Algeriu00ebrs wys hul misnoeu00eb met leier
Algeriu00ebrs wys hul misnoeu00eb met leier

Algeriërs wys hul misnoeë met leier

Hoewel die massabetoging relatief vreedsaam verloop het, moes die polisie van traanrook gebruik maak en die pad na die paleis afsper.
Duisende Algeriërs het in Algiers hul stem dik gemaak teen pres. Abdelaziz Bouteflika in die grootste betoging wat dié land in die afgelope 28 jaar beleef het.

Terwyl die massabetoging Vrydag relatief vreedsaam was, moes die polisie by tye traanrook gebruik en het die pad na die presidensiële paleis gesluit.

Algeriërs is ontevrede oor korrupsie wat die ekonomie verswak en die hoë vlakke van werkloosheid.

Mense het die afgelope twee weke die strate van Algiers ingevaar om te betoog teen hul 82-jarige leier se planne om aan sy mag vas te klou.

Daar was nie net optogte in die hoofstad nie, maar ook in verskeie ander stede soos Constantine, Annaba, Skikda, Bouira en Tizi Ouzou.

'n Erg verswakte Bouteflika, wat die afgelope 28 jaar aan bewind is, sterk tans in 'n hospitaal in Genève aan. Hy het probleme met sy gesondheid ontwikkel ná 'n hartaanval in 2013 en het die laaste paar jaar feitlik uit die openbare oog verdwyn.

Bouteflika het wel Donderdag 'n waarskuwing aan betogers in sy land gerig deur te sê dat die voortslepende onrus 'n negatiewe invloed op dié Noord-Afrikaland het. Hy is van voorneme om weer op 18 April as president te staan.

Bouteflika se lang termyn as leier, wat gekenmerk word deur die oorheersing van oorlogsveterane afkoms­tig uit die oorlog vir onafhanklikheid teen Frankryk tussen 1954 en 1962, jaag Algeryne, wat vernuwing soek, die harnas in.

Oud en jonk van alle klasse in die samelewing protesteer in die strate, ondanks die feit dat Bouteflika vroeër aangebied het om sy “stelsel” te verander en die manier waarop hy die land regeer. Selfs vertrouelinge van Bouteflika, wat lede van sy politieke party insluit, het hul ondersteuning aan die betogers gebied – 'n duidelike teken dat daar krake in die regerende party ontwikkel.

Op sommige plakkate wat betogers Vrydag in die strate rondgeswaai het, staan “Bouteflika moet gaan!” en “Algerië is 'n republiek, nie 'n koninkryk nie”. –Netwerk24/Reuters

Kommentaar

Republikein 2025-05-03

Geen kommentaar is op hierdie artikel gelaat nie

Meld asseblief aan om kommentaar te lewer