'As ons 400 moet jaag, dan sál ons'
Van môre af sal die oë van die sportwêreld op die Wêreldbeker-kriekettoernooi in Engeland gevestig wees.
Tinus van Staden - “Suid-Afrika is 'n baie sterk span,” sê die Engelse snelbouler Mark Wood Maandag terwyl die klank van krieketballe wat kolwe tref, agter hom deur die onderdak-nette by die Oval in Londen weergalm.
Woody, soos die Engelse media hom noem, is fiks verklaar vir môre se Wêreldbeker (WB)-openingswedstryd teen die Proteas. Daar was groot kommer oor hom nadat hy sy voet Saterdag in die Engelse se opwarmingswedstryd teen die Aussies seergemaak het.
Ditto die kaptein, Eoin Morgan, wat Vrydag 'n vingerbesering by 'n oefening opgedoen het. Kaptein Morgan is ook fiks en het die span Maandag op die veld gelei in hul laaste opwarmingswedstryd teen Afghanistan, maar sy dienste was, nes Wood s'n, glad nie benodig nie.
Morgan het besluit om nie veldwerk te doen nie en Jason Roy se blitsige beurt van 89* het Engeland gehelp om die teiken van 160 met slegs een paaltjie plat tjoef-tjaf kaf te draf.
Dít is waarom Morgan en die sterkolwer Joe Root hul kolfwerk nou in die nette slyp, reg agter Wood waar hy praat oor die bedreiging wat Suid-Afrika inhou.
“Ottis Gibson ken ons uiteraard baie goed, so ek is seker hy sal 'n paar goeie planne beraam,” sê Wood van die Protea-breier, wat vroeër Engeland se boulafrigter was.
“Die Protea-spelers sal boonop vuur en vlam wees, want hulle sal die gasheerland 'n ding of twee wil wys.”
Net voordat hy in die nette begin kolf het, het Morgan ook die media te woord gestaan. Hy sê die gunsteling-etiket wat so styf om Engeland se nek sit, sal hulle nie verwurg nie.
“Dit is 'n groot kompliment. Daardie druk is goed,” sê Morgan.
“Ek verkies veel eerder om as die gunsteling te begin as om nie eens as aanspraakmakers gereken te word nie.”
Suid-Afrika ken die juk van 'n gunstelingetiket alte goed. Dit het hulle in die verlede al lamgelê.
Vanjaar is die Proteas egter nie 'n gunsteling nie. Dink Morgan dít maak hulle juis gevaarlik?
“Ek is nie seker nie,” sê hy.
“As jy teen 'n span speel, sien jy hulle nie as gunstelinge of buiteperde nie. Dit gaan oor dít wat op die dag gebeur en dit is waarop ons sal fokus.”
Volgens die Engelse boulers Liam Plunkett en Adil Rashid beskik die Proteas juis oor spelers wat die lewe Donderdag vir die Engelse moeilik kan maak.
“Hulle het goeie kolwers. Quinton de Kock kan die wedstryd swaai, Faf du Plessis ook,” sê die snelbouler Plunkett.
“Hashim Amla is ook 'n groot speler, ek het destyds saam met hom by die Dolphins gespeel.”
Rashid het dieselfde drie Proteas uitgelig.
“Hulle het spelers van wêreldgehalte soos Hashim, De Kock en Du Plessis,” sê dié bybreekbouler.
Die Engelse steur hulle egter nie daaraan nie. Daar is selfvertroue in lede van die Engelse kamp wat nog nie voorheen by 'n WB was nie.
“Ons het 'n span deurspek van wêreldklasspelers. Ons het die selfvertroue dat ons enige teikens kan haal,” sê Rashid.
“Ons huiwer nie, ons twyfel nie. 'Ons kan dit doen,' is die gevoel in die kleedkamer, want ons het kolwers van wêreldgehalte van nommer een al die pad tot die laaste kolwer.
“Selfs al moet ons 400 jaag, glo ons dat ons dit kan doen.”
– Netwerk24
Woody, soos die Engelse media hom noem, is fiks verklaar vir môre se Wêreldbeker (WB)-openingswedstryd teen die Proteas. Daar was groot kommer oor hom nadat hy sy voet Saterdag in die Engelse se opwarmingswedstryd teen die Aussies seergemaak het.
Ditto die kaptein, Eoin Morgan, wat Vrydag 'n vingerbesering by 'n oefening opgedoen het. Kaptein Morgan is ook fiks en het die span Maandag op die veld gelei in hul laaste opwarmingswedstryd teen Afghanistan, maar sy dienste was, nes Wood s'n, glad nie benodig nie.
Morgan het besluit om nie veldwerk te doen nie en Jason Roy se blitsige beurt van 89* het Engeland gehelp om die teiken van 160 met slegs een paaltjie plat tjoef-tjaf kaf te draf.
Dít is waarom Morgan en die sterkolwer Joe Root hul kolfwerk nou in die nette slyp, reg agter Wood waar hy praat oor die bedreiging wat Suid-Afrika inhou.
“Ottis Gibson ken ons uiteraard baie goed, so ek is seker hy sal 'n paar goeie planne beraam,” sê Wood van die Protea-breier, wat vroeër Engeland se boulafrigter was.
“Die Protea-spelers sal boonop vuur en vlam wees, want hulle sal die gasheerland 'n ding of twee wil wys.”
Net voordat hy in die nette begin kolf het, het Morgan ook die media te woord gestaan. Hy sê die gunsteling-etiket wat so styf om Engeland se nek sit, sal hulle nie verwurg nie.
“Dit is 'n groot kompliment. Daardie druk is goed,” sê Morgan.
“Ek verkies veel eerder om as die gunsteling te begin as om nie eens as aanspraakmakers gereken te word nie.”
Suid-Afrika ken die juk van 'n gunstelingetiket alte goed. Dit het hulle in die verlede al lamgelê.
Vanjaar is die Proteas egter nie 'n gunsteling nie. Dink Morgan dít maak hulle juis gevaarlik?
“Ek is nie seker nie,” sê hy.
“As jy teen 'n span speel, sien jy hulle nie as gunstelinge of buiteperde nie. Dit gaan oor dít wat op die dag gebeur en dit is waarop ons sal fokus.”
Volgens die Engelse boulers Liam Plunkett en Adil Rashid beskik die Proteas juis oor spelers wat die lewe Donderdag vir die Engelse moeilik kan maak.
“Hulle het goeie kolwers. Quinton de Kock kan die wedstryd swaai, Faf du Plessis ook,” sê die snelbouler Plunkett.
“Hashim Amla is ook 'n groot speler, ek het destyds saam met hom by die Dolphins gespeel.”
Rashid het dieselfde drie Proteas uitgelig.
“Hulle het spelers van wêreldgehalte soos Hashim, De Kock en Du Plessis,” sê dié bybreekbouler.
Die Engelse steur hulle egter nie daaraan nie. Daar is selfvertroue in lede van die Engelse kamp wat nog nie voorheen by 'n WB was nie.
“Ons het 'n span deurspek van wêreldklasspelers. Ons het die selfvertroue dat ons enige teikens kan haal,” sê Rashid.
“Ons huiwer nie, ons twyfel nie. 'Ons kan dit doen,' is die gevoel in die kleedkamer, want ons het kolwers van wêreldgehalte van nommer een al die pad tot die laaste kolwer.
“Selfs al moet ons 400 jaag, glo ons dat ons dit kan doen.”
– Netwerk24
Kommentaar
Republikein
Geen kommentaar is op hierdie artikel gelaat nie