Akkerbouraad en Amta se paaie skei
Die sukkelende regeringsagentskap wat moet help met die bemarking en handel van plaaslike tuinbouprodukte het nog 'n bloutjie geloop.
Elvira Hattingh
Die Namibië Akkerbouraad (NAB) het gister aangekondig hy sal van 1 April af sélf die funksies vervul wat voorheen namens hom deur die regering se Landboubemarkings- en Handelsagentskap (Amta) hanteer is.
Dit sluit in die insameling van statutêre heffings en fooie, die uitreiking van vervoer-, invoer- en uitvoerpermitte, asook die bestuur van die beweging van akkerbou- en tuinbouprodukte by hawens en grensposte.
Volgens 'n kennisgewing van die raadsvoorsitter, mnr. Michael Iyambo, is die agentskap se dienste amptelik op 20 November 2018 beëindig ná hy in 2014 aangestel is.
Voorts sal die toepassing van die Namibiese Markaandeelbevorderingsplan (MSP) dus ook die NAB se verantwoordelikheid wees, terwyl dit ook beheer sal neem van voedselveiligheid, die nakoming van voedselstandaarde en die inspeksie van plase of geriewe.
Die NAB sal na verwagting nog op Republikein se vrae reageer oor hoekom die besluit geneem is, asook oor geldelike bystand wat hy onder meer in 2017 aan Amta verleen het.
Amta se besturende direkteur, mnr. Lucas Lungameni, kon nie gister telefonies bereik word nie, maar die agentskap se woordvoerder, wat daarop aandring om nie geïdentifiseer te word nie, het gesê die kennisgewing dat hul dienste opgeskort is, is nuus.
Hy sê Amta sal sy dienste as opgeskort beskou slegs indien hy kennisgewing daarvan van die regering ontvang.
Sonder só 'n kennisgewing gaan hy met dienslewering voort – selfs ook ná 1 April.
Republikein het in Augustus 2017 berig die Akkerbouraad het N$26 miljoen aan die sukkelende Amta gegee.
Dit was 'n driekwart van die geld wat die raad in 15 jaar in sy reserwefonds opgebou het.
Die agentskap het in Julie verlede jaar reeds sy laaste versamelpunte vir vars produkte gesluit toe hy sy kontrak met die Suid-Afrikaanse maatskappy Fysal Fresh Produce beëindig het.
Dit volg ná Amta in 2018 reeds beheer van sy versamelpunte by Ongwediva, Rundu en Windhoek aan Fysal oorgegee het.
Amta was verlede jaar verskeie kere in die nuus oor finansiële probleme, vermeende twyfelagtige grondtransaksies, en omdat hul bestuurders sedert 2013 glo te veel verdien.
Amta is ingevolge 'n kabinetsbesluit gestig as gespesialiseerde agentskap van die ministerie van landbou, water en bosbou om die bemarking en handel van landbouproduksie in die land te koördineer en bestuur.
Die agentskap se mandaat is om versamelpunte vir vars produkte te bestuur, asook die land se infrastruktuur vir nasionale strategiese voedselreserwes – alles ter wille van voedselveiligheid en -sekuriteit.
Die uitvoerende direkteur van landbou, water en bosbou kon nie gister vir kommentaar bereik word nie. [email protected]
Die Namibië Akkerbouraad (NAB) het gister aangekondig hy sal van 1 April af sélf die funksies vervul wat voorheen namens hom deur die regering se Landboubemarkings- en Handelsagentskap (Amta) hanteer is.
Dit sluit in die insameling van statutêre heffings en fooie, die uitreiking van vervoer-, invoer- en uitvoerpermitte, asook die bestuur van die beweging van akkerbou- en tuinbouprodukte by hawens en grensposte.
Volgens 'n kennisgewing van die raadsvoorsitter, mnr. Michael Iyambo, is die agentskap se dienste amptelik op 20 November 2018 beëindig ná hy in 2014 aangestel is.
Voorts sal die toepassing van die Namibiese Markaandeelbevorderingsplan (MSP) dus ook die NAB se verantwoordelikheid wees, terwyl dit ook beheer sal neem van voedselveiligheid, die nakoming van voedselstandaarde en die inspeksie van plase of geriewe.
Die NAB sal na verwagting nog op Republikein se vrae reageer oor hoekom die besluit geneem is, asook oor geldelike bystand wat hy onder meer in 2017 aan Amta verleen het.
Amta se besturende direkteur, mnr. Lucas Lungameni, kon nie gister telefonies bereik word nie, maar die agentskap se woordvoerder, wat daarop aandring om nie geïdentifiseer te word nie, het gesê die kennisgewing dat hul dienste opgeskort is, is nuus.
Hy sê Amta sal sy dienste as opgeskort beskou slegs indien hy kennisgewing daarvan van die regering ontvang.
Sonder só 'n kennisgewing gaan hy met dienslewering voort – selfs ook ná 1 April.
Republikein het in Augustus 2017 berig die Akkerbouraad het N$26 miljoen aan die sukkelende Amta gegee.
Dit was 'n driekwart van die geld wat die raad in 15 jaar in sy reserwefonds opgebou het.
Die agentskap het in Julie verlede jaar reeds sy laaste versamelpunte vir vars produkte gesluit toe hy sy kontrak met die Suid-Afrikaanse maatskappy Fysal Fresh Produce beëindig het.
Dit volg ná Amta in 2018 reeds beheer van sy versamelpunte by Ongwediva, Rundu en Windhoek aan Fysal oorgegee het.
Amta was verlede jaar verskeie kere in die nuus oor finansiële probleme, vermeende twyfelagtige grondtransaksies, en omdat hul bestuurders sedert 2013 glo te veel verdien.
Amta is ingevolge 'n kabinetsbesluit gestig as gespesialiseerde agentskap van die ministerie van landbou, water en bosbou om die bemarking en handel van landbouproduksie in die land te koördineer en bestuur.
Die agentskap se mandaat is om versamelpunte vir vars produkte te bestuur, asook die land se infrastruktuur vir nasionale strategiese voedselreserwes – alles ter wille van voedselveiligheid en -sekuriteit.
Die uitvoerende direkteur van landbou, water en bosbou kon nie gister vir kommentaar bereik word nie. [email protected]
Kommentaar
Republikein
Geen kommentaar is op hierdie artikel gelaat nie