Arbeidsbetrekkinge in praktyk

Elvira Hattingh - “Goeie arbeidsbetrekkinge hang af van goeie arbeidspraktyke, – rekordhouding, -kommunikasie asook ‘n gelukkige plaasgemeenskap. Boonop is dit belangrik om op hoogte te bly ten opsigte van jou verantwoordelikhede wanneer dit by die Grondwet asook die arbeidswet kom.”Me. Sonja Pack, wat saam met haar man op die plaas Grünental boer, het tydens die Landbouwerkersvereniging (LWV) se kongres vroeër vandeesmaand oor goeie arbeidsbetrekkinge in die praktyk op plase gepraat. Volgens haar is dit belangrik om diensvoorwaardes toe te pas soos dit wetlik voorgeskryf word, moet plaaswerkers markverwante vergoeding ontvang en behuising soos deur die wet voorgeskryf. Boonop is die werkgewer verplig om ook ‘n veilige werksomgewing en -werksklere te verskaf.“Registreer jou werkers by die Maatskaplike Voorsorgfonds (SSC) so gou as moontlik nadat hulle vir jou begin werk het. Dit sluit hul vrouens in, wat hier en daar met iets op die plaas help en dalk nie noodwendig met die mans getroud is nie. Dit beskerm hulle wanneer dood of teëspoed hul families tref.“Die administrasiewerk is harde werk, maar noodsaaklik. Dit sluit in om ‘n skriftelike dienskontrak te hê, ‘n posbeskrywing te verskaf, rekord te hou van verlof, werkstye en oortyd en ook om ‘n dissiplinêre kode en plaasreëls te hê.” Pack het gewys dat sy vir elke werker op Grünental ‘n lêer het, waarvan onder meer afskrifte van al hul persoonlike dokumente gehou word, asook alle rekords.“Die Nambië Landbou-unie het verskeie arbeidsdokumentasie beskikbaar en indien alles op rekord is, ontstaan min of geen misverstande nie,” het Pack gesê.Die praktiese toepassing van die arbeidsbeginsels op Grünental behels dat soggens vir ‘n kort tydjie vergader word, waartydens ‘n bywoningsregister ingevul word, enige besoekers aangemeld word en werkopdragte uitgedeel word. “Ontbyt, middagete en oortyd word daagliks ingevul en die plaaswinkel word elke Dinsdag en Vrydag oopgemaak. Rantsoen, wat drie liter melk en ses kg vleis insluit, word weekliks gegee.”Pack sê dit is ook belangrik om jaarlikse salarisverhogings te gee wat by prysstygings aanpas. Op Grünental word ‘n jaarlikse bonus op grond van goeie werk gegee. Dit behels dat maandeliks saam besluit word of iemand vir ‘n gegewe maand volpunte vir sy werk kry. Al die maande word dan eindelik saamgetel om te bepaal wat die werknemer se bonus aan die einde van die jaar sal wees.“Kommunikasie tussen werkgewer en werknemer is ‘n noodsaaklike voorvereiste vir gesonde arbeidsbetrekkinge,” het Pack gesê. Dienooreenkomstig word gereelde langer vergaderings gehou waartydens werkers sekere onderwerpe kan bespreek – tans praat sy met haar werkers oor ‘n pensioenfonds.Sy het ook die Griekse filosoof en wetenskaplike, Aristoteles, aangehaal wat gesê het “Pleasure in the job puts perfection in the work.”Volgens haar is dit belangrik om werkers te komplimenteer, maar ook te motiveer waar nodig.“Verstaan dat hul geletterdheid en taalvaardigheid ook beïnvloed hoe goed hulle jou opdragte verstaan. “Die bemagtiging van werkers skep verantwoordelikheid onder hulle.”Pack meen ‘n gelukkige plaasgemeenskap is ook noodsaaklik vir ‘n suksesvolle boerdery.“Die werknemer en werkgewer woon saam op die plaas en families moet gelukkig wees. Jy moet klipbehuising met sanitêre geriewe bied, soos deur die wet voorgeskryf en wat groot genoeg vir almal is. Skoolkinders moet vervoer na skole hê en in gevalle van ongelukke of siekte, moet vervoer na ‘n kliniek of hospitaal gebied word.“Indien ou mense of pensioentrekkers op jou plaas woon, moet jy ‘n kontrak met hulle aangaan om seker te maak hul kinders of ander mense kom woon nie sommer net ook op die plaas nie.“Op Grünental bied ons spanbou in die vorm van ontspanning – soos sokker of Bybelstudie. Ons bied ook opleiding vir werkers in byvoorbeeld noodhulp, beeskursusse, sweiswerk, naaldwerk en kook,” het Pack gesê.Werkers word toegelaat om ‘n sekere aantal vee aan te hou en elkeen het ‘n groentetuin.

Arbeidsbetrekkinge in praktyk

Kommentaar

Republikein 2025-06-06

Meld asseblief aan om kommentaar te lewer

Arbeidsbetrekkinge in praktyk

Kommentaar

Republikein 2025-06-06

Meld asseblief aan om kommentaar te lewer

MELD AAN

Advertensie