Afrikaanse animasieprent binnekort vrygestel

Die Sneeukoningin,’n internasionale animasiefliek, word op 30 Oktober eksklusief in Afrikaans vrygestel en sal dan ook in die Namibiese Ster Kinekor-teaters vertoon word. Die rolprent is gebaseer op die oorspronklike, klassieke feëverhaal wat in 1845 deur Hans Christian Andersen gepubliseer is. In die Afrikaans-aangepaste rolprent word die stemme van Heidi Mollentze, Pierre Breytenbach, André Stolz, Melt Sieberhagen en vele ander in die hoofrolle gebruik.Die storie handel oor ‘n dogtertjie, Gerda, en haar broer Kai, wie die stryd tussen goed en kwaad moet wen. Die Sneeukoningin wil graag ‘n nuwe wêreld skep waar dit altyd winter is en waar die ysige Poolse winde die mense se siele afkoel en die skoon, koue lyne van die winterlandskap mense se emosies wegneem. Sy het die wêreld met ys bedek en beplan nou om alle kuns te vernietig. ’n Towerspieël het egter voorspel dat die meesterglasmaker, Vegard, die Sneeukoningin en haar koninkryk gaan bedreig. Vegard se spieëls wys nie net mense se voorkoms nie, maar weerspieël ook hul siele. Op ’n dag waai die Poolse winde vir Vegard en sy vrou, Una, weg, maar hulle slaag daarin om eers hul dogtertjie, Gerda, en babaseuntjie, Kai, weg te steek.Kort daarna ontdek een van die Sneeukoningin se bediendes vir Kai en sy glo vas dat hy Vegard se opvolger is. Nadat Kai deur die Sneeukoningin ontvoer en in haar paleis opgesluit is, vertrek Gerda op ’n reis deur die ysige wonderland, vergesel van Luta, haar troeteldier, en Orm, die trol. Gerda kom voor ’n hele paar moeilike struikelblokke te staan en maak nuwe vriende in haar poging om Kai te bevry, maar sy sal die Sneeukoningin moet oorwin en die harte van mense moet verower om die wêreld te red.Die pragtige tonele, klassieke verhaal en hoë gehalte animasie deur die animasiemaatskappy Wizart sal gehore bekoor. Vir meer inligting kan die lokprent op YouTube en Facebook gesien word.

Afrikaanse animasieprent binnekort vrygestel

Kommentaar

Republikein 2025-05-19

Meld asseblief aan om kommentaar te lewer

Afrikaanse animasieprent binnekort vrygestel

Kommentaar

Republikein 2025-05-19

Meld asseblief aan om kommentaar te lewer

MELD AAN

Advertensie