Anti-wetenskap vs. anti-entstof

Iréne-Mari van der WaltMy pa is ’n ivermektien-man. As my selfoon se skerm die woord “Pa” flikker dan berei ek my al voor om van ivermektien te hoor. Jy kan sê wat jy wil oor oneerbiedigheid, maar in ’n onlangse gesprek wat natuurlik oor ivermektien gegaan het, het ek effens my bedaardheid verloor. “Pa, ons praat elke keer oor ivermektien en die entstof. Ek wil nie meer nie. By die werk hoor ek deesdae net van Covid. As ek die foon antwoord, is dit iemand wat vra oor ivermektien, óf die entstof, óf die nuutste Covid-syfers. Ek is moeg om oor Covid te praat. Ons praat elke keer oor Covid en ivermektien en ons weet nou al ons stem nie saam nie,” spoel die woorde uit my uit, en ek hoop die irritasie in my stem is nie vir hom so duidelik soos dit vir my is nie. My pa het wel nie die uitbarsting verdien nie, maar nog minder verdien ’n vriendin die raad van ’n kennis dat sy gaan dood neerval as sy nie blitsvinnig die Covid-entstof ontvang nie. Hoewel daar min wetenskaplike bewyse agter ivermektien is, loop die irritasie hoog onder diegene wat ongelukkig genoeg is om deur die bytende entstof-trompoppies deur te loop.My ma het my altyd gewaarsku wat sou met my gebeur as ek soos die Engelse spreekwoord vuur met vuur sou beveg. “My kind, om tot op hulle vlak te daal, gaan jou laerklas maak en hulle g’n hoër nie,” het my ma een middag vir my met haar hande oor haar buik gevou gesê. “Om net so sleg soos hulle te raak, los nie probleme op nie,” sê sy so koel soos daardie middag se briesie, terwyl ek hygend van die hartseer afpak oor ’n onderonsie by die skool. Ons kla daar is nie genoeg tasbare wetenskaplike bewyse vir die gebruik van ivermektien teen Covid-19 nie, maar intussen forseer ons idees wat met min wetenskap ontwikkel is. Ek hou voet by stuk dit is elkeen se eie reg om te besluit. Ek is heeltemal vir inenting, maar sou jy vir my jou redes opnoem, sal ek jou toelaat om daardie besluit vir jouself te neem. Sou jou redes nie heeltemal in logika getooi wees nie, gaan ek wel probeer om jou met akkurate feite te benader, maar daarna bly dit jou keuse. As mense onseker oor ’n entstof is, is anti-wetenskap glad nie die regte paadjie om te volg nie. Ontspan, die wetenskap is aan ons kant. Doen wat jy kan om mense met feite te oortuig en laat die res aan die toekoms oor. Jy kan nie veel beter as dit doen nie. Anti-wetenskap maak mense net anti-entstof, en dit is juis wat ons nie wil hê nie.

Anti-wetenskap vs. anti-entstof

Kommentaar

Republikein 2025-09-08

Meld asseblief aan om kommentaar te lewer

Anti-wetenskap vs. anti-entstof

Kommentaar

Republikein 2025-09-08

Meld asseblief aan om kommentaar te lewer

MELD AAN

Advertensie