Aksieplan teen miltsiekte

Francoise Steynberg - Met die uitbreking van miltsiekte in die Bwabwata Nasionale Park het 'n hoëvlak-afvaardiging die planne van aksie bespreek om te voorkom dat die hoogs aansteeklike siekte na mense en mak diere oorgedra word.Die afvaardiging bestaan uit amptenare van die ministeries van die omgewing en toerisme; landbou, water en bosbou se direktoraat veeartsenydienste; gesondheid en maatskaplike dienste; visserye en mariene hulpbronne; en die streeksraad van Kavango-Oos, verteenwoordig deur die Mukwe-kiesafdeling. Die uitbreking van miltsiekte is verlede Woensdag deur owerhede bevestig nadat meer as 100 seekoei- en 20 buffelkarkasse in die vloedvlakte van die Kavangorivier in die Bwabwata Nasionale Park gevind is. Volgens 'n gesamentlike verklaring van die ministeries behels die aksieplan om die uitbreking van miltsiekte in toom te hou dat 'n skoonmaakoperasie onmiddellik uitgevoer word deur al die karkasse te verwyder. Tydens die operasie sal sekere dele van die die westelike kant van Bwabwata vir toeriste en die publiek gesluit word. Volgens die woordvoerder van die ministerie van die omgewing en toerisme, mnr. Romeo Muyunda, is 20 seekoeikarkasse die naweek reeds verwyder en verbrand. Die direktoraat veeartsenydienste sal 'n inentingsveldtog teen miltsiekte onder beeste naby die park van stapel stuur. Veebewegings word in die Mukwe-kiesafdeling beperk. Die ministerie van gesondheid en maatskaplike dienste sal voorkomingsmedikasie aan mense gee wat aan die seekoeikarkasse blootgestel is, en wat die risiko dra om deur die siekte besmet te word. Die publiek word gewaarsku om enige kontak te vermy met enige dier wat weens 'n onbekende oorsaak gevrek het. Intussen het Botswana se ministerie van die omgewing, natuurlike hulpbronbewaring en toerisme ook bevestig dat seekoeikarkasse in die Kavangorivier na Botswana gedryf het en waarskuwings aan burgers gerig om nie aan enige karkasse te raak of die vleis te eet nie. Miltsiekte word deur die bakterie Bacillus anthracis veroorsaak en is hoogs aansteeklik vir mense en mak diere. SIMPTOME BY MENSEDie permanente sekretaris van landbou, water en bosbou, mnr. Percy Misika, het ook einde verlede week 'n verklaring uitgereik en die simptome van miltsiekte onder mense weergegee wat binne sewe dae ná besmetting kan voorkom:• Koors (temperature hoër as 36,9 °C). Koors kan met koue of nagsweet gepaard gaan; griepsimptome;• Hoes, ongemak in die borskas, kortasem, moegheid en seer spiere; • Seer keel, gevolg deur moeite om te sluk, vergrote limfkliere, hoofpyn, naarheid, verlies aan aptyt, maagpyn, braking of diarree; • 'n Seer, veral op die gesig, arms en hande, wat begin met 'n knop wat ontwikkel in 'n pynlose sweer met 'n swart area in die middel. Enigiemand wat aan miltsiekte blootgestel of daarmee besmet is, moet die naaste kliniek besoek.

Aksieplan teen miltsiekte

Kommentaar

Republikein 2025-07-21

Meld asseblief aan om kommentaar te lewer

Aksieplan teen miltsiekte

Kommentaar

Republikein 2025-07-21

Meld asseblief aan om kommentaar te lewer

MELD AAN

Advertensie