All Blacks moet ‘rugby red van vervelige Bokke’

Die Nieu-Seelandse rugbyskrywer Mark Reason sê die All Blacks is op ’n missie om rugby te red van die “vervelige Springbokke se dor wildernis”.
Reason vergelyk Saterdag se derde toets tussen die Bokke en Britse en Ierse Leeus met die eerste Bledisloebekertoets tussen Nieu-Seeland en Australië vroeër die dag.
“Die All Blacks wend minstens ’n poging aan om ’n tipe rugby te speel wat kreatiwiteit, denkvermoë en flair aanmoedig,” sê hy in ’n rubriek vir Stuff.
Reason braak ook gal oor skeidsregters wat al hoe meer staatmaak op televisiewedstrydbeamptes om die regte beslissings te maak.
“Daar in Kaapstad het beamptes vier minute geneem om ’n beslissing oor Cheslin Kolbe se drie te maak en dit steeds verkeerd gekry,” sê hy.
“Die spelers is keelvol vir hierdie nonsens en ons, die publiek, beslis ook.
“So, Wêreldrugby, doen weg met die TV-skeidsregter. Skeidsregters maak foute net soos die spelers. Kom ons aanvaar dit en beweeg aan soos feitlik elke liewe speler op ’n Saterdagmiddag aanbeweeg.”
Hy bekla ook die Bokke en Britse en Ierse Leeus se speelstyl.
“Wanneer Suid-Afrika se spelpatroon nie toelaat vir wyer speel nie, het ons ’n probleem. Wanneer die lyn net drie keer gebreek word, soos in die tweede toets, het ons ’n probleem. Wanneer die bal 50 keer in ’n wedstryd uit die hand geskop word, het ons ’n probleem. Wanneer die Leeus, met al daardie talent, in ’n hele toetsreeks van drie wedstryde slegs twee drieë met rolmaalbewegings kan druk, het ons ’n probleem.
“Ek wil nie sien dat Cheslin Kolbe en Anthony Watson, twee vlugvoetige sterre, hulle lewe mors deur in die lug te spring om vir hangskoppe mee te ding nie.
“Die Suid-Afrikaanse “bomb squad” van die Wêreldbekertoernooi is nou die “bomb squad” van eindelose hangskoppe. En genade, dit is vervelig om na te kyk.
“Ek het gedink die Wêreldbekerhalfeindstryd tussen Suid-Afrika en Wallis was die verveligste internasionale wedstryd van alle tye, maar hierdie reeks was byna ewe sieldodend.”
– Netwerk24