Aborsiegesprek skop voor LP's af

Jana-Mari Smith – Die geskiedkundige openbare gespreksessies oor die hervorming van die aborsiewet in Namibië het gister in hoë rat afgeskop, met pro-keuse-kampvegters wat gevra het vir die tersydestelling van 'n wet wat uit die apartheidsera dateer en wat volgens hulle menseregte skend en teen Namibiese vroue diskrimineer.“Ek dink toe ons as vroue vir die onafhanklikheid van hierdie land geveg het, het ons geveg vir die reg om nie onderdruk en nie teen gediskrimineer te word nie, en ek dink die aborsiewet doen presies dít. Dit onderdruk en diskrimineer,” het die Namibiese prokureur en menseregte-advokaat, adv. Bience Gawanas, tydens die opening van die eerste dag van die openbare verhore voor die parlement se staande komitee oor geslag en gesinsake, gesê.Gawanas was een van talle wat namens die pro-keuse-beweging onder die sambreelorganisasie Voices for Choices & Rights Coalition (VCRC) gepraat het. Die koalisie het ook 'n klagskrif oorhandig wat vra vir die wettiging van aborsie in Namibië en meer as 62 000 keer onderteken is.Die pro-keuse-spreekbeurt is gevolg deur argumente van die Omaheke-koalisie van kerke en Pro-Life Namibia, waar 'n beroep op die regering gedoen is om toegang tot wettige aborsies te beperk.APARTHEIDSERAMe. Ndiilokelwa Nthengwe van die VCRC het aangevoer die Aborsie- en Sterilisasiewet van 1975 is deur die apartheidsregering afgedwing om die bevolkingsgroei van wit mense aan te moedig.“Hierdie wet het eintlik oor die bevordering van die wit nalatenskap gegaan, nie die bewaring van die regte van alle vroue nie,” het sy gesê.“Hoe kan ons in 'n onafhanklike Namibië nog steeds 'n wet verdedig en beskerm wat vir baie spesifieke doeleindes voor onafhanklikwording aangeneem is? Ons het baie wette gehad wat ons geskrap het, want daar is nie meer plek vir hulle in 'n vrye en onafhanklike Namibië nie,” het sy voorts gesê. Sy het benadruk dat vele Namibiërs onder apartheid “vir die langste tyd” aan stigmatisering en onmenslike wette onderwerp is. “Ek dink dis tyd dat ons die Namibië skep wat ons almal wil hê. 'n Namibië waar mense hul keuses maak, want dis die regte ding om te doen.”Mnr. Omar van Reenen, van die pro-keuse-koalisie, het gewaarsku vroue in Namibië word “steeds vasgeketting deur die boeie van koloniale en apartheidserawette”.Hy het gesê na raming sterf 500 Namibiese vroue jaarliks weens onveilige aborsies wat voorkombaar was.“Daar is niks pro-lewe daaraan om 500 vroue te laat sterf omdat hulle, vanweë die staat se regulering van reproduktiewe regte, nie outonomie oor hul liggame het nie.”ONEFFEKTIEFProfessor Lucy Edwards-Jauch, 'n pro-keuse-koalisielid, het benadruk dat die huidige aborsiewet nie verhoed dat vroue wel die prosedure ondergaan nie. “Wat is die nut daarvan om so 'n beperkende wet voorts toe te pas as dit nie verhoed dat aborsies plaasvind nie, maar ernstige gevolge vir vroue se gesondheid en lewens inhou?” Sy het gesê die meerderheid vroue wat onwettige aborsies ondergaan, is “jong, swart vroue wat nie kan bekostig om na Suid-Afrika te reis om hierdie prosedure te ondergaan nie. Waarom beperk ons aborsie met hierdie wet, as die wet eenvoudig nie effektief is nie?”Edwards-Jauch het opgemerk hoewel Namibië 'n sekulêre staat is, het “mense se godsdienstige en morele oortuigings” tot dusver die regte op aborsie bepaal.“Net vroue kan swanger raak en slegs vroue het die keuse om 'n swangerskap te beëindig of nie. Dus, as ons dié wette maak, diskrimineer ons teen vroue, want dis 'n ernstige skending van hul liggaamlike outonomie.”Me. Nyasha Chingore van die AIDS and Rights Alliance for Southern Africa (ARASA) het benadruk dat die grondwetlike en demokratiese regte op gesondheid en menswaardigheid 'n kernrol in die kwessie van die wettiging van aborsies moet speel.“Al hierdie regte word geraak as mense nie toegang tot veilige aborsies het nie en hulle tot onveilige aborsies moet wend.” 'NEE'Diegene wat 'n stryd voer om die huidige aborsiewet te behou, het Maandag aangevoer die wettiging van aborsie sal nie die sosioëkonomiese probleme oplos wat Namibiese vroue in die gesig staar nie, maar dit eerder vererger.Dr. Shirley Magazi het gesê onbeperkte toegang tot aborsie sal die “psigososiale kwessies” vererger waarmee vroue worstel, en dat die fokus eerder daarop moet val om vroue te help om hul opvoedkundige, maatskaplike en ekonomiese doelwitte te bereik.“Kom ons werk om die probleme uit die weg te ruim en ons vroue te help.”Sy het gesê kerke kan 'n noemenswaardige rol speel.“Ons moet fondse na kwessies kanaliseer om ons samelewing eerder op te hef en nie aborsie op aanvraag as 'n opsie te gee nie. Ons moet verby die voor hand liggende en na 'n omvattende benadering kyk.”Dr. Francois Louw van Gobabis het na studies verwys wat, volgens hom, getoon het dat vroue – en veral tieners – wat aborsies ondergaan, fisieke en geestelike gesondheidskomplikasies op kort en lang termyn ervaar.“Daar bestaan nie iets soos 'n veilige aborsie nie; daar is altyd komplikasies en langtermyn newe-effekte,” het hy aangevoer. Hy het gesê navorsing het getoon dat vroue met verskeie sielkundige probleme worstel nadat hulle die prosedure ondergaan het, insluitend dwelm- en alkoholmisbruik, skuldgevoelens, vrees en 'n groter risiko vir selfdood.“Dié is 'n oorlog,” het Louw aangevoer. “Die moraliteit en gesinswaardes van Namibië word hier aangeval.”– republikein@republikein.com.na

Aborsiegesprek skop voor LP's af

Kommentaar

Republikein 2025-09-19

Meld asseblief aan om kommentaar te lewer

Aborsiegesprek skop voor LP's af

Kommentaar

Republikein 2025-09-19

Meld asseblief aan om kommentaar te lewer

MELD AAN

Advertensie