates van die Bank van Japan beslaan.Dit beteken die waarde van die Japanse staatseffekte wat die sentrale bank hou, is meer as die BBP van Duitsland ($3 680 miljard) of die BBP van die hele Afrika ($3 520 miljard), luidens die Internasionale Monetêre Fonds (IMF) se nuutste BBP-data.Japan se inflasiekoers staan op 1%, slegs die helfte van die teiken van die sentrale bank en die eerste minister, Sjinzo Abe. Die klein hupstoot wat die voorbereidsels vir die 2020-Olimpiese Spele in Tokio aan die ekonomie gee, loop ten einde en met die beplande BTW-verhoging in 2019 is die onus op die sentrale bank om die ekonomie aan die gang te hou.Vir die afsienbare toekoms sal hy dus moet aanhou bates aankoop.“Daar is geen konsensus oor hoe groot ’n sentrale bank se bates kan wees voordat dit gevaarlik begin raak nie,” sê Noboejasoe Atago, hoofekonoom van Okasan Securities Co en ’n voormalige amptenaar van die Bank van Japan.Anders as die VSA of Europa moet Japan baie meer werk doen om inflasie te stook sodat die land nie weer onder deflasie deurloop nie, sê Masamitsji Adatsi, ’n ekonoom by JPMorgan Chase & Co., nog ’n voormalige amptenaar van die Bank van Japan. “Die Bank van Japan moet sy soloreis voortsit om die balansstaat te vergroot en sodoende rentekoerse laag te hou,” sê Adatsji.Maar die Bank van Japan se opsies is beperk ten opsigte van wat hy nog kan doen om die ekonomie te ondersteun. Die omvang van sy bates is nou so enorm dat hy moet aanhou bates opgaar om te kan betaal vir dié waarvan die looptyd verby is.Die staatseffekte wat hy besit se looptyd verval nou teen ’n tempo van ¥50 000 miljard per jaar, volgens Bloomberg Economics se Yuki Masujima.David Metelerkamp, ’n ekonoom van Industry Insight, meen die Bank van Japan het homself in ’n hoek geverf. “Die mate waarin die Bank van Japan staatseffekte gekoop het, plaas hom in ’n taamlik moeilike posisie as daar nog ’n finansiële krisis of selfs net ’n ekonomiese skok sou wees.”Die sentrale bank moes buitengewone stappe doen om die Japanse ekonomie uit deflasie te kry, maar nou is hy aan nuwe fronte kwesbaar, verduidelik Metelerkamp. As iets nou sou skeefloop, het “hulle min of eintlik geen monetêre ruimte oor om mee te werk nie.”– Bloomberg, verwerk/Netwerk24

Bank van Japan se bates nou meer as die BBP

Kommentaar

Republikein 2025-11-05

Meld asseblief aan om kommentaar te lewer

Bank van Japan se bates nou meer as die BBP

Kommentaar

Republikein 2025-11-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.