Allister afwesig voor toets

Andrew Poolman – Enige moontlike swak plekke in die Namibiese mondering sal komende Sondag uitgewys word in die rugbytoets teen Kenia op Stellenbosch.Die wedstryd se afskoptyd is om 16:00 en word voorafgegaan deur die ander kragmeting in Wêreldrugby se vierhoekige Stellenbosch-uitdaagtoernooi, tussen Brasilië en Zimbabwe om 14:00. Op Saterdag 20 November speel die twee verloorders uit om die derde plek, voor die finaal van die toernooi.Kenia en Namibië hervat hul aartsvyandskap met hierdie kleedrepetisie vir volgende jaar se beslissende toernooi in Frankryk wat Rugby Afrika se kwalifiseerder vir die 2023 Wêreldbeker, ook in Frankryk, sal bepaal.Sedert die 2019 Wêreldbeker in Japan was Allister Coetzee se oorname by sy voorganger Phil Davies een van die groot veranderinge. In dié tyd was Coetzee se enigste toetse in Juliemaand vanjaar in Abidjan, waar sy span teen Ivoorkus bloedneus gekry het en daarna wel teen Madagaskar terug op stryk gekom het.Kenia het ook van afrigter en kaptein verwissel sedert sy laaste ontmoeting met Namibië in Augustus 2018, toe Johan Deysel en sy manne ’n veel harder stryd beleef het as wat die eindtelling van 53-28 laat blyk.Coetzee het egter nie laas naweek soos verwag in Stellenbosch vir die nasionale oefenkamp voor vandeesweek se toets aangesluit nie. Coetzee, wat ook voltyds by die Italiaanse klub Rovigo afrig, het teen druktyd nie op die koerant se navraag gereageer nie en die Namibië Rugby-unie (NRU) se president, mnr. Corrie Mensah, wou nie kommentaar lewer nie. Die NRU se uitvoerende hoof, mnr. Theo Grünewald, het gesê hy is eerlikwaar nie ingelig oor die rede dat Coetzee toe nie einde laasweek die reis Kaap toe aangepak het, waar die Suid-Afrikaner se familie is nie. “Ek weet wel dat toestemming vir sy afwesigheid reeds met Wêreldrugby uitgeklaar is en dat hy deurentyd met die res van die afrigterspan in verbinding bly.”Vir vandeesweek se oefenkamp was Pine Pienaar, die kontak- en verdedigingsafrigter wat vir jare aan die Blou Bulle verbonde was, die de facto afrigter van Namibië. Barend Pieterse, voormalige Springbokslot, is ook daar as afrigter van die voorspelers.Die Namibiese lede van die afrigterspan, Jood Opperman (voorspelers) en Robbie Dickson (tegniese ontleder), het nie uit Windhoek saamgereis nie; net die krag- en fiksheidsafrigter Sergio de la Harpe en aanvalsafrigter Chrysander Botha wel.NUWELINGEJohan Deysel, kaptein en veteraan van twee Wêreldbekers, se kalm dog vasberade leierskap is terug in sy eerste toetsverskyning sedert Japan 2019.In dieselfde situasie is bewese staatmakers soos JC Greyling, Cliven Loubser, Janco Venter, Wian Conradie en Aranos Coetzee – wat hierdie Namibië-span véél sterker laat lyk as die een wat nie by Ivoorkus kon verbykom nie.Renaldo Bothma maak ook ’n merkwaardige terugkeer tot toetsrugby ná sy laaste in November 2018, met Adriaan Booysen wat op die bank sy kans afwag.Die inskakeling van die nuweling Danco Burger as Deysel se sentermaat sal met groot belangsteling dopgehou word. Die oudskolier van Elnatan en Namibiese o.20-speler het vanjaar Varsity-rugby vir die Shimlas gespeel.Lorenzo Louis van die Universiteit van Namibië is vir sy debuut as heelagter gekies, eerder as die gesoute Johann Tromp (45 toetse) wat nie die naweek betrokke is nie. Die derde nuweling is Herschell van Wyk, wat in die afwesigheid van ’n klompie beseerde staatmakers sy kans kry om te wys dat sy vordering as klubspeler vir Wanderers nie die kenners van stutspel verniet opgewonde gemaak het nie.Kenia is reeds op toer in Suid-Afrika en is gretig om die lesse toe te pas wat die gedugte Curriebeker-droomspan hom laas naweek met 85-17 op Loftus Versfeld geleer het.Die Namibiese span (getal toetse tussen hakies):15 Lorenzo Louis (0)14 Oderich Mouton (3)13 Johan Deysel (kaptein, 26)12 Danco Burger (0)11 JC Greyling (35)10 Cliven Loubser (17)9 Damian Stevens (27)8 Renaldo Bothma (17)7 Janco Venter (28)6 Wian Conradie (19)5 Max Katjijeko (17)4 Pieter-Jan van Lill (53)3 Aranos Coetzee (24)2 Obert Nortjé (19)1 Herschell van Wyk (0)Reserwes: 16 Louis van der Westhuizen (21), 17 Jason Benade (4), 18 Gerhard Opperman (0), 19 Johan Retief (12), 20 Adriaan Booysen (9), 21 Helarius Kisting (13), 22 Henrique Olivier (1), 23 Jayden Bussel (0).VROUETOETSIn Windhoek loop die Namibiese vrouespan oor van opgewondenheid oor hul eerste vyftien-toets in agt jaar, môre om 16:30 in die Hage Geingob-stadion.Afrigter CJ Kotzé se vrouespan sien kans vir die besoekende Zambië (32ste op die wêreldranglys) en die gedagtegang is dat Namibië se 52ste plek bloot weens jare van onaktiwiteit was.Kotzé se entoesiasme is deels gegrond op die suksesvolle seisoen waarin vyf klubs volwaardig tot stand gekom het. Nadat Grootfontein en Okahandja Huskies aanvanklik sou kombineer, het beide intussen genoeg spelers gewerf om op hul eie bene te staan.Die Namibiese span sou eers by gisteraand se oefening bevestig word, maar dit is wel bevestig dat Grootfontein se agtsteman Fulchen Bock (die enigste oorblywende lid van die laaste vrouetoetsspan in 2013), die span as kaptein sal aanvoer.Volg môre die regstreekse video-uitsending van die vrouetoets op Republikein se Facebook-blad.FOTO’s VERSKAFDie stut Aranos Coetzee.Fulchen BockJohan Deysel doen strekoefeninge in Stellenbosch.Pine Pienaar is vandeesweek die de facto afrigter van Namibië.Die flanke Janco Venter (links) en Wian Conradie.

Allister afwesig voor toets

Kommentaar

Republikein 2026-02-05

Meld asseblief aan om kommentaar te lewer

Allister afwesig voor toets

Kommentaar

Republikein 2026-02-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.