Agt gevangenes, drie leerlinge en twee onderwysers toets positief vir Covid-19

Agt gevangenes van die Oluno-tronk en drie leerlinge en twee onderwysers op Gobabis is deel van die 39 nuwe gevalle van Covid-19 wat vandag aangemeld is. Dit volg nadat 703 weefselmonsters getoets is. Uit die 39 nuwe gevalle is 23 mans en 16 vroue. Die jongste is vyf jaar oud en die oudste 62 jaar oud. Uit die 39 nuwe gevalle is 14 in Windhoek, tien in Oshakati, vyf in Gobabis, drie in Walvisbaai, twee elk in onderskeidelik Swakopmund en Okahandja en een elk in onderskeidelik Keetmanshoop, Lüderitz en Onandjokwe aangeteken.

Volgens die adjunkminister van gesondheid en maatskaplike dienste, dr. Esther Muinjangue, het nog 59 mense herstel wat die totaal op 10 587 te staan bring. Dit sluit 21 in //Kharas, 17 in Khomas, 15 in Otjozondjupa, vyf in Kunene en een in Zambezi in.

Uit die 1 686 aktiewe gevalle is drie baie ernstig of kritiek. Dit sluit een kritieke geval in Erongo en een baie ernstige en een kritieke geval in Khomas in.

Muinjangue het nog 'n Covid-19-verwante sterfte aangekondig en wel die van 'n 62-jarige man van Walvisbaai met veelvuldige onderliggende mediese toestande. Dit bring die totaal Covid-19-verwante sterftes op 133 te staan.

Tot op hede is 118 462 weefselmonsters getoets, tans word 7 568 kontakte gemonitor en 1 145 mense is in kwarantyngeriewe oraloor in die land.