Alle goeie dinge kom tot ’n einde

Anja Steenkamp van Elnatan Privaatskool - Om aan die einde van ’n 12-jaar siklus te kom bring baie emosies na vore. Sedert 2006 is ek betrokke by die NAPSO Privaatskole Wintersport byeenkoms, maar 2017 was werklik een om te onthou. Buiten die goeie gasvryheid van Windhoek Afrikaanse Privaatskool, was daar ook ’n oorvloed van trots.
Trots kom by dié byeenkoms in baie vorme voor; dis die klein tjokker wat sy eerste drie druk, papa se meisiekind wat haar eerste netbalbal raak vang, die ouers wat harder speel langs die kantlyn en die matrikulant wat vir die laaste keer sy tekkies aantrek. Dis iets wat ek voel eie is aan hierdie byeenkoms. Daar is nie ’n ander byeenkoms wat soveel sportsoorte in soveel verkillende ouderdomsgroepe aanbied nie. Napso Wintersport naweek is ook die ideale byeenkoms waar ouers en hul kinders kans kry om weg te breek vanaf hul besige roetines. As ’n hoofleier van my skool (Privaatskool Elnatan) was my een van my hoogtepunte die optog. Dit was ’n ware eer om te stap met my mede-leiers aan my sy, die beeldskone meneer en mejuffrou voor my en my mede-skoliere agter my. WAP was goed voorbereid vir die massas wat hierdie naweek op hul neergesak het, want ek kan ongetwyfeld sê dat ek my eer deel met ander.
Die ander skole se sportmansgees was ook merkwaardig. Ons het mekaar reggehelp en gerespekteer op die hokkieveld. Langs die veld het ander spanne ook verenig om te ondersteun. Ten spyte van my trots teenoor my eie skool se ondersteuning, bieg ek dat ek ook trots is op die ander skole se ondersteuning. Die teenstanders het ten alle tye ook ondersteuners gehad. Waar kry mens nog só ’n byeenkoms waar gees en spanbou so verhef word?
My wens vir die toekoms is dat ons opvolgers ook die byeenkoms sal geniet vir die plesier wat hy bied. Mag Napso Wintersportnaweek groei en ontwikkel.