Avisdam-moordenaars nog op vrye voet

Ronelle Rademeyer en Kristien Kruger – “Hierdie is ’n wrede, wrede moord. Dit is verskriklik. Ek is totaal geskok.”Só het me. Vera Freyer, voorsitter van Greenspace, gister oor die gebeure kort voor seweuur Dinsdagaand by Avisdam gesê toe die 52-jarige mnr. Daniele Ferrari, ’n bekende sakeman van Windhoek, na bewering deur twee mans met ’n mes en panga aangeval en vermoor is. Sy aanvallers het met sy selfoon op die vlug geslaan.Twee drawwers wat hom te hulp gesnel het, is ook aangeval en beseer.Greenspace is ’n niewinsgewende omgewingsorganisasie wat as die “Vriende van Avis” na die bestuur en bewaring van dié gewilde ontspanningsplek omsien.Freyer sê dit is ’n groot skok vir Greenspace, aangesien dit die eerste keer is dat iemand by die dam vermoor word. “Ons is baie hartseer dat die gevoel van skoonheid en rustigheid wat ons geniet as ons by die dam stap, van ons weggeneem word deur voorvalle soos hierdie wat vrees by ons wek,” het sy gesê.Ferrari se suster, me. Gloria Ferrari, het Dinsdagaand na haar broer gaan soek toe dit donker word en hy nog nie tuis was nie, en op sy lyk in sy motor afgekom. Dit is deur ’n familielid gister aan Republikein bevestig.Ferrari was ‘n elektrisiën en bekende in bou- en konstruksiekringe. Sy suster woon by tye in Italië, maar was die laaste maande by haar familie in Namibië. Die familie besit verskeie eiendomme in ’n woonbuurt nie ver van Avisdam nie en wyle Ferrari het gereeld met sy honde daar gaan stap.Dit blyk Ferrari is op pad terug van sy staptog naby sy voertuig deur twee mans aangeval wat met ’n panga en ’n mes gewapen was.Mnr. Rob McGregor, wat saam met ’n ander man by Avisdam gedraf het, het gesien wat gebeur en Ferrari te hulp gesnel.McGregor het gister by navraag gesê hy is twee keer met die stomp kant van die panga teen die kop gekap en die ander drawwer is teen die kop asook aan sy boarm gekap. “Ek het Dinsdagaand in die hospitaal deurgebring, maar is vanoggend (Woensdag) ontslaan,” het McGregor gesê. Hy wou nie sy vriend se naam sonder sy toestemming bekend maak nie.Na verneem word het Ferrari na sy motor gevlug, maar is deur die aanvallers agtervolg. Hulle het na bewering die ruit van sy voertuig gebreek en hom glo in die motor verder aangeval en vermoor. McGregor en sy drawwersvriend het intussen weggehardloop om hulp te ontbied. Die polisie het die moordtoneel gisteroggend vir leidrade gefynkam. Buiten vir bloedspatsels en glas van die gebreekte motorruit waar Ferrari geparkeer was, was daar nie ander sigbare tekens van die wrede aanval nie.Teen laat gister was niemand nog in verband met die voorval in hegtenis geneem nie.Freyer het intussen gemaan mense moenie by die dam gaan stap of draf wanneer die wagte nie meer daar is nie. “In die winter is daar van seweuur soggens tot kwart oor ses saans wagte. In die somer is hulle tot seweuur saans daar, maar in die winter gaan hulle vroeër huis toe,” het sy gesê. - ronelle@republikein.com.na/kristien@republikein.com.na

Avisdam-moordenaars nog op vrye voet

Kommentaar

Republikein 2026-05-05

Meld asseblief aan om kommentaar te lewer

Avisdam-moordenaars nog op vrye voet

Kommentaar

Republikein 2026-05-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.