Baba se dood op infeksie geblameer

Henriette Lamprecht - Die dood van ’n babameisie ná haar immunisering is te wyte aan ’n virale infeksie, terwyl die feit dat sy vroeggebore is, ook ’n onderliggende rol gespeel het.

Dít is die ministerie van gesondheid en maatskaplike dienste (MoHSS) se verweer in ’n skadevergoedingseis ná die dood van die ses weke oue Miriam Loteni Imongwa in 2017.

Me. Loide Imongwa eis N$225 000 vir onder meer emosionele trauma, begrafnisuitgawes en berading.

Volgens prof. Clarissa Pieper, ’n pediater wat in epidemiologie en neonatalogie spesialiseer, was Miriam se geboortegewig as vroeggebore baba 1,36 kg.

Volgens Pieper se verklaring het haar nadoodse ondersoek ook “dik, geel mukus” in die babameisie se linkerneusholte getoon.

Histologie het volgens Pieper bevind die kind het brongo-pneumoniese veranderinge in haar longe getoon en het ook hepatitis gehad. ’n Virale toets is gedoen, deur middel waarvan ’n Cytomegalo-virusinfeksie positief geïdentifiseer is. Volgens Pieper verduidelik dit die hepatitis, die longinfeksie sowel as die mukus.

Dr. Mamadi Guriras, wat in diens van die ministerie se lykshuis was, het na die nadoodse verslag van ene dr. Y. Vasin verwys, wat Miriam se dood as “’n onverwagse sterfte ná ‘n standaard ses weke immunisasie” beskryf het. Die feit dat sy vroeggebore is, was volgens Guriras ‘n bydraende faktor in Miriam se dood.

Guriras se ontleding van die hoof- nadoodse bevindinge is dat voorgeboorte ‘n “baie beduidende” bevinding is en “’n baba ontvanklik vir eksterne magte en siektes” maak.

Volgens hom speel dit ‘n beduidende rol in die onderliggende oorsaak van dood.

Volgens Miriam se ma, Loide, is haar dogtertjie op 20 Desember 2016 in die Sentrale Hospitaal in Windhoek gebore.

Op die oggend van 10 Februarie het sy haar dogtertjie na die Black Chain-kliniek vir haar immunisering geneem, waar hulle glo ’n halfuur lank in ’n ry gewag het.

Miriam is volgens haar toe geweeg en het twee inspuitings en ook mondelikse druppels gekry. Met hul tuiskoms het haar baba nie gehuil nie en ook nie ’n koors gehad nie, beweer Imongwa.

“Sy het geen tekens van pyn, ongemak of siekte getoon nie. Daar was die hele dag niks met haar fout nie en teen 18:00 het ons gaan slaap,” lui die ma se verklaring.

Omstreeks 06:00 die volgende oggend het sy haar dogtertjie glo geborsvoed en weer verder geslaap. Teen 08:00 het sy egter agtergekom haar dogtertjie haal nie asem nie, beweer sy.

Volgens haar het sy toe die bure en die polisie daarvan in kennis gestel.

“Niks buitengewoon is aan die baba gedoen wat haar dood kon veroorsaak nie, buiten die entstof wat sy ontvang het,” lui Imongwa se verklaring.

“Ek kan nie veel onthou van wat daarná gebeur het nie, want ek was in ’n toestand van skok en kon nie duidelik fokus nie.”

Imongwa het erken Miriam is vroeggebore, maar was nie siek nie.

“Wat met haar gebeur het, wat haar dood veroorsaak het, maak my hartseer en verward. Ek het nie eers geweet wat om vir ander mense te sê wat met my baba gebeur het nie. Ek het baie gehuil omdat ek my baba verloor het en omdat ek nie enige antwoorde het nie. Ek kan nie regtig slaap nie. Wanneer ek wel slaap, sien ek haar in my gedagtes,” het Imongwa gesê.

Volgens haar het personeel onder meer nie daarin geslaag om te verseker die entstowwe en ander medikasie wat haar dogtertjie ontvang het, was onder geskikte toestande gestoor nie.

Mnr. Nicolas Shapumba, verbonde aan die direktoraat vir primêre gesondheidsorg as beampte wat by die nasionale immuniseringsprogram betrokke is, het dít ontken.

Volgens hom is MoHSS as lidland van die Wêreldgesondheidsorganisasie (WHO) verbind tot die organisasie se protokol vir entstowwe en immuniserings.

Hy het gesê entstowwe word in standaardgeriewe gestoor en word twee keer per dag met ’n termometer gemonitor.

Die saak is tot 12 Februarie uitgestel.