Air Namibia: Drie direkteure bedank

Ronelle Rademeyer en Elvira Hattingh – Drie van Air Namibia se direksielede het bedank midde die likwidasieswaard wat oor die nasionale redery se kop hang. Hulle is die voorsitter, mnr. Escher Luanda, mnr. Willy Mertens en me. Heritha Muyoba. Hul bedanking is gister deur die minister van staatsondernemings, mnr. Leon Jooste, bevestig.Hul bedanking het bekend geword kort nadat die direksie gisteroggend in 'n verklaring die nuwe strategiese omkeerplan verdedig het.Air Namibia se direkteure sê dit is nie “feitelik korrek” dat hul herstruktureringsplan N$7 miljard gaan kos nie, terwyl dit in die beste belang van beide die redery en aandeelhouers is om likwidasie te vermy. Die plan om die redery in ‘n kleiner, meer mededingende en volhoubare entiteit te omskep en minstens 50% van sy personeel se poste te red, is die weg vorentoe, meen hulle. Die direkteure sê die indruk word dikwels geskep dat sowat N$7 miljard nodig is vir die nasionale redery om weer sy werksaamhede te begin, maar dit is nie feitelik korrek nie en word op die “verkeerde uitgangspunt” gebaseer. Volgens die direksie bring dié bedrag toekomstige skuld tot so ver as 2025 in berekening en skep dit die indruk dit is reeds verskuldig en betaalbaar. “Ons het die syfer al op drie verskillende forums aan aandeelhouers verduidelik,” sê hulle. Air Namibia se direksie het gister gesê die likwidasie van die redery sal beteken meer as 636 mense sal hul werk verloor, terwyl hul herstruktureringsplan die helfte hiervan kan red. Die redery sal dan steeds waarde tot die land se ekonomie kan toevoeg. “Die direksie is van mening dit is in die beste belang van beide die redery en aandeelhouer om likwidasie te vermy en die herstruktureringsplan te implementeer, soos aan die aandeelhouer (die regering) voorgelê is,” word in die verklaring gesê. Dit behels dat alle huurkontrakte beëindig word, alle niewinsgewende roetes van hul netwerk geskrap word en die meeste kontrakte en ooreenkomste heronderhandel word – alles vir beter kostedoeltreffendheid. AFBETAAL “Tans besit die redery ses afbetaalde vliegtuie wat gebruik kan word om ‘n inkomste te verdien - sonder die las van huurkoste. Die direksie het ook alle roetes wat verliese maak, gestaak en hulle vorm nié deel van die nuwe plan nie. “Daar moet genoem word die redery is inderdaad met historiese skuld belas – van tot so ver terug as 23 jaar – en dat die skuld wat deur die regering gewaarborg is, steeds betaal moet word, ongeag of die redery gelikwideer word of nie,” is verduidelik. Die direksie beweer die regering, ‘n aandeelhouer wie se verantwoordelikheid eintlik beleidmaking vir staatsondernemings (SOE’s) is, het in die geval van Air Namibia oor die direkteure se koppe gegaan en onder meer direk met werknemers en vakbonde begin onderhandel. Boonop het die regering glo op sy eie met ‘n herstrukturerings-oefening begin, sonder die direksie se medewete. Verder word beweer die regering onderhandel oor kontrakte wat die redery betrek, sonder dat die direksie kennis daavan dra en stel raadgewende dienste namens die maatskappy aan, terwyl dit ook die begroting – sonder die direkteure se betrokkenheid – probeer bestuur. “Sowat N$948 miljoen is in die 2020-’21-boekjaar deur die ministerie van finansies aan die redery bewillig, maar tot dusver is die direksie nie ingelig oor hoe die geld aan die redery uitbetaal is en of dit uitbetaal is nie, buiten vir ‘n maandelikse toekenning vir werknemers se salarisse nie,” lui die verklaring.TÉ DUURRepublikein het voorheen berig die kabinetskomitee vir tesourie het verlede jaar reeds mnr. Leon Jooste, die minister van SOE’s, se aanbeveling om Air Namibia te likwideer, aanvaar. Die besluit is egter stil gehou uit vrees dat Castlelake die waarborge sou oproep. Jooste het onlangs gesê die onderhandelinge met Castlelake was ’n sukses en is feitlik afgehandel. Hy sê waar daar in 2019 nog vier toekomsopsies vir Air Namibia onder bespreking was, is daar nou net twee oor. “Die twee opsies is ’n nuwe besigheidsplan wat N$7 miljard en meer sal kos, of likwidasie wat waarskynlik heelwat minder as N$2,5 miljard sal wees,” sê Jooste. Hy sê die kosteverskil tussen die twee oorblywende opsies beloop meer as N$4,5 miljard. Mnr. Iipumbu Shiimi, minister van finansies, het onlangs in ’n verklaring gesê Air Namibia was sedert sy ontstaan ’n finansiële las vir die land en die belastingbetaler moes die afgelope tien jaar N$8,4 miljard opdok om sy vliegtuie in die lug te hou. Hy sê as gevolg van Covid-19 kan die regering nie die nasionale redery se voorgestelde nuwe sakeplan van meer as N$7 miljard bekostig nie. Volgens Shiimi het pogings in 2019 om strategiese vennootskappe met ander rederye te sluit, óf hulle te kry om in Air Namibia te belê, nie geslaag nie. Hy verwys in sy verklaring op die reusekrisis waarin wêreldlugvaart verkeer, met talle rederye wat gelikwideer word. Luanda het nie gister op vrae oor sy bedanking reageer nie, hoewel hy die WhatsApp-boodskap daaroor gelees het. – ronelle@republikein.com.na en elvira@republikein.com.na

Air Namibia: Drie direkteure bedank

Kommentaar

Republikein 2025-11-04

Meld asseblief aan om kommentaar te lewer

Air Namibia: Drie direkteure bedank

Kommentaar

Republikein 2025-11-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.