ACC wys op onlangse suksesse

Danksy ondersoeke van die Teenkorrupsiekommissie (ACC) is sedert Maart 2020 vyf mense op klagte van korrupsie skuldig bevind. Volgens die kommissie se woordvoerder, me. Josephine Nghituwamata, dien dit as 'n duidelike bewys dat geen korrupsie van enige aard in Namibië geduld word nie.Op 7 Mei is Adelma Seibes, senior administratiewe beampte by die Otjiwarongo-munisipaliteit, skuldig bevind aan die gebruik van 'n vervalste verkoopstransaksie-akte om 'n erf ter waarde van N$234 236 in die dorp te koop. Sy is tot drie jaar tronkstraf gevonnis, waarvan twee jaar vir vier jaar opgeskort is. Die voormalige vakbondleier Sakeus Taapopi Shikongo is aan die korrupte gebruik van sy amp vir eie gewin skuldig bevind. Hy is 'n boete van N$20 000 opgelê, waarvan N$5 000 vir drie jaar opgeskort is, of 24 maande tronkstraf waarvan agt maande vir drie jaar opgeskort is, mits hy nie weer aan enige misdaad van oneerlikheid skuldig bevind word nie.Shikongo is op 9 Julie 2019 in hegtenis geneem nadat hy van die besturende direkteur van Hickory Creek Spur op Swakopmund omkoopgeld van N$2 500 ontvang het om werknemers te oortuig om 'n laer salarisverhoging te aanvaar as waarop hulle aangedring het.Nghituwamata het ook die skuldigbevinding van Jason Iiyambo uitgewys, wat 'n ACC-beampte probeer omkoop het. Iiyambo is tot 18 maande tronkstraf gevonnis, waarvan nege maande vir vyf jaar opgeskort is. Die skoolhoof van Swakopmund, Lizetteh Lucas, is skuldig bevind aan die verduistering van geld van die ministerie van onderwys, kuns en kultuur. Sy moet die geld terugbetaal óf tronkstraf van 36 maande (opgeskort op hierdie voorwaarde) uitdien.Nog 'n skuldigbevinding aan korrupsie was Jafet Garoeb, wat twee jaar tronkstraf, of 'n boete van N$6 000, opgelê is, sê sy.“Die Teenkorrupsiekommissie bedank elkeen wat aktief deelneem in die stryd teen korrupsie. “Dit is elke individu se plig om deel te wees van die geveg en om vermoedelike dade van korrupsie by die kommissie aan te meld sodat die skuldiges voor stok gekry kan word,” sê Nghituwamata.Die ACC het kantore in Windhoek, Otjiwarongo, Oshakati en Swakopmund, of kan by 0800 222 888 geskakel word, of per e-pos genader word. Volgens Nghituwamata word alle sake ondersoek.FOTO’sDie Otjiwarongo-munisipaliteit se gewese senior administratiewe beampte, Adelma Seibes, is aan korrupsie skuldig bevind. Foto ACCSakeus Taapopi Shikongo, voormalige vakbondleier, is aan korrupsie skuldig bevind. Foto ACC

ACC wys op onlangse suksesse

Kommentaar

Republikein 2025-05-13

Meld asseblief aan om kommentaar te lewer

ACC wys op onlangse suksesse

Kommentaar

Republikein 2025-05-13

Meld asseblief aan om kommentaar te lewer

MELD AAN

Advertensie