Baldief Pocock hang sy stewels op

David Pocock, voormalige Wallaby-flank en -kaptein, gaan sy stewels vir altyd wegpak en sal hom nou op wild- en natuurbewaring, asook rugbyontwikkeling toespits.
Dié bedrewe baljagter het verlede seisoen uit toetsrugby getree by die Wêreldbeker-toernooi in Japan nadat hy Australië in 83 toetse verteenwoordig het.
Hy het daarna by die Japannese span Panasonic Wild Knights aangebly.
“Hoewel dit ’n baie moeilike besluit was, voel dit regtig of dit die regte tyd is.
“Ek weet dit sal ’n uitdaging wees om daardie oorgang te maak,” het die 32-jarige Pocock gesê.
Pocock sal onthou word as een van gedugste teenstanders by die afbreekpunte die afgelope dekade of wat en hy was vir vele spanne ’n doring in die vlees.
Hy is in Zimbabwe gebore, maar die politieke onstuimigheid in dié land het sy gesin laat besluit om in 2002 na Australië te verhuis.
Pocock het in 2008 sy buiging in internasionale rugby gemaak nadat hy as ’n tiener vir die Western Force in die Superreeks gespeel het.
Hy het die Springbokke se Wêreldbeker-droom in 2011 byna manalleen verydel in die spanne se ontmoeting in die kwarteindronde.
Pocock het die Wallabies in 2012 aangevoer toe James Horwill beseer is.
Hy het in 2013 die eerste van ’n rits ernstige kniebeserings opgedoen.
Verskeie Wallaby-afrigters het Pocock en Michael Hooper, ook ’n puik baldief, in diesefde lostrio gekies en die Aussies het in 2015 die Wêreldbeker-eindstryd gehaal toe die duo op dreef was.
Pocock was nog altyd uitgesproke en ’n kampvegter vir onder meer vroueregte en natuurbewaring en is in 2014 by ’n protesoptog by ’n myn in Nieu-Suid-Wallis in hegtenis geneem.
“Rugby het my so baie geleenthede gegee en ek is regtig opgewonde om die volgende generasie spelers hier in Australië en in Zimbabwe te ondersteun. Daar is soveel talent in albei lande,” sê Pocock.
– Reuters, Netwerk24