Andersoortige ambassadeur

Ronelle Rademeyer - “Kom ons leer as Namibiërs van mekaar se kulture. “Kom ons deel ons diverse kultuuraktiwiteite, kos, leefstyle en kuns.”Só nooi Sakaria Gumede Kandenge op die Facebook-groep Namibian Cultures sy medelandgenote uit om mekaar as eiesoortige kultuurgroepe te leer ken.Dié 29-jarige jeugbeampte van die ministerie van jeug, nasionale diens, sport en kultuur op Lüderitz is die afgelope maande ’n bekende “gesig” op Facebook, met ’n rits aanhangers wat baie aktief op sy plasings kommentaar lewer.As een van die administrateurs van Namibian Cultures, plaas hy byna daagliks foto’s en brokkies inligting oor die kultuur en tradisies in die Noorde. Of dit nou is oor oshikundu, ’n Oshiwambo-bier, iinkili, ’n insek wat as lekkerny geëet word, die wildebessies (eembe) waaroor mense in die Noorde gaande is of die eentangu, “’n lekker varswatervis wat in die efundja se seisoenale vloedwater voorkom”. . . Plasing vir plasing stel hy mede-Namibiërs aan sy leefwêreld voor.Geen wonder nie sy aanhangers is meestal wit Namibiërs wat weinig kennis van die Oshiwambo-kultuur het.Reën in Namibia is die ander Facebook-groep waar Sakaria se plasings groot aanhang geniet.Tydens die reënseisoen vroeër vanjaar het sy plasings oor die efundja, of die seisoenale vloedwater wat stadig uit Angola suidwaarts vloei, veral baie aandag getrek.Bemarker van formaatSakaria is op Ondangwa gebore en noem dié dorp steeds “my huis”. Hy het op Khorixas skoolgegaan en sy werk as jeugbeampte het hom na Lüdertiz geneem.Dit is op laasgenoemde twee dorpe waar hy Afrikaans leer lees en skryf het en hy praat die taal so aksentloos en beeldryk soos ’n moedertaalspreker.Sakaria sê hoewel hy ná skool ’n kursus gedoen het in plaaslike regeringsbestuur en ’n staatsamptenaar geword het, lê toerisme en bemarking hom baie na aan die hart.“Owamboland is een van die pragtigste plekke in Namibië, maar baie mense ken dit nie. Ek het besluit ek wil vir hulle wys dit is ’n plek vir toeriste. Ek het besluit ek doen bemarking vir Owamboland,” vertel hy in ’n onderhoud aan Republikein.“Dié gebied het geweldig baie potensiaal, maar dit is nog onderontgin. Vat nou maar die Oponona-meer en die fonteine net noord van Etosha. Dit moet ontwikkel word as toerismebestemmings.“Ek noem daardie gebied net voor Ondangwa met die baie makalani-palms die vallei van duisend palms. Dit het baie potensiaal. Ons moet dit benut. Ons mense noem die vrug van die makalani-palm eendunga en dit word gebruik om ombike van te maak. Maar ons moet hierdie palmwyn op groot skaal maak en bemark,” sê Sakaria.ToekomsdromeDié geesdriftige jeugbeampte het egter ook ander belangstellings waarin hy hom in die toekoms wil uitleef.“Ek stel baie in besigheid en politiek belang,” sê Sakaria wat alte bewus is van die baie geleenthede wat in die Noorde opgesluit lê.Hy is ook baie lief vir musiek en skryf en komponeer sy eie liedjies. “Ek hou veral van Afro-pop,” vertel hy.

Andersoortige ambassadeur

Kommentaar

Republikein 2025-08-05

Meld asseblief aan om kommentaar te lewer

Andersoortige ambassadeur

Kommentaar

Republikein 2025-08-05

Meld asseblief aan om kommentaar te lewer

MELD AAN

Advertensie