Angelina blom in die Namib

Die Hollywood-ster en kampvegter vir menseregte, Angelina Jolie, smeul in die Namib op die voorblad van die internasionale modetydskrif Harper's Bazaar se gedenkuitgawe vir sy 150ste bestaansjaar. Die voorbladfoto van Angelina en ander pragfoto's van haar, die San en drie jagluiperds van die N/a'an ku sê-stigting in dié besondere uitgawe is by Kanaan in die suide van Namibië geneem. Die fotosessie het tydens Angelina en haar ses kinders se besoek einde Junie aan Namibië plaasgevind toe sy en haar Namibies-gebore dogter, Shiloh Jolie-Pitt, die Shiloh Wildlewe-toevlugsoord geopen het. Dié oord is deel van die bekende omgewingsbewaarders en aanbieders van Groen: Namibië, dr. Rudie en me. Marlice van Vuuren, se N/a'an ku sê-stigting. Die November-uitgawe van Harper's Bazaar sal op 24 Oktober op die rakke wees. Foto's Harper's Bazaar