Armoede sedert 1993 gehalveer

Estelle de Bruyn - Armoede in Namibië het sedert 1993 gehalveer van 69 persent in daardie jaar tot 30 persent in 2010. Dit kan toegeskryf word aan die groot toekennings in die nasionale begroting aan die maatskaplike, onderwys en gesondheidsekore.So sê die minister van finansies, mnr. Calle Schlettwein, wat Woensdag in die Nasionale Vergadering in ’n ministeriële verklaring ’n oorsig oor die staat se rol in die land se ekonomie gegee het.“Die maatskaplike veiligheidsnette is die eerste linie van verdediging teen armoede en weerloosheid. Namibië is een van net drie lande in Afrika suid van die Sahara wat maatskaplike veiligheidsnette vir weerlose burgers verskaf,” het Shlettwein gesê.Hy sê die prestasies is hoofsaaklik deur die mobilisasie van eie bronne teweeg gebring. Hierbenewens word 98 persent van die nasionale begroting ook uit eie bronne gefinansier met skenkings wat ’n klein fraksie van die begroting uitmaak. Boonop het die land die afgelope tien jaar ’n gemiddelde groeikoers van 4,6 persent per jaar gehandhaaf, ondanks die ernstige gevolge van die globale finansiële krisis.Gevolglik is die regering van mening dat die rol wat die staat in die ontwikkeling van die land gespeel het, regstreeks tot die ontwikkeling van sosioëkonomiese ontwikkeling bygedra het.Schlettwein sê misleidende sieninge oor die omvang van die regering se betrokkenheid en ondersteuning van die plaaslike ekonomie en maatskaplike ontwikkeling, word soms gehoor en om dié rede het hy dit nodig geag om die saak in perspektief te stel.Hy sê die regering se rol in die ontwikkeling van die land is in die Grondwet geanker wat bepaal dat die regering by maatskaplike en ekonomiese transformasie betrokke moet wees. Dit is veral nodig in die lig van die skeefgetrekte ekonomie en die geskiedkundige verlede van ongelyke toedeling van bronne, maatskaplike en ekonomiese uitsluiting en die onvermoë van die private sektor om op sy eie en binne ’n vryemark ekonomie, die ekonomie te laat groei en terselfdertyd ekonomiese en maatskaplike ongelykheid die hoof te bied.As deel van die proses het die regering nasionale instellings, openbare ondernemings en regulerende liggame deur middel van beraadslaging ontwikkel en plaaslike en internasionale deskundiges betrek. Dit is ook met die Harambee-plan vir voorspoed gedoen.“Soos ons vorentoe gaan, moet ons hierdie pogings verskerp deur middel van die implementering van die Harambee-plan vir voorspoed en die lang termyn nasionale ontwikkelingsplanne en Visie 2030. Ons implementeer die ‘groei tuis strategie’ as ’n meganisme vir die implementering van ons nasionale beleid van industrialisering,” het Schlettwein gesê.Hy is vol vertroue dat die land op die regte pad is en dit is deur die private sektor, die burgerlike samelewing en eksterne deskundiges deur middel van bilaterale en multilaterale vennootskappe bevestig, het Schlettwein gesê.

Armoede sedert 1993 gehalveer

Kommentaar

Republikein 2026-04-17

Meld asseblief aan om kommentaar te lewer

Armoede sedert 1993 gehalveer

Kommentaar

Republikein 2026-04-17

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.