Amperse wêreldrekord vang Tatjana heel onkant

Marizanne Kok – “Dit was eerlikwaar die beste resies wat ek nog ooit gehad het – verreweg.” So het ’n oorstelpte Tatjana Schoenmaker gister in Tokio gejubel nadat sy nog ’n keer ’n Olimpiese uitdun gebruik het om ’n waarskuwingskoot af te vuur – en dié keer luid genoeg om oordromme te bars.Die 24-jarige Pretorianer is nou die eienaar van die naasbeste tyd tot nog toe in die 200 m-borsslag vir vroue nadat sy Woensdag ’n skrale vyf-100stes van ’n sekonde stadiger as die wêreldrekord was. Haar tyd van 2 minute 19.16 sekondes is ’n nuwe Olimpiese rekord en net minder as ’n sekonde vinniger as haar vorige Afrika-rekord.Belangriker egter, in die konteks van die Olimpiese silwerware wat op die spel is, is dat sy byna drie sekondes vinniger as enige ander vrou in die uitdunne was. Lilly King, wat brons ontvang het toe Schoenmaker Dinsdag silwer in die 100-borsslag losgeswem het, was die “beste van die res”, met ’n 2:22.10 wat soos ’n slakkepas langs Schoenmaker se nuwe rekord lyk.“Ek het my beste tyd vandag met nog ’n sekonde verminder; so ek is baie, baie gelukkig,” het Schoenmaker gesê, wat so oorstelp was toe sy haar tyd sien dat sy tranerig geraak het.“Ek het my afrigter in ’n stadium hoor skree en gedink, ‘Wat nou, gaan ek te stadig?’” het sy gelag.“Ek was juis senuweeagtig ná die eerste 100, want ek moes ’n hele ekstra 100 swem (oor die drie dae voor dit) en was nie seker hoe ek sou voel nie.”Die uitdunne van die 200-borsslag was uiteindelik nie net ’n triomftog vir Schoenmaker nie, maar ook vir haar mede-Tukkie en goeie vriendin Kaylene Corbett.Corbett was in aksie in die tweede uitdun (twee uitdunne voor Schoenmaker) en het dit op ’n spreekwoordelike drafstap gewen.Die 22-jarige het ’n yslike persoonlike beste tyd van 2:22.48 opgestel. Dis meer as ’n sekonde en ’n half beter as haar vorige beste van 2:24.18 en het haar die vierde vinnigste swemmer van die uitdunne gemaak.Boonop het dit Schoenmaker aangevuur.“Ek was so gemotiveerd ná ek haar enorme persoolike beste gesien het – sy moet in die wolke wees,” het Schoenmaker oor Corbett gesê.“Ek was net bang al daardie opwinding maak my moeg, maar ek het darem gefokus gebly. Ek het geweet as sy ’n goeie resies kon hê, sou ek ook.”Die rekordbreker sê sy het nie in haar wildste drome verwag om so naby aan die wêreldrekord te kom nie.“Nee, dit was ver onder die tyd wat ek geteiken het,” het sy ’n vraag daaroor laggend beantwoord.“Ek het by ons Olimpiese proewe ’n massiewe beste tyd opgestel, daai 2:20, en gevoel as ek weer naby daaraan kom, sou ek tevrede wees.“Maar hier is ons nou en ek los hierdie dinge altyd in God se hande. As dit Sy wil is dat ek aanhou persoonlike beste tye swem, is ek baie tevrede daarmee.” – Netwerk24FOTOIs dit regtig my tyd daardie? Tatjana Schoenmaker het gister tegelykertyd gelag en gehuil nadat sy die tyd gesien het waarmee sy die uitdunne van die 200 m-borsslag oorheers het. Foto Getty Images

Amperse wêreldrekord vang Tatjana heel onkant

Kommentaar

Republikein 2025-12-16

Meld asseblief aan om kommentaar te lewer

Amperse wêreldrekord vang Tatjana heel onkant

Kommentaar

Republikein 2025-12-16

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.