Baba Mariana spog met nuwe ogies

Henriette Lamprecht - Haar ogies beweeg heeltyd soos sy veral ligte opsoek en sy kraai en gesels heeltyd met haar fyn handjies. Mariana Grobler van Windhoek is wel tien maande oud, maar haar splinternuwe ogies ’n skrale drie maande. Mariana het in September en Oktober vanjaar twee suksesvolle kornea-inplantings in Rochester, Amerika gekry, nadat sy met ’n rare siekte bekend as “wit kornea” gebore is.Mariana is nou “permanent vriendelik”, vertel Susan.“Sy verken, vat aan alles en ruik dit voor sy dit in haar mond sit. Dit is asof sy eers al haar sintuie gebruik voor sy iets doen! Sy hou net niks van groen nie, ons weet nie waar dit vandaan kom nie, maar dit is dalk die dokters se groen klere!”” Mariana is mal oor ligte, veral buisligte.“Sy sien die volle prisma van die reënboog in die ligte omdat sy nie korneas het nie.”Die Grobler-egpaar en Mariana het in September na die instituut in Rochester in die staat New York gereis waar sy deur dr. James Aquavella geopereer is. “Ons het vreeslik baie mense ontmoet wat by dieselfde plek as ons tuisgegaan het en besef ons probleem is eintlik so klein. Daar was ouers van kinders vir wie niks gedoen kon word nie en ons het saam met hulle gehuil.”Die gewag tydens Mariana se eerste operasie op haar regteroog wat ses ure geduur het, was eindeloos.“Ons was bang, want ons het nie geweet wat om te verwag nie. Na die eerste twee ure het die dokters uitgekom en verduidelik wat hulle doen. Die dokter het gesê dis die gesondste oog waarop hy nog geopereer het, daar was geen skade aan die korneas nie.”Mariana is na ’n herstelperiode van twee ure saam met die Groblers na die gastehuis waar hulle gebly het. “Ons het die volgende dag toe hulle die verbande afhaal, geweet die operasie was ’n sukses. Sy het heeltyd die liggie gevolg en die linkerogie se ‘wit’ probeer afvryf!”Mariana se linkeroog is op 11 Oktober geopereer en dit was vir Susan asof haar dogtertjie toe besef het “nou is alles orraait”.Sy kry daagliks elke ses ure spesiale oogdruppels wat onder meer inflammasie teenwerk, iets wat sy vir die res van haar lewe sal moet gebruik. Sy sal steeds gereeld vir opvolgbesoeke moet gaan.Dr. Aquavella beplan om Namibië vroeg volgende jaar te besoek.“Hy is 85 jaar oud en ’n hart en passie vir kinders. Hy sê solank as wat hy gespaar bly, sal hy kinders help, geen kind onder vyf jaar moet ’n bril dra nie!”Volgens Susan moet die Groblers vir Mariana een keer per jaar vir personeel by die instituut “kom wys”.“Omdat dit ’n navorsingshospitaal is, is Mariana nou op hul rekords en is alle mediese behandeling hier vir die res van haar lewe gratis.”Mariana se lense en ogies moet elke drie maande in die teater skoongemaak word. Daarmee saam het sy ook ’n gloukoom-toestelletjie in elke oog om te keer dat druk in die oë opbou.Die grootste uitgawe is haar daaglikse oogdruppels en teater- en dokterskoste wanneer haar ogies skoongemaak word. Tot op hede het honderde mense en ook die Okanti-stigting die gesin hetsy geldelik of emosioneel bygestaan.“Ons word steeds ondersteun en kry boodskappe. Ons het soveel vriende deur haar gemaak, ons weet nie hoe sê mens regtig dankie vir alles nie!”

Baba Mariana spog met nuwe ogies

Kommentaar

Republikein 2026-02-05

Meld asseblief aan om kommentaar te lewer

Baba Mariana spog met nuwe ogies

Kommentaar

Republikein 2026-02-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.