AR wil land uit Windhoek regeer

Denver Kisting – Die Regstellende Herposisioneringsbeweging (AR) onder sy voorbok, mnr. Job Amupanda, se leiding, wil minstens 50 000 huise bou sodra hy in Windhoek aan bewind kom.Die dae is verby om in ’n hoofstad te woon waarvan die leierskap aan die noodlot uitgelewer is, het Amupanda gistermiddag op ’n nuuskonferensie in die hoofstad gesê. “Politiek kan nie meer gaan oor mense wat oor ballingskap praat nie,” het hy by die Katutura-jeugsentrum gesê.Behuising bly die spilpunt waarom hul fokus wentel, sê die grondaktivis en dosent.Hy’t sy doelwit behaal as hy ’n gesin se waardigheid kan herstel met ’n dak oor hul kop indien hul huidige omstandighede meebring dat die kind met hul ouers ’n kamer deel en hulle waarskynlik sien seks het, sê hy.Sodra hulle aan bewind kom in Windhoek, wil hulle die land uit dié plaaslike owerheid bestuur, sê hy.Amupanda het kritici afgelag wat sê hul steun is hoofsaaklik in ’n virtuele ruimte, soos op sosialemediaplatforms. Hulle het geen obsessie met getalle nie, sê hy. “Ons staan vir onsself. Ons is gemaklik in ons eie vel.”GELUK ‘OOK BELANGRIK’In ’n verrassingswending het Amupanda gister onthul hulle het die geluk van hul inwoners ook in hul visier.Daarmee saam wil die AR werkloosheid in Windhoek pak, sê Amupanda.Hy sê hulle gee nie om as niemand hul beloftes glo nie. “Hoekom moet ek iemand mobiliseer wat nie in ons programme glo nie?”Ramatex, die mislukte tekstielfabriek, gaan weer oopgemaak word en die AR sal dié witolifant inspan om die uniforms van alle munisipaliteitswerknemers, soos die stadspolisie en skoonmakers, plaaslik te vervaardig, sê Amupanda.Daarnaas, voer hy aan, gaan die plaaslike owerheid onder hul leiding 3 000 mans en vroue as veiligheidswagte in diens neem.Hy sê dié dienste gaan billiker as die huidige prys aangebied word. Volgens hom weet hy van ’n tersiêre instelling wat tans N$2,5 miljoen per maand opdok vir ’n sekuriteitsmaatskappy.Sou hy burgemeester word, sal hulle soortgelyke dienste vir meer as die helfte minder aanbied, het hy gister beweer.Die beweging beplan voorts om koste te besnoei deur ’n bestuurstruktuur in werking te stel wat uit gesekondeerde kundiges bestaan, sê hy.Indien ’n akademikus of ’n staatsamptenaar, byvoorbeeld, oor vaardighede beskik wat die stad benodig, gaan hulle ’n ooreenkoms met hul werkgewer en die individu sluit vir hul sekondering na die munisipaliteit, verduidelik hy.Mnr. Dimbulukeni Nauyoma, ’n ander AR-leier, het gister gesê sedert hulle vyf jaar gelede begin stof opskop het oor Windhoek se behuisingskrisis het korrupsie glo die hoogte ingeskiet by die munisipaliteit.“Hierdie storie van Windhoek is ’n hartseer storie en dit moet stop,” het hy gesê.Die hoofstad se strate is lankal nie meer veilig nie, het hy gesê met verwysing na beweerde gewelddadigheid aan die hand van die owerhede betrokke by teenmisdaadoperasies. Die mense wie se werk dit is om inwoners se veiligheid te waarborg, “het geen belangstelling om dit te doen nie”, het Nauyoma gesê.Hul berekening is informele nedersettings sal binne die volgende vyf jaar met tussen 5% en 10% toeneem. “Is ons as ’n generasie bereid om toe te laat dat ons toekoms en dié van ons kinders voor ons oë vernietig word? Dít is die vraag wat ons in die gesig staar.”Volgens mnr. George Kambala, ’n ander AR-leier, gaan hul op Onafhanklikheidsdag volgende jaar hul manifesto amptelik bekend stel.Namibiërs sal vir die eerste keer ’n keuse hê of hulle op 21 Maart broodjies gaan eet op Onafhanklikheidstadion en of hulle by ’n belangrike gesprek oor hul toekoms betrokke wil wees, sê Kambala.- denver@republikein.com.na

AR wil land uit Windhoek regeer

Kommentaar

Republikein 2026-06-10

Meld asseblief aan om kommentaar te lewer

AR wil land uit Windhoek regeer

Kommentaar

Republikein 2026-06-10

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.