Bafana besweer vrese met rekord ‘tennistelling’
Sokker
Johann de Jager - Benewens die halfdosyn doele-rekord was die afrigter Stuart Baxter in die eerste plek in sy noppies dat Bafana Bafana nie weer teen onbekende sokkerspan gaan staan en kleitrap het nie.
Ná skokvertonings in die span se eerste wedstryde teen die Kaap Verdiese Eilande en Libië wat straks geringgeskat is, was daar vrese dat dit teen die Seychelle, 189ste op die ranglys, weer kan gebeur.
Bafana Bafana het dit Saterdag egter in gure weer in die FNB-stadion met ’n nuwe rekord besweer deur die Pirates met 6-0 oor die boeg te span.
“Die onderskat-faktor was nie ons sterk punt nie en ons het gedurende die week hard gewerk om dit te voorkom,” sê Baxter.
Suid-Afrika het nou die voortou in Groep E geneem om vir volgende jaar se toernooi om die Afrika-beker in Kameroen te kwalifiseer. Ja, dit is ’n eilandnasie met ’n skrapse bevolking, maar Bafana Bafana sou Sondagmiddag met groot selfvertroue op die vliegtuig na Victoria geklim het vir die spanne se verdere wedstryde Dinsdag daar.
Suid-Afrika se grootste sege sedert eenwording was toe hy Guatemala met 5-0 in 2010 in Polokwane geklop het.
Dit was Saterdag met 75% balbesit eenrigtingverkeer, terwyl die 14 hoekskoppe teenoor een, ook wys aan watter kant van die veld die meeste spel was. ’n Eie doel in die 23ste minuut was die eerste van drie doele binne vier minute waarmee Suid-Afrika rustyd met 3-0 voorgeloop het.
Baxter sê die spelers verdien lof omdat hulle in die tweede helfte daarop voortgebou het.
“Die spelers kon rustyd maklik slapgelê het, dit kon met ’n onkantspel of ’n strafdoel 1-3 geword het. Die spelers moet dus meer as die feit dat hulle ses doele aangeteken het, gelukgewens word vir die wyse waarop hulle gespeel het,” het Baxter volgens goal.com gesê.
“Hulle het goed gespeel, hulle was gedissiplineerd en het by die wedstrydplan gehou. Die spelers wat opgegaan het, het ook presies geweet wat hulle moet doen.”
Die twee plaasvervangers, Dino Ndlovu en Teboho Mokoena, het aan die einde hul eerste doele vir Suid-Afrika aangeteken.
Baxter sê hy dink nie Percy Tau, wat ’n dag van frustrasie beleef het en later uitgejou is oor die kaboedel kanse wat hy verbrou het, was oorgerus nie. Die doelskieter het in die eerste helfte die dwarsbalk met ’n vryskop getref. Sy oordeel was met tye vrot. Hy moes tot in die 74ste minuut wag om helaas ná ’n hand vol probeerslae sukses te proe.
Lebo Mothiba van Strasbourg, wat goed met hom gekombineer het, het die tipe spel opgedis wat die paviljoene weer sal volmaak ná die teleurstellende skare wat opgedaag het.
Vir die tweede agtereenvolgende wedstryd het ’n doelwagter van die Seychelle opslae gemaak.
Die telling kon heelwat meer gewees het as dit nie vir Romeo Barra was nie. Met 15 doelpogings op koers het hy ’n besige middag beleef en hy was telkens op sy stukke.
Barra het gespeel in die plek van Dave Mussard wat in September teen Nigerië die sosiale media laat gons het. Dit was egter nie oor sy spel nie. Die stewige postuur van hierdie sjef by ’n plaaslike hotel was toe die besprekingspunt.
Puntestand (ná drie van die ses groepwedstryde): Suid-Afrika 7, Nigerië 6, Libië 4, Seychelle 0. – Netwerk24
Ná skokvertonings in die span se eerste wedstryde teen die Kaap Verdiese Eilande en Libië wat straks geringgeskat is, was daar vrese dat dit teen die Seychelle, 189ste op die ranglys, weer kan gebeur.
Bafana Bafana het dit Saterdag egter in gure weer in die FNB-stadion met ’n nuwe rekord besweer deur die Pirates met 6-0 oor die boeg te span.
“Die onderskat-faktor was nie ons sterk punt nie en ons het gedurende die week hard gewerk om dit te voorkom,” sê Baxter.
Suid-Afrika het nou die voortou in Groep E geneem om vir volgende jaar se toernooi om die Afrika-beker in Kameroen te kwalifiseer. Ja, dit is ’n eilandnasie met ’n skrapse bevolking, maar Bafana Bafana sou Sondagmiddag met groot selfvertroue op die vliegtuig na Victoria geklim het vir die spanne se verdere wedstryde Dinsdag daar.
Suid-Afrika se grootste sege sedert eenwording was toe hy Guatemala met 5-0 in 2010 in Polokwane geklop het.
Dit was Saterdag met 75% balbesit eenrigtingverkeer, terwyl die 14 hoekskoppe teenoor een, ook wys aan watter kant van die veld die meeste spel was. ’n Eie doel in die 23ste minuut was die eerste van drie doele binne vier minute waarmee Suid-Afrika rustyd met 3-0 voorgeloop het.
Baxter sê die spelers verdien lof omdat hulle in die tweede helfte daarop voortgebou het.
“Die spelers kon rustyd maklik slapgelê het, dit kon met ’n onkantspel of ’n strafdoel 1-3 geword het. Die spelers moet dus meer as die feit dat hulle ses doele aangeteken het, gelukgewens word vir die wyse waarop hulle gespeel het,” het Baxter volgens goal.com gesê.
“Hulle het goed gespeel, hulle was gedissiplineerd en het by die wedstrydplan gehou. Die spelers wat opgegaan het, het ook presies geweet wat hulle moet doen.”
Die twee plaasvervangers, Dino Ndlovu en Teboho Mokoena, het aan die einde hul eerste doele vir Suid-Afrika aangeteken.
Baxter sê hy dink nie Percy Tau, wat ’n dag van frustrasie beleef het en later uitgejou is oor die kaboedel kanse wat hy verbrou het, was oorgerus nie. Die doelskieter het in die eerste helfte die dwarsbalk met ’n vryskop getref. Sy oordeel was met tye vrot. Hy moes tot in die 74ste minuut wag om helaas ná ’n hand vol probeerslae sukses te proe.
Lebo Mothiba van Strasbourg, wat goed met hom gekombineer het, het die tipe spel opgedis wat die paviljoene weer sal volmaak ná die teleurstellende skare wat opgedaag het.
Vir die tweede agtereenvolgende wedstryd het ’n doelwagter van die Seychelle opslae gemaak.
Die telling kon heelwat meer gewees het as dit nie vir Romeo Barra was nie. Met 15 doelpogings op koers het hy ’n besige middag beleef en hy was telkens op sy stukke.
Barra het gespeel in die plek van Dave Mussard wat in September teen Nigerië die sosiale media laat gons het. Dit was egter nie oor sy spel nie. Die stewige postuur van hierdie sjef by ’n plaaslike hotel was toe die besprekingspunt.
Puntestand (ná drie van die ses groepwedstryde): Suid-Afrika 7, Nigerië 6, Libië 4, Seychelle 0. – Netwerk24
Kommentaar
Republikein
Geen kommentaar is op hierdie artikel gelaat nie