Aranos vir vier maande uit
Die ervare vaskopstut Aranos Coetzee het laas Sondag die veld met 'n besering verlaat ná skaars 27 minute van die rugbytoets op Stellenbosch wat Namibië met 60-24 teen Kenia gewen het. Die Namibiese spandokter dr. Vernon Morkel het gister aan die koerant bevestig dat die 22-jarige stut van die Vrystaat-Cheetahs 'n volledige skeur in 'n ligament in sy regterboarm, naby die elmboog, opgedoen het en dat hy gister op Stellenbosch geopereer is. Coetzee, lid van die 2015 en 2019 Wêreldbekerspanne en met 25 toetse agter sy naam, is teen Kenia deur die debutant Gerhard Opperman vervang. Met 'n vyfde stut as lid van die toergroep (Chemigan Beukes van FNB Western Suburbs, nog 'n nuweling) het die afrigterspan besluit daar is genoegsame dekking om nie 'n stut vanaf die kortlys te laat invlieg nie. Namibië speel Saterdag in die eindstryd van Wêreldrugby se Stellenbosch-uitdaagtoernooi teen Zimbabwe. Skermgreep YouTube (World Rugby)
Kommentaar
Republikein
Geen kommentaar is op hierdie artikel gelaat nie